السلام عليكم
كيف حالكم يا شباب...
عندي ماركيز أمريكي 2007 جبته طلبيه و لما وصل الموتر و رحت أستلمه جيت بشغله ما رضا
يشتغل حاولت يمين يسار و ما رضا المشكله أن فيه كهرب و تشتغل لمبات الطبلون بس ما يشتغل
رحت و فتحت الكبوت يوم فتحته لقيت سلك عريض و لونه أحمر و مشبوك بالبطاريه قمت و فصلته
و رحت أشغل و برضو ما رضا رحت وجبت كهربائي و قالي هذا نظام سيكيورتي و ما يشتغل الموتر
ألا بعد ما تفتح السياره بالريموت و هنا الطامه الصغرى<<< الكبرى جايه بالطريق السياره جايه بدون ريموت و سئلته قلت
وش السوات قالي ما لك ألا أنك تبرمجه شلت الموتر بسطحه ورحت لم كم ورشه كلهم حاولوا
يدخلون على الكميوتر و ماقدرو و قلت ما لي ألا التوكيلات شلت الموتر للوكاله و دخلته و هنا
الطامه الكبرى
قالوا ما قدرنا ندخل على سستم السياره عشان نسوي مسح للكمبيوتر و نبرمجه من جديد
و قالو لازم تغيير الكمبيوتر كااامل قلت معصي و الله ما أغيروه و طلعت محبط و رحت للبيت و
رميت الموتر بحوش البيت لمده شهر تقريباً <<< محبط
المهم بعد شهر تقريباً دق علي واحد من الشباب بعد ما دري عن السالفه قالي طلع موترك تراني
جايب سطحه بنروح لم واحد كهربائي فنان قلت له الوكاله و هي الوكاله ما قدرت تصلح الموتر تبي
واحد كهربائي منتف يحل هالمشكله قال خلاص سلمني الموتر و أنا أتصرف بس الله لا يهينك أبي
كم قرش <<< يعني فلوس
المهم طلعت الموتر و سلمته المفتاح و الله يجزاه خير ما قصر والله
أعلمكم وين راح...
راح الرجال لم واحد كهربائي <<< يعني وين رايح لسمكري:smilie16:
سعودي الجنسيه له محل صغير عند الغاله ( حي الفيصليه ) بالرياض طبعاً
المهم قالي الكهربائي أبيك بكرا الله لايهينك تروح لم الوكاله و تجيب من عندهم عقل الكمبيوتر ( IC ) قلت ما
عندك مشكله صحيت الصبحيه و طلعت لم الوكاله قلت لهم أبي عقل الكمبيوتر على رقم هذا الشاصي
قالي موجود بس سعره يختلف عن باقي الموديلات قلت و شلون قال تمر لون <<< أخلص علينا بس
المهم من موديل 1998 - 2010 سعر عقل الكمبيوتر بـ 350 ريال تقريباً
ألا موديل 2007 بـ 630 ريال شئ غريب... طبعاً أنا ألحين أتكلم عن وكاله الحاج حسين
قلت بنفسي خلني أروح لم التوكيلات ووالله أني أستغربت يوم سألته قالي نفس السعر بس الفرق زيادة 20 ريال
المهم شريت العقل على قولت أبو نايف <<< الكهربائي
ووديته لمه قالي تعال بكرا و إنشاء الله السياره تكون جاهزه قلت بنفسي أفلقني
المهم ما لكم بالطويله...
صحيت من بكرا على رنة الجوال و أشوف الرقم طلع أبو نايف قلت الله يستر لا يصير بوه مشكله ثانيه منب ناقص وجع راس...
المفاجئه يوم رديت قال تعال خذ موترك تراه جاهز بهذي اللحظه قمت على طول ما غسلت و لا
و لبست ثوبي طالعت بقميص متعرفط و أركض تقل مهبول رايح للشارع العام باخذ ليموزين ( تاكسي )
و المهم أستلمت الموتر و أنا مستانس و لا أخذ من ألا 300 ريال
200= شغل يد
100=برمجه
100=برمجه
طبعاً السياره جنسته سعودي أقصد برمجته سعودي و اليوم رحت للفحص و فحصت الموتر والحمد لله طلع سليم بس ما أمداني على المرور لأنه أنتهى دوامهم
و هذي نهاية قصة معاناتي مع الماركيز:xyxwave:
