مشكلة رجة البريكات (بالذات في الكابريس واللومينا)

السلام عليكم..
اعذروني إذا أحد تطرق لهالنقطة من قبل.. بحدثت بقدراتي المتواضعة وآسف إذا كان في الموضوع إعادة..
هذي قصتي... أتمنى أنها تفيدكم :)

عندي سيارة لومينا 2000.. بدت فيها مشكلة البريكات والرجة..
وكل 4 شهور تصير السيارة غير آمنة على الإطلاق فلازم تصليح..
طبعاً قيمة القماشات 230 + قيمة الخرط 80 + قيمة شغل اليد 80 = 390 يعني 400 ريال كل 4 شهور تقريباُ..

وكل 8 شهور لازم أغير الأذرعة وبعض الربلات (الخراب ناتج عن الرجة بكل تأكيد)..

في يوم من الأيام كنت فاضي قلت بروح للصناعية.. وماني طالع الا لما واحد يعلمني وش المشكلة الحقيقية.. ويثبتها لي (قبل لا أصلح)..

رحت لواحد قلت له المشكلة.. قال لي: هذا لازم خرط!!
قلت له زين.. بس ليش المشكلة ترجع باستمرار؟
قال (ولا تقول مسجل): هذا لازم خرط!!

ولا أدري الا صديقه سمع كلمة خرط، وشاف السيارة لومينا الا جاب العفريته وبدأ يرفع السيارة!!!!!!!
بغى ينفجر مخي :a120(115):
مشيت بكل هدوء.. ووقفت بجنب أذنه... وصرخت له صرخة طيرت عفاريته..
كيف ترفع السيارة بدون أذن يا *** يا *** يا *** .. الخ الخ.. :a1120(82):

المهم وأنا أصارخ... وهو بدأ يكره اليوم اللي انولد فيه... وما وده الا أني أبعد عنه :bigggrin:
قام باكستاني من الجهة المقابلة وناداني أجي عنده..

واللي أنا عنده شاف الخلاص مني سهل.. قال هذا يعرف المشكلة، ويأشر لي على الباكستاني..

المهم أنا بصراحة راسي صدع من الصراخ على الأحمق.. فقلت بروح للثاني وأشوف وش عنده؟؟؟

قال لي: أنا أعرف كيف أصلحها..
قلت له: وش المشكلة أصلاً؟؟
قال: مشكلة بسيطة أنا أعرف لها.. :c0214:

قلت في نفسي.. أكيد أنه يبغى يضمن أني أصلحها عنده... خير... خير...

وش السالفة ؟؟

طلعت المشكلة في الكليبرات (Calipers)...
سألته: المشكلة تراها في سيارات لومينا وكابرس كثيرة !!!
قال: أدري.. بس قليل يعرفون ان الكليبرات هي المشكلة..

قلت له: وش الخربانة؟؟ الأمامية والا الخلفية والا كلهم ؟؟
قال على طول: الخلفية..
قلت: وش دراك ؟؟ وأنت مافحصت السيارة الى الآن؟؟
قال: دائماً اللومينا 6 سلندر تكون الخلفية.. والـ 8 سلندر تكون الأمامية..

لكن الإحتياط واجب.. فشيك عليهم كلهم.. ولقاها بس في الخلفية..

قيمة إصلاح الكاليبرات الخلفية:
القطع: 60 للواحد = 120
شغل يد: 60 للواحد = 120


الآن المهم... في الحقيقة أهم شي في هالقصة.. هو كيف تعرف أن عندك مشكلة في الكاليبرات؟
(صلح البريكات تماماُ -- اخرط الهوبات وغير القماشات كلها -- قبل لا تسوي هالفحص)

الطريقة:
شغل السيارة وحطها في الـ D..
ارفع رجلك عن البريك وخل السيارة تتحرك بحالها (لا تدوس بنزين)..
اضغط بريك خفيف (لا توقف السيارة.. بس خل سرعتها تنزل).. وخل رجلك ثابتة..
الآن:
إذا السيارة تمسك وتفك .. تمسك وتفك (بتلاحظها إذا المشكلة موجودة)..
وصلنا خير... فعلى الأقل عرفنا سبب المشكلة...

والله أعلم..

على العموم... السيارة ولا أنعم.. والبريك ولا أقوى..
صارت لي مشاكل أخرى في البريك... بس يمكن تستاهل موضوع مستقل :)

كتبت الموضوع لأن أخوي (عنده لومينا).. قال لي قبل كم يوم أدور هوب جديد حاطه في البيت..
سألته.. وقال لي أن بريكاته ترج.. يوم قلت له عن اللي صار معي استغرب تماماً.. وما كان عارف عنها..
فقلت أحسن حل أحط اللي صار معي على النت.. أسرع لانتشار الخبر :)

الله يوفقكم جميعاُ... آسف اني طولت عليكم... (أتوقع هذا أول موضوع أكتبه في حياتي :) )
وأعتذر لو الموضوع مكرر..