تجربة مفصلة للأف جي كروزر 2009 مع رحلة إلى (ملهم)

بسم الله الرحمن الرحيم

السلام عليكم ورحمة الله وبركاته

تجربة مفصلة للأف جي كروزر 2009 مع رحلة إلى (ملهم)

كيف حالكم شباب عساكم بخير

أولا أحب أقدم لكم كل أعتذاري الشديد لتأخر الموضوع أكثر من اللزوم والسبب يعود لمشاكل واجهتها في اللابتوب حيث طار شغلي يوم خلصت حول 75% بدون ما أسجله ولا كنت متوقع أن تصادفني مشكلة وأنا أسويه طار شغلي كله يعلق علي الجهاز ثم يغلق كل شيء وقفلت معي وتركته ثم رجعت له ثم صارت مشاكل معي بالويندوز والأكسبلور (غير سرعة النت الي سوت لي مشكلة في رفع الملفات) وفرمت الكمبيوتر مرتين علشان أحل المشكلة غير أن الموضوع أخذ مني وقت من ناحية أني أبيه أكتبه بشكل مفصل ومن ناحية ترتيب الصور وغيره ومالكم بالطويلة
والمعذرة مرة أخرى

المهم نجي لموضوعنا

هذي تجربتي المفصلة للأف جي كروزر أبيض لؤلؤي بقراطيس الوكالة!!! طبعا ما كان فيها أي ترتيب يعني جت الأمور فجئة حيث الصبر والملل قتلني وأخذت أف جي كروزر سعودي سياحي! وكان لقطة بقوة بنسبة لي (أقصد فرصة) وطبعا ضبطت كل أموري الضرورية لأخذه واخذته قلت ما يبيلها جلوس في البيت خلني وأوسع صدري بدال الملل الي ذبحني أجازة العيد وجالس في البيت! ابطت وقمت وسويت رحلة بسيطة أول شيء إلى ديرتي ملهم التابعة لمحافظة حريملاء (تبعد ملهم عن الرياض شمالاً 71 كيلو فقط) أخذت السيارة أنا وواحد من الشباب ورحنا ندور فيها شوي وكانت رجلي حارة جدا على السيارة ثم قالي زميلي ورى ما تشغل الراديو وقام شغله بدون ما ياخذ موافقتي وأول ما شغله أول كلمة نطق بيها الراديو هي (ياخي أرحم سيارتك) والله أني فقعت ضحك وصكرت الراديو بغيت أجيب العيد بعد من قوة الضحك والله موقف من جد في الصميم

المواصفات الي أخذته رغم أنها غريبة على السيارة بس هذا الي خلاني أوافق على أخذها:
(سياحي 2009 السعودي تطور يمكن نوع خاص مثلا نص فل مش متأكد)
كاميرا خلفية
نظام منع الأنزلاق
مثبت سرعة
تحكم بالأستريو عن طريق المقود
البوصلة ودرجة الميلان وشاشة درجة الحرارة الخارجية
المسجل الفل 6 سيديات MP3,WMA
ريموت كنترول
جنوط 16 ألمنيوم
سوب ويفر
المرايا الوسطى بخاصية التعتيم
حساسات خلفية (العدد أثنان)
ايرباقين
الدبة الرياضية(سمعت كم واحد يقولون السياحي يجي بدبة عادية يعني ما يعطي الصوت الرياضي عاد هذا باليحيى ما ادري عن نظام السعودي)

كان ينقص السيارة عن الفل كامل التراكشن كنترول والدفلوك والايرباقات الجانبية ونظام VSC حق نظام الثبات في المنعطفات ونظام (RSCA OFF) وهو حسب ما فهمت نظام لفصل الأيرباقات متوفر في 2009 فقط وهذي معلومات جبتها من كتلوج الأنجليزي الأمريكي للأف جي كروزر بملف PDF

ولا الباقي زي الفل

وإليكم برنامج طلعتي بالتفصيل

كانت التجربة عن
(مدن, خط, تطعيس, دريفت!, كل شيء أن شاء الله)

وهذا برنامج الرحلة
أول شيء دقيت على أخوياي وقلت لهم ترى معي السيارة الفلانية وبروح الحين لمزرعتنا بالديرة فجو معي وطلعنا من الرياض حول الساعة 12 الليل ومع طريق صلبوخ للديرة وعلى الفاصل! كنت أبي أجرب قوة السيارة في الطبلون ثم وصلت للمزرعة والحمد الله على السلامة وكان فكرتي أن ننوم بدري ثم نقوم الصبح حول الساعة 9 نتمشى في الديرة ثم نروح لبحيرة الي بعد حريملاء لكن سواليف وجالسين على اللابتوب حتى واحد قالي بصراحة المزرعة حلوة بس ليش مافيها وايرليس قلت سلامات الأخ داخل مقهى قهوة ودونات تبي نت حتى هنا أقول أنثبر لا أفقع وجهك وطولنا ما نمنا بدري علشان بعضنا نام بعد الفجر ثم قمنا حول الساعة 11 الصبح! خلاص مافي وقت لأن كان عندنا برنامج أننا نروح للطعوس نطعس

سوينا فطورنا عاد فطورنا شوي حركات سندويش توست جبن محمص

صور للأف جي وهو بالمزرعة

فرحنا نتمشى شوي في الديرة ورحنا لم سد ملهم وماشاء الله لازال فيه ماء بعد الأمطار والخيرات الي جت في بداية ذو القعدة وهذي صور السد

بعد ما أخذنا صور للسد قررنا نرقى فوق الجبال علشان ناخذ كم صورة للسد ومزارع ملهم وكان فيه طلعة سهلة بعض الشيء حبيت أصورها لكم وأنا ارقاها بالاف جي
صورة لمكان الصعود

وهذي صورة وردة في أعلى الجبال

صورة السد