السلام عليكم و رحمة الله و بركاته
يا شباب أخص بذلك أهل التجربة
تحملت الكثير ولما جاءت الفرصة لأنتهي من فك رباطي بهالمشكلة ظهرت مشكلة لم تخطر ببالي
أنا شريت سيارة عن طريق تمويل الراجحي لتأجير السيارات
رحت للوكالة و أنا مبسوط عشان بأشتري أول سيارة لمشوار حياتي و أكون أنا أول من يركبها و يدوس بنزينها
المهم أخذت التسعيرة و للبنك و بعد ثلاثة أيام استلمت المفتاح و أجلت القسط الأول لثلاثة شهور
لكن يا فرحة ما تمت
كملت شهر و 10 أيام و أنا راجع للبيت و زوجتي معي في خط سريع
فجأة سيارتين قدامي هدو السرعة
السيارة الأولى راحت يمين و الثانية لحقتها بالقوة و أنا حاصرني جمس و أنوفا على يميني فما كان مني إلا أمسك فرامل و لفيت يمين حتى تنطلق السيارتين اللي جنبي و أجي مكانها
تدرون من اللي وسوي هالفوظى كلها
شايب يسوق باص يبغى ياخذ فوق تحت أو يو تيرن
اليوترن هذا ماهو رسمي (الرصيف اللي بين المارين ماهو مكتمل يعني فيه فراغ بسيط)
و أنتم تدرون إن الخطوط السريعة اليترن الرسمي فيها
يضيق الرصيف للي بياخذ يوترن يعني في سعة للي بياخذ اللفة
المهم كان الرصيف مكسور
قام صاحب الباص يوقف ثلثين من سيارته في الخط السريع و الثالث الأمامي داخل الرصيف المكسور
طبعا الوقت ليل
المهم
صدمت فيه بسيارتين و أنا ماني مستوعب أي شي
قمت أشوف زوجتي
الحمدلله اصابة خفيفة و وأنا بعض الكدمات في الرأس و ساعد اليد
جا أخوها ودها الطوارئ
وأنا قعدت أنتظر المرور و أتأمل بسيارتي إللي فرحت فيها و الحين هي قدامي واقفة
المهم
جا المرور,, و أفادني إن الخطأ على صاحب الباص 100% بسبب إن الباص أخذ يو ترن غير رسمي وهو سبب الحادث
و الناس اللي كانوا حولي قالو لا تخاف إنت ماخذها أجار تمليك و البنك مأمن عليها لا تخاف
موظف المرور قال لي تجيني يوم الأحد نخلص الاجراءات
جيت يوم الأحد كل شي صار مقلو و معكوس
الموظف غير النسبة و قلبها علي 100% و يقول إن صاحب الباص كان ماشي و أنت صدمته من ورى ولا أخذ يوترن ولا شي (بصراحة حسيت إني في قاعد أحلم وطلبت الأوراق عشان أقراها)
ليش الموظف سوى كذا
لأن الشايب الاستمارة عنده منتهية ولا عنده تأمين ولا يقدر يدفع للتأمين قيمة اصلاح السيارة الموظف عاطفته جياشة
صحيح إنه يبغى يرحم الشايب بس مو معناه إني أتحمل أي شي بسبب عاطفة أو رأفة
طيب أنا وش ذنبي,, حاولت أقول شي,, بس وش أقول هذي أوراق رسمية مو لعبة
قلت له في ذمتك,, قال كل شي واضح
والله العظيم إن الشايب أخذ اللفة و على عيون الشهود بس وين الشهود
هم بس كانو موجودين وقت الحادث
قلت للموظف أبي تخطيط للحادث قال انتظر اسبوعين,, ولا رح تستفيد شي
وانتم عارفين التأمين بعد 15 يوم من الحادث ما يقبل الأوراق
شوي يجيني واحد, و قال لي وش فيك قلت له يابن الحلال صار معي كذا كذا و شرحت له
قال الخطأ على الباص 100% بس الكروكي يقول إنك صادمه من ورى ولا أخذ يوترن ولا فوق تحت
قلت حسبي الله و نعم الوكيل
قال لا تخاف التأمين بيدفع تصليح السيارة إن كانت تالفة البنك بيعطيك حقك
هو بكلامه هذا طمني شوي
جمع الأوراق و المتطلبات اللي طالبها التأمين
من تسعيرات و قيمة إصلاح وطلع مبلغ الاصلاح 80,000 و قيمة السيارة 118,000
يعني تالفة السيارة
أرسلت الأوراق عن طريق أرامكس لتكافل الراجحي
وكل يوم أتصل يقولون ما وصلنا شي ما وصلنا شي استمر الحال 3 أسابيع
بعدها نسيبي طلع للرياض وما قصر كلم الموظف و الموظف تعاون و طلعت الأوراق و دخلت النظام أخيراً
وبعد شهر و اسبوع تم اصدار الشيك,, و بعدها بـأسبوعين تم سحب السيارة
وكل خطوة تصير انتظر عشان أخلص و أشوف لي سيارة و كنت أفضل أن أختار نفسها
بعد ما سحبو السيارة دفعو الشيك للبنك
بعدها قلت في نفسي انتهى الموضوع
وبعد كم يوم بأروح أشتري نفس السيارة
ولما جيت أشيك على حسابي في الراجحي
تدرون وش اللي شفت,,
أنا كنت منتظر المقدم يرجع عشان يساعدني في الضغط المادي اللي صار لي بعد الحادث
لأني استأجرت سيارة بقيمة 95 ريال يوميا و يا ليتاه تستاهل حتى 70
المهم وش ظنكم شفت بحسابي
شفت الرصيد
أكثر من سالب 40,000
ليه و بأي حق,, أنا بدون سيارة
اتصلت على البنك
قال الموظف:
أول شي التأمين ما دفع قيمة السيارة كاملة
ثاني شي نسبة الخطأ عندك 100%
أول ما قال نسبة الخطأ
تذكرت وش اللي صار بالمرور
الأسئلة اللي تخطر ببالي
هل التأمين غير مجبر على دفع قيمة السيارة إن كانت تالفة؟
هل نسبة الخطأ لها علاقة بـ السالب 40,000؟
هل إن كانت نسبة الخطأ عندي 0% فليس هناك مستحق؟
و السؤال الأهم::
من يضمن نفسه ما يصدم سواء 100% أو 0%؟
كلمت التأمين
قال لي: تم خصم 20% من قيمة السيار استخدام سنة قلت أنا ما كملت شهرين
قال تم احتساب قسطين و 2000 ريال تحمل خطأ و الباقي دفعناه للبنك
كلمت البنك
قال لي: نسبة الخطأ100% عليك و التأمين ما دفع المبلغ كامل إذا أنت غير راضي ارسل فاكس
أحس إني أستلف 40000 و أرميها,,, الحمدللـــــــــــه
أقسى ما واجهت:
باص يبي يآخذ يوترن غير رسمي
موظف مرور يقلب النسبة لصالح الباص
دفعت مبالغ في اصدار فواتير التسعيرة و قيمة الاصلاح
انتظرت 3 أسابيع و تكافل الراجحي ينفي وصول الأوراق حقة الحادث
انتظرت شهر التأمين يدرس موضوع سيارتك
انتظر 3 أسابيع ليتم سحب السيارة
تفاجأت بوجود مبلغ بالسالب يفوق الـ 40,000 ريال
ومدري وش بيصير بكرة
