بخصوص تغير إطارت سيارتي الفورد كراون

بغيت استفسر منكم عن كفرات سومو تومو هل تنصحوني بها ....

بسم الله الرحمن الرحيم

اخواني الكرام

السلام عليكم ورحمة الله وبركاته

موضوع جميل وخطير وقوي ورهيب وممتاز ويجب على كل سائق عد التهاون به والا حلت كارثة الا وهي الحوادث كفانا الله شرها "اللهم آمين"

سبحان الله الحين انا قاعد أفكر في تغيير الكفبرات ولو أنها غالية لكن يقولون ما دامك داخل المدينة لا يؤثر لكن (لاتسرع) والصراحة انا خايف جداص خصوصاً وانني ماشي 55.000 كم كثير على هالكفرات.

وهناك ملحوظة اذا تنوي تغير الكفرات (لاتحتفظ بالقديم)خذوها نصيحة مني >>> لانك اذا ضرب عليك من هالكفرات الجدد راح تستعمل القديم وطبعاً راح تنساها وهذا خطر عليك وعلى الارواح اللي معك!!!

اشتروا خمس كفرات جديدة ، اما القديم أرميها وتخلص منها لانها خطر عليك.

انفجار الكفرات والوقاية منه ...
http://www.assayyarat.com/forums/showthread.php?t=10845

الإطارات.. قنابل الصيف الموقوته
http://www.assayyarat.com/forums/showthread.php?t=105571

أذكـــار يجب أن لا نـــنـــســــاهــــا
http://www.assayyarat.com/forums/showthread.php?t=65747


ولا تنسوني من صالح دعائكم وجزاكم الله خير على هالموضوع.

والله يا اخي نعم الاختيار انا مركب ميشلان ( تايلندي ) ومشيت عليها 115000 الف كيلو ولها تقريبا بالسيارة سنتان وثمانية اشهر والحقيقة انا راعي خطوط لكن الحق يقال لها خدمة ماشاء الله تبارك الله نعم الصناعه والله ونعم الوكيل واليوم بمشيئة الله راح اغير مثلها لاني على نية سفر واخاف لان الكفر قنبله موقوته والله يستر

أشكركم ياشباب على هذه النصائح والاهتمام
بعد استشارتكم
أستخرت الله وركبرت ميشلان من الوكالة (الجفالي)
لكن لاحظت:
1- أن هناك نوعان من الميشلان نفس الجودة ونفس المصنع ولكن...نسيت وشو الاختلاف اللي ذكره البائع ولكن بالنسبة للسعر فهناك فرق حوالي 100 ريال.
2- النوع اللي أخذته هو نفس النوع اللي في السيارة ولكن مكتوب عليه مصنوع في رومانيا ومصنوع عام 2006 الاسبوع 49
3- بالنسبة للهواء للاسف ما وجدت عندهم إلا هواء عادي مفلتر حسب كلامهم
4- الضمان مفتوح حسب كلامهم
5- مشيت على السيارة حوال 100 كيلو بعد تركيب الكفرات الجديدة وما لاحظت أي اختلاف أو رجه أو تغير ولله الحمد

وش رأيكم بالنسبة للكفرات القديمة فحسب كلام الوكالة (الجفالي) قديمة ولكن ممكن تمشي داخل المدينة علشان كذا أخذتها عندي وودي أعرف وش تقترحون أسوي فيها؟ انا قلت خلها عندي فترة علشان أشوف الكفرات الحديدة لا قدر الله يصير مشكلة أو خراب أقدر أحط مكانه المستعمل

وفقكم الله

أنصحك بالميشلان لأن عندي فورد وماشي على الكفرات 50 ألف وكلها سفر والكفرات كأنها جديدة.
وعلى فكرة فيها شركة ثانية إسمها فيرستون Firestone تراها ممتازة ويعبونها لك نيتروجين مجاناً وصناعتها يابانية.

1- ميشلان
2- بيريلي
3-بريدجستون

تويو ويوكوهاما ........

اذا السيارة تستعملها داخل المدينة انصحك بالتويو لانه سعرها مناسب وصناعة يابانية
ويمشيك الكفر اذا داخل المدينة يمكن 50 الف كيلو

اما اذا خطوط سريعة لاتبعد ابدا عن الثلاثة اللي فوق نهائيا
وتمشيك في حدود 40 - 50 الف وتلاقي برضه فيها عمر لكن احتياطي غيرها

وترى ماشاء الله الكفرات اللي معاك خدمت وانتهى عمرها لو كفرات ثانية غير الميشيلان كان تلاقيها كل شوي تبنشر عليك ونشفت

ولاتتساهل في امر الكفرات ترى اغلب حوادث الخط السريع والمشاكل منها الله يحفظ الجميع منها

تحياتي

عمر الكفر الافتراضي من 40000 كلم الى 45000كلم .....

أنا جربت البريدجستون وللأمانه ممتازه جدا ومالاحظت أي شئ ياربي لك الحمد

السياره قراند ماركيز 99

انا انصحكم بكفرات تويو والله حلوة عندي على القراند ماركيز تبعي والله حلوة مرررررة الكفر الواحد ماخذه 250 ريال يعني اربع كفرات ب 1000 ريال سعوي بس مميزاتها :
1- لينه مرة ومطبها خفيف
2-ماتطلع صوت وانت تمشي عليها
3- الستب عليها اوكي يخلي الكفر يلمع

والله ووقعت باللي وقعت فيه يـا أخوي black320 .. الله يكون بعونك .. إذا تقدر ترجع الكفرات وتستبدلهم بأي ماركة ثانية حتى لو تخسر على كل كفر 50 ريال .. رجعهـا وإرتـاح ؛ لإنك والله بتتأذى من هالكفرات .. صدقني انا يا محاكيك مجرب ومعاني منهن .. تحياتي |5|

سلاام

الاسبوع اللي طاف ركبت good year الماني الواحد 370 عليهم ضمان مفتوح ... وامس رحت اشيك على الموتر كله فقال لي المختص انو عندي كفر يرج ... انشالله امر عليهم وشوف وش سالفته..........

انا انصحك بميشلان ... او تويو ........

سلااام

السموحه بسسسسسسسسسسسسسسسسسسسسسسس

شكرااااااااااااااااااااا

تحية طيبة للجمـيـع ..

لي تجربة رائعـة وممـتـعـة مـع إطـارات جـود يـيـر .. اول طقم كفرات ركبته كانت صناعته أمريكي .. المهم انه كان آخـر حلاوه .. مشي وترصيص وتدوير فقط لا غير .. حتى حـبـًلـت ، فآثرت تغييرهـا ، رحت لوكيل جوديير بالريـاض .. وإلاهم مغيرين صناعة كل الكفرات اللي عندهم .. صارت جنوب أفريقية والمانية .. قلت خذ الألمـاني أبرك لك .. ولله الحمد والمنة وبدون مبالغة .. من أول ما طلعت فيهـا من الوكالة ومسكت طريق مكة .. والكفرات رجًـه ملحوظة .. المهم مشيت عليهـا وانا كنت اظن انها جديدة فعلشان كذا الرجة لازم تكون موجودة وهذا خطأ كبير مني ( والمفروض تتعلمون مني .. والله المفروض من يوم إنـي حسيت بالرجـة رجعت للوكالة ورميت كفراتهم عليهم وركبت كفراتي القديمة واخذت فلوسي ومشيت ادور وكالة ثانية ) .. مشيت عليهـا وهي رجـة .. حتى ضرب علي واحد من الكفرات والسيارة توهـا مـامشت 1500 كيلو على الكفرات الجديدة .. وارجع لهم ويبدلونه لي .. بعد فترة ضرب علي الثاني ، وأرجع ويبدلونـه .. وبعد فترة رحت ابي ارصص الكفرات .. والعامل الغبي مـاراح يرصص على الكومبيوتر ويشوف الكفر بحاجة لترصيص أو لا ؟
رصص ترصيص عادي يدوي ..
المهم انه رصص كفرين مايحتاجون ترصيص .. وامشي عليهـا والسيارة رجه مو طبيعية وارجع لهم ويفحصونهـا ويكتشفون الخلل ( الكفرين اللي رصصهم العامل خطأ خربوا ) ، وغيروا لي كفرين .. بعد فترة .. وانا ماشي تحت نفق ، فجأة يبنشر الكفر واضطر امشي عليه لأقرب مخرج من النفق .. ومشيت عليه مسافة تقريبـاً 300 متر .. وطبعـاً الكفر إندمر .. واروح للوكالة وهوشة طويلة عريضة .. والسبب ان العامل كان يغير الكفرات بدون لا يشيك على البلف << عامل مؤهل الصراحة :mad:
المهم وركبوا لي كفر جديد .. واروح ، بعد فترة ضرب علي كفر ثاني .. يـا حلاااااااااوه .. وارجع لهم اتهاوش معهم وهالمرة عـاد مـع مديرهم ودفعوني نصف قيمة الكفر .. وطلعت من عندهم والله ثم والله إلى ساعتكم الموتر كأنـه مـازدا بوقس 82 .. من الرجة .. وبستخدمها لين تخرب الكفرات ثم ببدلهـا أو ابدل الموتر كله لا بارك الله فيه من موتر .. مـع ملاحظة إني وخلال ترددي عليهم أشوف ناس تشتكي من كفرات ضربت عليهم .. وهذا دليل على إن جودة صارت من الماضي

هذي بإختصـار تجربتي مـع قود يير .. لا أنكر أن شركة الراشد شركة محترمة وتقدر الزبون وتستحق من يثني عليهـا ، لكن العيب من جود يـيـر اللي بدأت تغير صناعتهـا ..

بالنسبة للفـورد فأنـا أشوف اغلب اللي معاهم فورد يركبون مـيشـلان اللي وكيلهـا الجفالي ( على طريق خريص ) .. حتى الفوردات اللي بأمريكـا أغلبهم يركبون كفرات ميشلان .. فالله العالم انهـا ممتـازة ..

وبالنسبة للمحافظة على الإطـارات .. فالأفضل إنك ترصص كل 10 آلاف كيلو ، وتدور الكفرات يعني تغير مكانهم .. هذي طريقتهـا للكفرات اللي مركب عليهـا جنوط ( الكفرات الخلفية تقدمهم بنفس المواقـع يعني الكفر اللي ورى يمين تخليه قدام يمين والكفر اللي ورى يسار تخليه قدام يسار )
والكفرات الأمامية ( اللي قدام يمين تخليه ورى يسار - واللي قدام يسار تخليه ورى يمين ) وبهالطريقة كل 10 آلاف كيلو .. مـع العلم بأنه فيه طريقة أخرى للكفرات اللي مركب عليهـا الطيس واللي يبيهـا يقولي علشان اكتبهـا .
وكل 20 ألف كيلو غير البلوف حقات الكفرات .. أضمن لك ..
وبالتوفيق للجميـع

معليش albosily على التدخل بالموضوع

ياشباب انا عندي نفس المشكلة وابي اغير الكفرات

وياليت ترشحوا لنا افضل الكفرات المناسبة للفورد واسعارها التقريبية

البارح رحت لمحل كفرات وحصلت انواع واجد واحترت صراحة

أشكر للجميع ردودهم ونصائحهم
الحقيقة أن سعادتي بوجود هذا التفاعل وهذا الاهتمام وفقكم الله...

كنت أتمنى لو أستطيع أرفاق لكم صور الكفرات لتعطونا رأيكم النهائي
ولكن لو تكرمت ووضعتم البريد الالكتروني لمن يرغب
وسوف ارسل له ليعطيني رأيه بالموضوع

نوعية الكفرات الحالية هي ميشلان
فمن هو الوكيل وأين موقعه بالرياض

معليش ياشباب كثرت عليكم من الاسئلة ولكن ما خاب من استشار

اخوي انا عندي فكتوريا 2005 ومن قبل 6شهور معر كفرات الوكاله وركبت((بريجستون))ورحت خط كذا مره علي السياره باكفرات البريجستون وانا والله للآمانه ياخوي مرتاح لهم مافي رجه ولا ازعاج وسهرهم مناسب جدا جدا بالنسبه لجودتهم...واذا عندك اي استفسار حاظر وفي الخدمه...تحياتي...

اخي الفاضل بعد اطلاعي على دليل المستخدم ودليل الصيانة الخاص بفورد ودرسته بشكل دقيق ومفصل
وجدت امور الصيانة الدورية بشكل عام ومن ضمنها الكفرات حيث ان مدة صلاحيتها سنتان مع مراعاة الاستخدام من شخص لاخر وايضأ ظروف المكان.

وتستطيع رؤية هذا الكلام بالصفحة قبل الاخيرة بجدول الصيانة الدورية والسنوية والنصف سنوية بكتيب الصيانة المرفق مع السيارة

تحياتي