اشكركم على طرح هذا الموضوع المهم بالنسبه لي. لاني ان شاء الله ناوي اشتري سياره دفع رباعي بس بشرط تكون ياباني (نيسان او تويوتا)
بصراحه انا مجرب تويوتا علشان كذا مرتاح لها من ناحيه التحمل وتوفر قطع الغيار والصيانه المتوفره عند كل ميكانيكي.
المهم لما بديت اختار بين السيارتين برادو وباثفندر. كانت عندي نقاط مهمه وشرط اساسي في اختيار السياره المناسبه لي.
1- الجوده (المتانه, التحمل, القوه)
2- السعر
3- الراحه
بالنسبه لبرادو انا اتفق معاكم بأنها سياره تتحمل جميع الظروف والطرق وايضا سياره ذات جوده جيده ولكن للاسف ليست ممتازه والسبب هو عبداللطيف واكسسواراته المغشوشه, لما سالت احد الاخوان قالي كل الاكسسوارات الي انت شايفها كلها صينيه ممكن تجلس معاك حق سنه او سنتين وبعدين الله يعينك لازم تصلحها هذا اذا كانت تصلح اساسا. انا ماني فاهم ليش عبداللطيف دائما يبي يحشر نفسه في كل شئ ليش مايجيب السياره زي ماصنعوها؟! ((انا سمعت والله اعلم ان عبداللطيف عنده شركات في كذا بلد تصنع الاكسسوارات علشان كذا هو يبي يكسب منها)) غير متأكد
بالنسبه للسعر الفل ابشن والله والله حراااااام فيها 190 الف ريال من جد. سياره ب 190 الف ريال علشان اكسسوارات وياليتها اكسسوارات اصليه. ايش ابغى من 5 كاميرات في السياره كامرتين خلفيه وثنتين عند المرايات وكاميرا اماميه؟! ههههه
والله من جد شئ عجيب... ياليت تقولوا لي ايش الفايده من الكاميرات هذه وهل الكاميرات تشتغل اثناء القياده ولا لزم اوقف علشان تشتغل؟
انا لو معي المبلغ هذا كان مافكرت لا في برادو ولا في عبداللطيف اساسا. يازين الباترول
اه اه يالكامري .... من جد اول ماركبت البرادو تذكت مقاعد الكامري حقتي وكيف كنت اعاني منها. اعتقد ان اول شئ و اهم شئ في الراحه هي المقاعد ولكن للاسف مقاعد البرادو ضيقه ولا يوجد فيها اي مقومات الراحه يابو 190 الف
اما الي يقول ان تويوتا شيك.. فهذا للاسف اعتقاد توارثناه ابا عن جد.. اعتقاد خاطء في الزمن هذا. مع تنوع السيارات والمنافسه بينها
اما الباثفندر. صحيح انا كنت خايف من شركه نيسان عموما. لاني كانت عندي فكره عن نيسان من زمان ان مكينتها تخبط والسياره تهربد.
بس بعد ماسألت ناس قالولي ان الكلام هذا كان من زمان اما الان خلاص اصبحت نيسان افضل والدليل الجوائز الي حصلت عليها خاصه في موضوع المكينه. ياليت احد يفيدنا في الموضوع هذا؟
اما من ناحيه السعر انا اشوف ان الباث اهون من البرادو ياخي الفل ابشن ب 145000 ريال وبعدين ممكن تاخذ اقل من الفل ب 126000 ريال الي هو SE2 وفيها ملاحه وجهاز DVD اللهم الفرق بينا وبين الفل ابشن هو الجلد وفتحت السقف.
صحيح ان الباث اقل من البرادو في المواصفات, بس انا ايش ابغى من المواصفات الي كلها صينيه ولا تايلنديه ولا حتى اندونيسيه.... انا ابي سياره زي ماخلقوها. لا خمس كاميرات ولا يحزنون.....
اما من ناحيه الراحه ومن غير مجامله الباث اريح واشيك من الداخل خاصه المقاعد.
خلفيه الباث مو قد كذا ولكن في ناس تفضل شكلها عامةً
هذا كل مالدي... وخلاصه كلامي انا ارشح الباثفندر
والسلام عليكم,,,
