فيه كلمات كثير لافكرت فيها تعرف انها خطأ او نطقها غلط لكننا تعودنا عليها او مانبغى نغيرها او نتعب انفسنا بالتفكير مثل كثير اشياء في حياتنا..لكن انا قاهرتني كلمة من اول ماطلعت(انا) للدنيا وللحين وهي متداوله حتى انك تلاقيها في الاعلانات وهي:
فل كامل!!!..يعني كامل كامل!؟لول كبير, لأن ترجمة فل(full)يعني كامل (غباء او جهل؟)..وهذا الي طلعها مايبي يقول (كاملة المواصفات) او (فل ابشن) لأ الأخ مسوي مكس بين اللغتين لكن بطريقة غبيه..ليته قال (فل مواصفات) او (اوبشن كامل) -كان طلعنا مثل الي يرمي بكلامه كم كلمة انقليش يعنني مثقف- كان اهون ولها على الاقل معنى.
عاد باقي الكلمات الي جت على بالي مقبوله اذا تذكرنا (شاطر ومشطور وبينهما لحم) على الاقل هي من ناس عاديين وهي:
وانيت: وتفسيرها حسب ماكتب عبدالعزيز الذكير(كاتب بجريدة الرياض).. ون ايت (1,8) او الف وثمانميه وهي سعة المكينه حقت (الوانيت) وعلى ما اذكر من المقال ان حقين ارامكو كان يسمونه كذا نسبة للمكينه يعني بدال مايقول رح جب او سق الدقسن اوالعراوي او على الاقل ابو الف وثمانميه يقول:جب الـ ون ايت=ونيت!
الا على فكره وش معنى (عراوي)؟ يمكن علشان في حوضه اكثر من عروه علشان تربيط الشراع؟! يمكن
جمس: وهي تشبيك لثلاثة حروف هي اصلا اختصار لشركة جنرال موتورز(G.M.C)..وحتى الآن اذا طلعت انواع جديده لهذي الشركة تلاقي بعض الناس يقول انها الجميح!!!؟؟؟هههههه وكابريس من شفروليه! يعني هذي الشركه(جمس) بس تصنع الصالون-سوبربان-وتصير لخبطه وتحاول تفهمهم بس تخاف يقولون عنك الناس متكبر عليهم اومسوي فاهم والأفضل انك اذا بترضيهم لا بغيت تشتري صني تقول ابشتري الحمراني؟؟؟
وعلى طاري تشبيك الحروف وعلى ايام الكرسيدا(جي ال اكس) تلاقي بعض الناس يسميها جالاكسي! ليه؟يقول اختصار!!؟؟ ومثلها فاكس(في اكس ار)
وتلاحظ اني كتبت كرسيدا وماهو كريسيدا مع انه هو النطق الصحيح وهذا اختلاف لهجات ما اعتقد ان بوه مانع مثل مرندا بدل ميريندا او مثل العنقرينز اذا نطقوا اسامينا (حتى بعض الحروف مهيب عندهم خلقه مثل خ,ض وغيرها)
الا صالون منين جا؟ صالون جلوس؟ليه ماسميناه مجلس او مقلط بدال هالكلمة الاجنبيه؟ ليه مانسمي الفان مجلس افرنجي واذا شلنا المراتب نسميه مجلس عربي؟!
سياحي: شكل الي طلعها راعي سفريات وشكل الي طلع (فل كامل) ولد نعمه لأنه مافكر بالأنواع الاقل(نصف فل ههههه يعني نصف كامل-رجعنا لهالكلمه قلت لكم انها تقهر) اقول ماطلع كلمه للأنواع الاقل-الله يهديه-وجا واحد غيره وطلع لنا كلمة سياحي؟! مانقدر نقول اقل نوع؟ وسط؟
الألوان: واتذكر اقول لواحد سيارتك رصاصيه يقول لا فيراني؟؟؟ مادري منين جت هالتسميه من( الفار)؟ تدليع للرمادي او الرصاصي؟ والحين اطالع في اعلانات السيارات (لون كبدي)؟؟؟ راعيها جزار؟ عاد نحاسي مثل فضي وذهبي لكن كبدي؟ شكل قصده عنابي بس يمكن مستحي لأن
هاللون (دقه قديمه)-تذكرت طاش والأختلاف بين (كستنائي) و (تركواز)!
الأنواع: مادري منين طلع لنا نوع اسمه (فرخ شبح)؟؟!! واعتقد قصده مرسيدس فئة سي او اي(ابو عيون هههههه)..يعني بدال مانقول كورولا
نقول فرخ كرسيدا اوكراون او بدال صني نقول فرخ سيدريك او ماكسيما؟! ههههههه
تذكرت نوع قديم من المازدا كانوا يسمونه بقره؟؟!! مادري وش سبب التسميه لكني في هذاك الوقت بديت احس ان شكلها من جنب كأنها بقره(متأثر)
الفـشـيـلـه: سياره حلوه وفخمة مثل مرسيدس بنز نسميها على دواء جنسي ونزعل ليه الغرب يقولون عنا اننا مانفكر الا بالجنس!!!؟؟؟
يعني شبح حلو لكن فياجرا ؟؟؟
اجل انا اطالب ومن تحت قبة هذا المنتدى بأن نسمي لكزس سيالس وبي ام دبليو سنافي(وكلها ادويه مثل فياجرا)
وعلى طاري البي ام دبليو بعض الناس يسمون الفئة السابعه (حوت) اجل ليه ماسمينا الماكسيما موديل(2000) دولفين لأن اصلا تصميمها مشتق
منه؟! والجالانت=صقر مدري نسر!؟
كثرة بربره وخرط شبه فاضي وبالأخير هم يصنعون وحنا نشتري..والله المستعان
