مشكلتي مع اللومينا

السلام عليكم ورحمه الله وبركاته

بقول لكم مشكلتي مع سيارتي لومينا 2001 واتمنى الحل لها

مشكلة بالاول من زمااان كان السيارة احيانا لاجيت اشغل ها تلعلع بس ماتشتغل وكانت ناااادر تجيني هالحركة

وفي الاونه الاخير زارد وكل ماطفيت السيارة واجي اشغلها على نفس الموال ماتشتغل الا بطلعه الروح

لاكن اذا السيارة باردة وشغلتها الصبح تشتغل زي الحلاة على طول اما اذا رحت مشوار لازم تطفي مع انها حرارتها تحت النص وطبيعية


وديتها للورشة قالوا طرمبه البنزين غيرتها 650 ريال واشتغلت ولما جاء اليوم الثاني طفت رجعتها له قالي فحص كمبيوتر طبعا ما احب شي اسمه فحص وما فحصتها

طلعت من عنده ولما وصلت البيت واجي بشغلها نفس الموال جاني اخوي واجلس اشغل السيارة وهي ماتشتغل يشوف شرار من عند سلك السف قالي خلهم يشدون عليه


رحت للعامل اشد عليه وبرضوا ما اشتغلت قلت له افحص لي الفيوز وفحص لي الفيوز اللي عند الدركسون ولقا واحد خربان :bigggrin: وغيره وحط له من الاحتياطي >> نرجع لها سالفه الاحتياطي


اشتغلت السيارة على طول ما امداني اوصل الاشارة الاولى الا والمكينه ترج والسيارة كانه فيها تقطيع والعزم باااااااااااارد مرا يادوب وصلت البيت واهي ترج المكينه

جيت بوديها اليوم الثاني السيارة ماتشتغل ابد حتى لو اخليها مثل قبل ساعه ولا ساعتين ثم تشتغل اللحين مافي امل تشتغل اخذتها بسطحه ووديتها للورشه

قالي الكهربائي مشكلتك من المفتاح غيرت المفتاح ونفس المشكلة قالي خلي الميكانيكي يفحصها


فحصها الميكانيكي ولقا مشكلتها من حساس عند المكينه ما ادري وش اسمه غيرته واشتغلت السيارة وقالي افحصها دامها شغاله

فحصتها طلعت 6 مشاكل طبعا خط البنقالي مو واضح بس بكتبها لكم
1- حساس عمود كرانك
2- ساجه كويل
3- بلف هواء مكينه سرعة
4- تنسيم هواء ثلاجة
5- بو لينا ضغط جير + فيش >> طبعا ماعرفت اقراها هذي :bigggrin:
6- حساس منظم الهواء


ولما طلعت من عنده ووصلت البيت اشتغلت طفت علي بالخط اشغلها تشتغل بس ما اهدي بالسيارة عند اي لفه او مطب الا وتطفي على طول والسيارة فيها تقطيع


السيارة دفعت فيها 1500 واكثر وللحين ماصلحت اتمنى تساعدوني


صح نسيت بخصوص الفيوز الاحتياطي انا كاني شفته ما اخذ من الاحتياطي وما ركزت فيه زين وهو يقول ماخذ من الاحتياطي وما ابي احطها بذمتي


اتمنى تساعدوني بحلها ومعليش على طول الموضوع