رأيكم في طاش ماطاش..أدخلو وشاركونا

خلااااااااااص طفح الكيل انا راح اقول رأيي للمرة الاخيرة ...

حلقات طاش جيدة ولكن اللي يقهرني المبدأ ..يعني حنا تعودنا على انه طاش مسلسل كوميدي ،،،،

ولما اقول كوميدي يعني ضحك .. في البداية كان حلقات طاش كله كوميديا وضحك ولكن اللي حصل انه الادوار

اللي يلعبوها مكررة اما عبدالله يمثل دور العامل الهندي وناصر هو الكفيل او العكس لما بدأو الناس يطفشوا ...

والحين اصبح المسلسل يحكي الواقع الدي نعيشه ... صحيح كل حلقة اشوفها احلى من الثانية مثل الحلقة الاولى عن

القنوات و الحلقة الي يتهمون فيها البنت لانها مطلقة وممكن تسوي اي شي ... ولكن زي ما قلت لكم المسألة مسألة مبدأ

كيف حولوا مسلسل كوميدي الى مسلسل اجتماعي وفيه اغاني وبنات...كيف ؟؟؟؟

اولا / بخصوص تحويل المسلسل الى مسلسل يحكي الواقع الدي نعيشه طيب انا موافق بس يغيروا اسم المسلسل الى اي اسم

آخر غير طاش ما طاش ....

ثانيا / بخصوص انهم يعرضون صور لبنات غير محتشمات ويتكلموا بمياعة ...وهدا اكثر شي يحرج الواحد قدام اهله... بتقولوا

مو بس في القنوات السعودية ولكن حتى الخليجية بصفة عامة ....طيب ارجع اقول برضوا المسألة كلها (مبدأ) في البداية كان

الكل حتى الملتزمين يتفرجوا على المسلسل على راحتهم لانه ما كان فيها اغاني ورقص وبنات يعني يستأمنوا على اهاليهم من مشاهدة

مثل هده المسلسل ... اما الحين اشوف انه مافي فرق بين المسلسل وبرنامج ستار اكاديمي ...

ثالثا/ استهزائهم بالدين والملتحين على انهم غشاشين وممكن يهربوا باموال المساهمين الى الخارج ... ما قلنا شي صحيح انه البعض

يعفوا لحاهم ويقصروا اثوابهم ودلك لكي يحققوا مصالحهم الشخصية على حساب الدين .... اما انهم يستهزئوا بالقنوات الدينية

على انه همهم الربح التجاري ...طيب ياشباب خلونا من قناة المجد ...احد فيكم شاهد قناة الرسالة ....القناة هده بدعم الامير الوليد بن طلال

وهو بنفسه طلب من الداعية والدكتور طارق السويدان انه يكون المشرف العام لهده القناة ... هدا الشخص وهو من الكويت يقوم بدوره في

نشر الاسلام ايش راح يكون شعوره لو شاف الممثلين ناصر وعبدالله سعوديين يستهزؤا بالدين وبالقنوات الاسلامية ...

هناك حديث عن الرسول (صلى الله عليه وسلم ) ما ادكره بالضبط ولكن مفادها انه احد المسلمين استهزأ وقال ان المسلمين بس همهم الاكل

وكلامهم كله كدب وانهم جبناء عندما يكونوا المعارك ...فقال الرسول (صلى الله عليه وسلم) لاتعتدروا اليوم فقد كفرتم ...الخ) ....

وشي طبيعي وليس بغريب لو انهم استباحوا دمائهم ....

لا تنسوا الكلام اللي قلته يمثل رأيي الشخصي ... ولا احد يزعل منه ...

تبون الحق عاد


نحنا زعلانين صح



لكن هم ما نقلو الا الواقع


فعلا هم الان يعالجون قضايا اجتماعيه


لكن مع هذا عندهم بعض الاخطاء فهم ليسوا ملائكه منزهين هم كسائر البشر




صرااااحه هم فتحوا عيون المسؤلين على بعض التجاوزات اللي تحصل بالبلد



ولي كلام كثيرر فيها لكن لا يتسع الوقت للنقاش



تحياتي لكم

بعض الحلقات فيها مواضيع هادفه وواقعيه بالمجتمع

لكن البنات اللي جايبينهم والمطاوعه اللي متطنزين فيهم

مالها اي داعي

بصراحه شي يقهر ويغبن يستهزؤون بمطاوعتنا!!!

ليش بأي حق مايبون مطاوعه أبد يعني يبونها كل شي فري !!

صدق شي يرفع الضغط

شكراً لكم جميعاً|3|

أخوي بالنهايه

أخوي الإنتقادات وجدت لأن طاش ماطاش

إتغيرت مواضيعه من شئ تافه وجد للضحك

إلى شئ هادف يناقش مواضيع لن نجرؤا على طرحها

وفعلا

من أول حلقه لأخرها مشاكل عندنا >> ماعدا المقتبس من فلم أجنبي

والمشكله بالبنات إلي عارضينهم بس


يأخي مولا لازم هابنات يحطوهم

والسلام عليكم

البرنامج أوويد إنه يستمر لكن شعبيته بتنقص

كله كووم

وكووم إنهم سوى مقابله مع عبد الخالق يقول الكوميديا لعبتي >> ألعب غيرها

والسلام عليكم

بصراحه ياشباب الاراء تختلف

بس بقولكم شي ياجماعة الخير

الحلقات اللي مثل ان البنت ركبت سياره بالغلط ماقول شي فيها ولا حلقة الجنسيه

لكن اللي اقوله اول حلقه حقت المطاوعه

ارجع اقولكم مره ثانيه السدحان يمثل بدور اليمني اللي كان ساحر وشاف حلم وخاف........إلـــــخ

وهداه الله هم جابو نفس السالفه وبطريقه مسخره!!!

ومن الاساس لايجيبون مطاوعه

واصلاً قناة المجد معروفه جداً

ولو تروح لواحد مطوع ومتزوج تلقاه حاط فوق بيته صحن عليه شعار قناة المجد

وكذا مره انا رحت لبيت مطوع وامر من عند بيوت مطاوعه ماشاء الله عليهم

اهنيهم بصراحه
قناة المجد مشترك فيها

يعني بصراحه شي يرفع الضغط

والشي الثاني جايبين الهندي الي فاتح مغسله بالاخير لعب على كفيله

ماقلنا شي هذا واقع وراح استأجر شقه وسوا فيها حفله ماقلنا شي إلى هنا وكلامهم صح

لكن الطريقه جايب بنت لابسه علاقي ومطلعه خط صدرها

ورقص وغيره

يعني بتقولي واقع ابقولك اوكي واقع وهالشي رجال الامن ماقصرو كل يومين نشوف بالجرايد ,,القبض على عماله في شقه سكنيه يروج بها الخمر ويقولون بعد فيها رقص واختلاط وكذا

نعرف هالشي

لكن وش المقصد انهم يمثلونها!!

يعني جايبين بنات ومع رجاجيل

ياخي كان جابو رجال وحطو له مكياج على انه بنيه ارحم

عالعموم لحد يزعل من كلامي

وآسف عالاطاله |3|

تقبلو تحيتي

طاش ماطاش


مسلسل ناجح ومن انجح المسلسلات العربيه ان لم يكن هو الانجح فعلا .. لانه لايوجد مسلسل عربي له 15 سنه 15 جزء 15 موسم ويذكرنا بالمسلسلات الاجنبيه ذات المواسم الكثيره

اخوي المسلسل في الجزء 13 الى 15 بدا يتكلم اكثر عن مشاكل المجتمع الخليجي عامه والسعودي خاصه .. بخصوص المراه فهذا كله تمثيل × تمثيل لاتطرق لاي شيء ولايعكس اي صوره عنا

لكن جزاهم الله خير انهم يتكلمون عن مشاكل مجتمعنا .. فعلا ومنها حلقة البنت الي ركبت السياره غلط والحلقه الماضيه .. وايضا حلقة الهيئه التي اتت العام الي راح مع انهم بالغوا فيها بقوه لكن فيها شي من الصواب .. لاتسعني الذاكره للاتذكر الاجزاء السابقه لكن سوف اتكلم عن الجزء 15 بحلقاته ان تذكرتها

فيه حلقة .. يوسف الجراح و ناصر القصبي وعبدالله حين كان لدى يوسف الجراح زوجه غيوره جدا جدا عليه وشكاكه فعلا كلام عين الصواب وتقريبا اكثر من نصف النساء زي كذا وايضا حين بدا عبدالله السدحان يكلم البنت بالموبايل حين بدا يضرب يده حسره والم على مادار معها في المطعم فعلا اكثر شبابنا وللاسف عندهم نفس المشكله ..

وفيه حلقه .. البنت حين ركبت بالسياره الغلط .. هذي قصه حقيقيه وقعت في السعوديه وفعلا يتكلم عن شدة التخلف لدى المجتمع .. يعني لدرجة ان وصل الامر انه يأتي بها بالساطور

وفيه حلقه .. الجنسيه .. انا لااستطيع ان اعلق عليها واخليها للامسؤولين

وفيه حلقة .. الهندي الي يظهر لهم انه يصلي في المسجد وانه من اهل الدين وبالاخير يخذع كفيله ويهرب بعد ان سرق المغسله وفعل مافعل .. فعلا اكثر الي يمسكونهم رجال الامن في البطحاء وغيرها من الفئه هذي الهاربه المتخلفه

وحلقة .. قناة الاغاني ثم قناة المسابقات ثم قناة الدين .. هذي فيها سب انا معك .. ولكن .. ولكن لايعلم مافيه صدور الانس الا خالق الانس


وبالنسبه لحلقات العام

حلقة الخضيري والقبيلي الحساسه جدا جدا والتي كانت قصه حقيقيه وقعت في تبوك تكلموا فيها


وبالنسبه للاتكلم في رجال الدين .. ممكن تجيبولي حلقه فيها سب فيهم لااعتقد فيه حلقه فيها سب قوي جدا فيهم

-------

وبالنسبه للكلام الكثير والكثير والذي لن ينتهى عن طاش .. انا ارى ان طاش من افضل المسلسلات وانا ضد من يود ان يوقفه لما يحكي عن مشاكل مجتمعنا

--------

وبالنسبه لناصر القصبي الرجال ساكن في حارتنا بحي الريان وقرر السفر لدبي واعتقد انه سافر .. الرجال تبهذل وانحاس من كثر رسائل التهديد التي توضع امام بابه والقمامه التي ترمى امام بيته وغيره الكثير الكثير من الذي ياتيه من ناس اعتبرهم انا .. ناس همج متخلفين من شدة كراهيتهم وحقدهم يفعلون هذا العمل تخلف وحقد و قلة ادب وتربيه

------

تحياتي

مواضيع الحلقات كللللللللها من الواقع
ولكن اسلوبهم في الطرح هو اللي نذمه (( البنات ))

^
^
^
مداخلة خارج الموضوع : عمر 206
سألتك نفس السؤال هذا في المقهى

اشكرك اخي على اهتمامك ... السبب حيكون تافه بنظرك ... ولكن خلني انزل كل مواضيعي ..وبعدها راح ابين السبب ع الخاص او انزله بموضوع على حدة ...

.
.
.
يـ اخوان صحيح المسلسل يعرض مشاكل واقعية ...
لكن ليس بـ الدوام ....

انا ما ابغى واحد يعرض لي مشكلة احنا كلنا عارفينها ... بـ طريقة مالها داعي ....
يعني حلقة القنوات ... اظهروا مشكلة واهداف القنوات من الـ SMS ...
وهذه النقطة يشكرون عليها للايقاذ الشباب الغافل والــ خ ــبــل واعذروني ع الكلمة

واظهروا المشكلة وان كيف الشركات يمتصون جيوب العالم ويضحكون عليهم ....

لكن وش الداعي من المشهد الاخير عندما تحولت القناه الى دينينة اصبح المال يمطر عليهم مطرا ...
وحققوا نجاحا ... لدرجة انهم اعلنوا انهم يريدون تشفير القناة ....

لو نظرنا الى الحيقية ,,, ماهي القنوات الدينية المشفرة ....
اليست المجد ...!!!!

يعني هل يقصدون قناه المجد ام قناه اخرى ....

ما الرابط بين اشتغفال الشباب بالقنوات الدعائية والغنائية والالغاز والشعودة .... مع مكاسب القنوات الدينية ...

هل ليعلنو ان الشيوخ اصبحوا يتكسبون مالا اكثر من غيرهم ...

والله لو ان المشايخ والعلماء يكسبوا اكثر من المغنيين بسبب ظهورهم في الاعلام
والله شيء مفرح ... ع الاقل شيء مباح ....

والله بصراحه هالسنه طاش بالمره ما يسوى

اخرتها انهم يستوحون قصه من فيلم اجنبي ما فهمت وش هدفهم على الاقل لو كان فيها شوية كوميديا

حنا تعودنا انو الحلقات البيخه يجيبونها باخر رمضان ............. يعني لما يخلص الرصيد الكوميدي

بس اذا كانت بهذا الشكل من اول رمضان وش رح يجيبون باخر رمضان

ومثل ما تفضلتو صاير تجاري مره وكل شوي بدال مايركز الكاميرا على الممثل ينساه ويركز على بايسن

وكمان هنا في السعوديه قاعدين يهاجمون المطاوعه انا ما ادري هذول كيف يفكرون

ما اقول الا الله يهديهم

طاش ما طاش
مسلسل ناجح ويضرب على الوتر الحساس بكل حريه وجرأه

وكل الحلقات الي شفناها هي مرآة تعكس واقعنا ..

لكن انا ضد انهم يمسون اي شخص ملتحي او الدين ويبتعدون عن الدين .. لانهم مسخوها حبتين في هالجانب .

وهالسنه لاحضت انهم بدو يتجرأون على البنات ولبسهم وكلامهم بالعربي فيه (قلة حياء)



ومشكور اخوي على الطرح الهادف

سلامي

السلام عليكم

اشكر الاخ جمس على طرح الموضوع وعلى غيرته الواضحة على ما يرتكب من اخطاء واستفزاز بأسم النقد والصراحة وهي موجة من اشخاص مفلسين مع الاسف يحاولن زيادة مشاهديهم على حساب الاستهزاء بالدين واهلة وبعاداتنا وتقاليدنا
في الحقيقة لم اشاهد هذا العام سو الحلقة الاولي والله اني في نفسي كنت اعلم انهم سيدخلون موضوع القنوات الدينية من بداية الحلقة لاحساسي بحبهم للدعاية وان تتكلم عليهم القنوات والمواقع ليزيد عدد مشاهديهم
كما فعلو العام الماضي حين سربو حلقة (الهيئة ) تخيلو حلقة كاملة تشتريها قناة فضائية بملايين ويتم تسريبها دون علمها :rolleyes:
حتى يحصل المنع لها وتجعل العالم تتهافت عليها وتعلم ما سبب المنع

في رايي الشخصي ان المسلسل في حالة مرض وترهل منذ وقت طويل والممثلين مع المخرج يحالون انعاشة وعمل عمليات شد يائسة

اسأل الله سبحانة وتعالي ان يهديهم الى سواء السبيل وان يكفينا من شرهم وشر سمومه
واقول حسبي الله ونعم الوكيل على باقة ام بي سي والقائمين عليها

اليوم ماشفت فيها شي

عاديه وتتكلم عن الجنسيات الي يستحق ولي مايستحق


بس اقصد الحلقات اللي راحت :)

شكراً على إهتمامك ياعمر

بس عندي سؤال شخصي لك ادري انه خاش عرض بجلنط:D

ليش بتنسحب من المنتدى بتتركه مؤبد ولا مؤقت

وش السبب!!!
آسف على الإحراج

|3|

لا والله صراحة اليوم ظلمتهم ... حلقة اليوم عن الجنسية حلوة مرررة ...

اشترك في برنامج نقاطي من موبايلي واستبدلها بجنسية سعودية ههههههها عن جد حشوهم ....

وعليكم السلام ورحمة الله وبركاته

ماشوف شي ذكره بالخليج اذكر شي جابوه عن الخليج كل اللي يجيبونه عن السعوديه

واللي ذكروها القنوات والاغاني هذي صادقين فيها لكن مايجيب لك بنتين بشكل مغري يشوفها الكبير والصغير صح ان هذا اللي يسويه القنوات لكن ماييروح يقلدهم وييجيب لك بنات وعرض إغراء..يعني ماعرفو ان هذا مسلسل وبينعرض بالتلفزيون وبيشوفه الكبير والصغير

لكن المصيبه بآخر شي يوم يجيبون المطاوعه!!!!

خصوصاً اللي مثل به السدحان بدور انه واحد تائب واعتقد كان ساحر ومدري وشو

هذي قصه واقعيه وجابوها بقناة المجد ونا شخصياً متابعها اليمني اللي كان ساحر وهداه الله

وقال قصته انه حلم بأبوه وماذكر بالضبط شصار بالحلم

وهذا للي سووه طاش يتطنزون بقناة المجد القناه الاسلاميه وفوق كذا يتطنزون بواحد الله هاديه إلى الصراط المستقيم؟؟؟

والبنات العاريات الي تقول كلنا عارفين ان فيه بنات عاريات وكل يوم ينعرضون بالقنوات العربيه للأسف

وطاش قلدوهم لكن زي ماذكرت لك مايروحون يجيبون لك بنتين ويستعرضون امامك في مسلسل

ولبس مغري ودلع وتمايع والبنت تدور في محلها ومصور منطقه في البنت غير اخلاقيه!!

يعني ونا اتابعها قسم بالله انحرجت

والمثال اللي ذكرته البنت اللي ركبت سياره بالغلط هذا مانتقد فيها شي لانه شي يصير عندنا بالسعوديه والخليج وبالعكس تحمسنا مع الحلقه هذي ولافيها اي مشكله تذكر...

واللي انتقد عليه زي أول حلقة اللي فيها المطاوعه

والشي الثاني حلقه بإسم هذا حنا

بآخر شي البنت تسوق ورايحه للسينما !!!

بالسعوديه عندنا رافضين وبشده ان المرأه تسوق

يعني وش القصد بأنهم جايبين بنت تسوق

القصد هو انهم يجيبون لك في كذا حلقه بنت تسوق لين تتعود على هالشي انك تشوف مسلسل سعودي

فيه بنت تسوق ويصير طبيعي ومتعود

عشان اذا شفت بنت سعوديه على الطبيعه تسوق بتتفاجأ لانه شي جديد وبيصير عادي عندك

يعني طريقة تبنيج بالبدايه لين يصير عادي

طبعاً انت اعتقد مب سعودي ونعم فيك وين ماكنت : )

لكن اقصد السعوديين

وآسف على الإطاله يالغالي |3|


واللهم صلي وسلم على نبينا محمد

الصراحة انا بين ذم ومدح لها المسلسل
ذم من حيث انه زاد عن حده في بعض الامور
ومدح لانه مازال يطرح كثير من المواضيع المهمة مثل حلقة اليوم عن السعودي اللي مااعطوه جنسية
صحيح احنا فينا كثير ممن يدعون انهم من اهل الله
وكونهم من اهل الله كما يظهرون لنا لايعطيهم حصانة دبلوماسية
لذلك لابد من كشف اوراقهم حتى وان كانت بهذي الطريقة بشرط لايكون هناك اي افتراء
غير كذا هناك كثير من الحلقات التي طرحت بشكل غبي غبي جدا مع ان الفكرة ممتازة
بالاضافة الى ان هناك بعض المشاهد التي لم يكن لها داعي
انا دائما اكره المسلسلات المصرية والكويتية وافلام عادل امام
لانهم يقولون انهم يطرحون مشاكل الناس ويجيبون لهذا السبب لقطات مخلة بدرجات متفاوتة
طاش ماطاش صارت بهالسلوب للاسف
اما غير كذا فانا تعجبني الكلمات والمشاهد العفوية في المسلسل وانا من المتابعين له مع اني لست متابعا لاي مسلسل عربي على الاطلاق الا فيما ندر
يعني كل سنة كاملة
مسلسلين على الاقصى
اسف على الاطالة

لي رجعه ان شاء الله

السلام عليكم و رحمة الله و بركاته
هاذي وجهات نضر و انا من وجهة نظري ان مسلسل طاش ما طاش يتكلم عن الواقع اللي يصير ف الخليج و ليس فقط فالسعوديه...
و صحيح لما تكلمو عن القنوات انا اشوف انها نفس نغزه للشباب عن سالفة المسجات .. يعني قنوات الاغاني و الاهداءات هاي كلها لعب بعقول الشباب.. و هم فهمونا هالشي بطريقه غير مباشره.. بس نحن نفهمها بالطريقه اللي نريد نفهمها.. يعني اذا تبي تفهمها صح تقدر و اذا تبي تفهمها غلط بعد تقدر..

اللي اشوفه ان هم قاعدين يمثلون اشيا تصير فالواقع... يعني نحن نتهرب من واقعنا؟؟؟
اما بالنسبه للبنات العاريات ... في ذمتكم في قناه(باستثناء الاسلاميه) ما تعرف هالبنات و فيه مسلسل اتابعونه ما فيه بنات عاريات؟؟؟ (هذا هو الاعلام) و اي واحد دارس اعلام بيفهم قصدي....
و اذا شوي بالغو فالتعبير عن شي هذا عشان يشدون انتباه المشاهد...

و ما اضن هذا فيه تشويه لسمعة احد بالعكس لان محد يتابعه غيرنا نحن الخليجيين و نحن ما نشوف شي ما نعرفه (هذا واقعنا) نسوي الغلط و يوم يكلمونا فيه نزعل؟؟؟ "انا ما أعم ولكن في فئه من المجتمع الخليجي هم اللي يتكلمون عنهم طاش ما طاش...
"مثال":
حلقه كانت تتكلم عن البنت اللي ركبت سياره غلط و تحسبها سيارتهم و بعدين اخوانها افتكرو انها شارده مع واحد و كل واحد تم يذمها ويقول انها سودت وجيهم.... و ابوها تم يدافع عنها و هم روسهم يابسه (ضالمين البنت) لين ابوهم مات بسبتهم و بسبة ضنهم الاسود فاختهم"ارتفع عنده الضغظ".....

هالاشيا تصير فالواقع و في وايد اخوان يضلمون خواتهم قبل ما يفهمون الموضوع... "طاش ما طاش ماجابو شي من عندهم!!!"


و اذا بتتكلمون عن تشويه السمعه هذا يعني ان مافي مسلسل خليجي ما بنعيبه لانه كله يتكلم عن اسرار البيوت و فضايح العالم لا و مرات ما يلقون حل بس يعلقونا لي نهاية المسلسل وبدون عبره اخر شي نكتشف انهم يسوون دعايه على نفخ الشفايف ولا جلابيات و ثياب... (خلوها على الله)

و السموحه منكم عالتقصير
و لا يضايقكم ردي ترا فالنهايه تبقى وجهة نظر و كل واحد له نضرته ورايه اللي ممكن يكون صح و ممكن غلط...

(صلو عالنبي)