السلام عليكم ورحمة الله وبركاته:
فكرت بسيارة دفع رباعي قبل سنة يعني في 2004 وكنت من قبل اقلب صفحات مجلات السيارات ومواقعها في النت ،
احترت كثير :confused: لكن في النهاية جا الفرج وكان من نصيبي هذا الباجيرو موديل 2004 اتوماتيك 190 حصان
وانا جديد على الجيوب اخذته طال عمر اللي يقرون ويسمعون وطلعت اطعس فيه طبعا بعد التمرين وبعد مامرت شهور
كثيرة ، المهم من اول تطعيسة واغرز ويطلع ويغرز حتى والله اني تفشلت قدام الناس وصادني احراج كبير سيارة
مشهورة وبـ 90,000 الف وتغرز ، ومرة معي زوجتى رايح هافمون مسوي نفسي سواق بران كان اطعس شوي
وتغرز وقت المغرب ويافشلتي فشيلة ، المهم جلست فترة طويلة احفر وانتع السيارة قدام ورا وهي محلها ماتبغى
تتحرك ، تصدقون اول مابديت اغرز قالت لي المرة الله يحفظها ويحفظ اهلكم جميع .. عاد قولوا آمين :( قالت ارجع
ريوس للخلف قبل ماتغطس السيارة لكن انا ركبت راسي وسويت فيها ابو عرام ، لان الباجيرو فعلا يمتاز بقوة رهيبة
في الطلوع من الطعس بالخلف وصارت معي حالات كثيرة ونفعت معي هذي الطريقة والحمدلله . المهم الموتر غطس لين
تعلق والمكان اللي غرزت فيها ماتوصله الجيوب بسهولة مع اني كنت حول الناس وقريبين مني بشكل كبير لكن الكل
الظاهر ما يبغى يغامر .. ملحوظة ( ترى انا اطعس عادي يعنيى بشكل معقول مش ارقى مثل الشباب اللي يغامرون)
جلست نص ساعة احول يمين شمال اوخر الرمل ولكن لافائدة ، جو بعض الشباب على الدبابات وحاولو يساعدون جزاهم
الله خير وماقدروا وراحو .. وشوي اشوف ذاك اليوكون معه عايلة واشر له ويجي بس ماقدر يوصل سيارتي الابعد خمس
او ست محاولات لان الرمل كان كثيف والسيارة ماتمسك فيه . الرجال جزاه الله خير نتع السيارة بسلك السحب اللي
معي والحمدلله طلعت . واخذ اهلي وارجع بيتنا . وكلي تراب وحالتي حالة .
وفي يوم من الايام مريت بيت الوالد الله يحفظه ويحفظ آبائكم .. قولوا آمين .. اخذت الوالد والوالده ومعانا الشاي
والقهوة والتمر والذي منه وطلعتهم طريق المطار ورحنا جلسنا جلسة عصرية حلوة تحت ظل شجرة ، وكانوا فرحانين
بالمرة ، المهم جاء وقت المغرب اذنت وصليت مع الوالد ، وبعد الصلاة بخمس دقايق اسمع واحد يصوت من بعيد ، قرب
من عندنا وكان يمشي على رجوله ، قلت للوالد بروح اشوف وش يبغى انتظروني ، المهم طبعا انا رايح لعنده واقرأ الا
ذكار الشرعية طبعا ماتعرف من تواجه , الله يحفظ الجميع المهم وصلت وسلمت ورد السلام ، قالي ياخوي سيارتي غرزت
قريب الخط وهي سيارة ارامكو ونيت قطع 10 وطبعا لو عرفوا ارامكو انه استخدمها للتنزه وغرز راح يصير سين وجيم .
المهم سيارته قريب الخط بعيدة ماتنشاف والجو بدى يظلم ، قلت له بعد عشر دقايق احنا ماشين وخلك مشغل لمبات
الخطر عشان نشوفك واخذت رقم جواله ، قال طيب وراح ، جلست مع اهلي عشر دقايق ، وقمنا كلنا ولما قربنا الطريق
كلمته عشان يحدد مكانه ونساعده ، وشفناه وكان الوالد معصب جدا ( الوالد كان موظف ارامكو سابقا ) لانه يعرف انه
تجاوز انظمة ارامكو واخذ السيارة للبر وعشان كذا الوالد الله يصلحه قام يسب في الرجال هذا مايستحي عيب عليه
سيارة الشركة لو هو رجال ماسوى .. مافعل .. ماقال .. تعرفون الشياب عصبيين بس حبيبيين ، المهم وانا اقوله
يابويه حرام عليك ترى يمكن نغرز مثله والرجال عياله يستنونه .. الرجال مسكين .. المهم شوي والا سيارتنا الباجيرو
الحبوبة تغرز :D اهلا :D اهلا :D اهلا وكنا طبعا قريبين من الرجال صاحبنا راعي ارامكو ويجي المسكين يساعدني
اطلع سيارتي ونجلس بالرافع وندفن شوي ونحفر شوي وجلسنا حوالي ساعتين طلعنا الفرشة برا وخليت الوالد والوالدة
يجلسون وقلت لهم استفروا الله وقولوا لاحول ولا قوة الابالله ، الوالد كسر خاطر حس انه كان غلطان والرجال راعي
ارامكو يعتذر للوالد ويقوله سامحنى ياعم عطلتكم سامحيني يايمة , الموقف كان مؤثر المهم بذلنا محاولات مضنية عشان
نطلع السيارة وقالي الوالد كلم امن الطرق ، قلت له بنحاول خمس دقايق اذا ماطلعت بنكلمهم .. تعرفون ليه ماكلمت انا او
الرجال امن الطرق ( لان امن الطرق راح يسوي تقرير ويرسله لارامكو ) وهذا امر طبيعي والرجال بعدين بيتبهذل ..
شوي يدق جوالي واكلم يطلع اخوي يقول وش فيكم اتأخرتم ، قلت له ياشيخ الجو رهيب وابوي وامي مبسوطين
نص ساعة ولا ساعة ونجيكم .. مايدري خبرك باللي احنا فيه حالتنا حالة.
المهم رفعنا السيارة عن طريق مكان القلص ودفنا الرمل تحت الكفر وجلست انتع السيارة مرة في الدي قدام ومرة في
الآر الخلف مع ذكر الله والاستغفار وتطلع الباجيرو بفضل الله وتهدأ اعصاب الوالد وصارت فرحة كبيرة للجميع طبعا
حمدنا ربنا وشكرناه ، ورحنا لسيارة الرجال وكانت معلقة من كثر ماحفرت وسحبناها وودعنا بعض ومشينا بهدوء كلا
في طريقه ، لكن بعد هذي الحادثة صارت عندي بفضل الله خبرة كبيرة جدا استفدت كيف اتجنب التغريز ومتى انسم
الكفرات وعلى كم انسمها واذا غرزت كيف احاول اخرجها باسرع واسهل الطرق وبعد هذه الحادثة اشتريت رافعه هوائية
تشبكها في الشكمان وترفع الجيب وطلع من اي تغريز ، الباجيرو اللي عندي مافيه قفل دفرنش الهزاز وهذا ساعدني
اني اكتسب خبرة اكبر من لوكان الهزاز موجود .
المهم صرت اطلع لوحدي البر واكون حول الناس ولكن مثل ماقلت لكم ما ارقى الطعوس الكبيرة حرصا على سلامتي
وسلامة عائلتي وسلامة الباجيرو . الحمدلله بعد هذي الحادثة ما غرزت ابد .. الخبرة لها دور .
تصدقون انا خفت على الجير الاوتوماتيك من كثر مانتعت السيارة للامام والخلف بسرعة كبيرة ، تعاملت مع السيارة
كأنها جير عادية ، لكن الحق يقال والله السيارة جودتها عالية ، والوكيل جودته رديئة.
تحياتي لكم . |3|
