السلام عليكم ورحمة الله وبركاتة
ياشباب الموضوع مهم جداً لملاك كرايسلر ودوج.
أنا أمتلك سيارة كرايسلر 300 سي هيمي موديل 2012م والسيارة مشتراه من الوكالة جديدة على وقتها والسيارة ممشاها قليل جداً تقريباً 46 ألف كيلو متر. الموضوع يا أخواني السيارة قبل لا تخرج من الضمان كان فيها صوت ووممشاها تقريباً 27 ألف في الديركسون وثقل دخلتها الوكالة وطلعتها وقالو صلحنا المشكلة طبعاً المشكلة رجعت مثل ماكانت وكان معاي سيارة ثانية ولا أستخدم السيارة كثير المهم طلعت السيارة بعدها بكم شهر من الضمان وأدخلتها للوكالة بسبب نفس الصوت طبعا طلعو تقرير أنه السيارة يبي لها تغيير دودة الديركسون ومقصات وراح تكلف 7 الاف وحاجة :c0038: طبعاً أنا أنصدمت من المشكلة دودة ديركسون يعني مقصات ماعندي مشكلة شيء إستهلاكي لاكن دودة ديركسون قوية شوي وكان رد الموظف أنها إلكترونية وشيء طبيعي.
المهم أنا ما أقتنعت من كلامه وكان يحاول يقنعني أني أصلحها عندهم ورفضت قلت طلع السيارة. طلعت السيارة ومريت محطة بترومين لغيار الزيت وقلت للعامل وريني وين علبة زيت الديركسيون قالي مافيه هذي إلكترونيك. قلت غريبه اللي أنا أعرفه أنه فيه أشياء مثل الماكينة والقير والديفرينس والديركسيون كلها ماتعمل اللى بزيت أكيد فيه مشكلة.
المهم يأست من الموضوع قلت خلاص أمري إلى الله بصلح السيارة لاكن خليني أدخل السيارة للصيانة السريعة أغير زيتها قبل لا أدخلها لصانة الوكالة الداخليه. أدخلت السيارة للوكالة الصيانة السريعة وقلت للعامل أبغى أسوي صيانة 50 آلف وأبغاه يشيك لي على المقصات هل يوجد مشكلة فيها أو لا إستحياط لما خلص غيار الزيوت قالي المقصات كويسة وماتحتاج تغيير فأستغربت قلت ليه كاتبين بالتقرير أنها تحتاج تغيير مقصات. ماأزود عليكم كان فيه واحد سعودي مثلي جالس ينتظر سيارته ودار بيني وبينه الحديث وعن قوة ومتانة السيارة لاكن الوكيل سيء وحرامي وأحط في ذمتي الكلام هذا لأني ماشفت أحد يمدح بالوكيل المهم ضحك وقالي أكيد قالو لك لازم تدفع تقريبا 8 الاف قلت أيه قالي نصابين صار ت له نفس المشكلة وحلها بسيط قلت بالله أيش.
قال الحل ياحبيبي لازم تعبي زيت ديكسون قلت مافيه قال لا فيه قلت وين قال مكانها خلف الصدام الأمامي جهة الراكب خلف الكشافات الآنوار قلت معقولة قال نعم لاكن لازم تخذ زيت الوكالة لا تعبي أي زيت ثاني.
الطريقة تشتري زيت علبة ديركسون تروح لأي مشحمة تقوله يفك الكفر الأمامي جهة الراكب بعد مايفك الكفر تقوله فك الكلبسات اللي خلف الكشافات بشوي شوي على شان مايخدش لك لون الصدام تشوف العلبه موجودة داخل شوي على اليسار تخلي العامل يعبي لك وبأذن الله يروح الصوت والمبلغ كله ماكلفني 150 ريال مع قيمة العلبة طبعاً لو كاسرته ماتكلفك 100 ريال بعد.
ملاحظة لمى شيكت على فواتير الصيانة من أول ماشريت السيارة ماشيكو على زيت الديريكسون لحد الأن ولا عمري شفتهم يفتحون المكان هذا.
أرجو إن الموضوع هذا يفيد الناس اللي عندهم نفس المشكلة وأنا أجزم 100٪ أن الوكالة تتعمد الشيء هذا على شان تخرب عليك الدودة وشيء طبيعي راح تخرب مادام ماتعبء زيت.
