السلام عليكم اخواني ..
اول شي مبارك عليكم الشهر ينعاد علينا وعليكم بالخير انشاء الله
عندي سيارة كابريس LTZ موديل 2005 شهر 11
اللون اسود
" يعني نقدر نقول اول دفعات 2006 بس بدون حساسات "
مخمل من الداخل وباقي المواصفات هي مواصفات ال LTZ
" فتحة سقف - تخشيب داخلي - مسجل وراديو 6 اسطوانات - كشافات ضباب - جنوط "
وانا ضفت عليها : زينون للمصابيح الرئيسية - مشغل MP3 خلف السيارة ب 12 سي دي - سماعة BASS كبيره مستقلة " يعني ماانقصت السيارة والشغلات دي محلها بين المقاعد الخلفي "
الدعاسات كلها مغلفة عشان لاتتوسخ ويسهل تنظيفها
والسيارت مظلله تظليل شركة " زي بارت "
للوقايه من الحرارة كامل السيارة الدرجة المسموحه من المرور
طبعا السيارة تحت نظام التأجير وينتهي عقدها على بعد شهرين من الان باذن الله
بس حبيت اشوف كم تجيب مبدئيا لان السيارة استخدمت للسفر بين مدن رايح جاي
" راعية خطوط :P "
ماشيه : 287000 كيلو
والسبب انها كانت سيارة عائلة ومقر العمل كان خارج جدة
المهم مانطول عليكم نجي لمزايا السيارة وعيوب السيارة " دا كلو لازم ينقال للامانة "
المزايا : المكينه ماشاء الله ممتازه 6 سلندر ومحافظ عليها
" تغيير الزيت كان دائما وابدا عند محلات بيترومين والفواتير اغلبها موجود "
ميكانيكيا ماتشتكي من شي السيارة غير انو القطع القديمة و تم تغييرها بقطع جديدة وكالة "
بالاضافة الى الاشياء اللي ضفتها عليها
عيوب السيارة :
1 _ مع كثرة السفر الاصطبات صار عليها تراب وسمعت انو يتنظف بس والله مع وضع الشغل مافضيت لها
2 _ فتحة السقف تم تغيير القزاز تبعها لانو مع الحرارة والضغط اتشرخ و مع ضربات الكورة من عيال الحارة الله يهديهم فصارت حركتها بطيئه شويه ولكن المحركات والتروس وكل شي حق الوكاله القزاز فقط هوا اللي تغير
3_ السيارة خلال الفترة اللي كانت فيها مع الاهل صار لها كم حادث بسيط " الاير باقات كلها شد بلد "
واتسمكرت كلها الحمدلله وماصار كانو فيها شي غير بس تغير خفيف في البويه
4_ بعض الضربات البسيطه هنا وهناك اللي مايبغالها سمكرة جامدة حالها حال اي سيارة
5_ الاسطب الخلفي اليمين مكسور بس كل اسلاكه وانواره شغاله زي الفل بس القزاز اللي اتكسر
6_ القزاز الامامي مكسور خفيف وتم معالجته بطبيب الزجاج " ماحبيت اغيره بغير اصلي لانو ممكن اللي يبغى السيارة يكون حابب ياخدو اصلي ولا موضوع القزاز على بعضو مايكلف 300 ريال من اي محل "
7_ التظليل حق السيارة اكل عليه الزمن بس سمعت لو حبيت تجدده بس 500 ريال بحكم انو انتا مركبه عندهم
دا والله على مااقول شهيد
هيا تقريبا كل اللي انا عارفه لانها مع اهلي الان واللي يحب يعاين يقدر يتواصل معايا على الخاص هنا
او على الايميل :
[EMAIL="k_dark_illusion@hotmail.com"]k_dark_illusion@hotmail.com[/EMAIL]
وحبيت ابيعها بحالتها بعد مايخلص عقدها على اساس اللي يبغاها لو حابب يزبطها بطريقته الخاصه يكون المجال متاح
والله يوفق الجميع بالبيعه
طبعا السياره موجوده في جده للي يحب يستفسر او يشوف السياره ويتأكد من كلامي
تحياتي للجميع وننتظر سوماتكم الطيبه
