مساكم الله بالخير جميعا ... حبيت اليوم اكتب هذا الموضوع عن مشكلتي مع سيارتي التاهو 2007.
...
...
اول شي السيارة ما مشت غير 50.000كم، وهي مسافة قليلة لما نقارنها مع اي سيارة ثانية من نفس الموديل لكن السبب يعود لصغر مساحة البحرين اولا ولكون اني ساكن في منطقة فيها بيوت اهلى كلهم وحتى موقع العمل اللي اشتغل فيه ببنفس المكان. يعني معدل المسافة اللي تقطعها السيارة يوميا لا يتعدى 25كم.
...
...
الموضوع هو ان مع اقتراب موعد صيانة السيارة حق 50.000كم ولعت عندي اللمبة الصفرة الخاصة بالمكينة، فأخذتها للوكيل قبل موعدها بيومين .. المهم خذت السيارة عنهم يومين وعملو لها صيانة اعتيادية بس تم تغيير الفحمات الامامية والخلفية ودفعت فيها 2300 ريال.
وانا راجع عالبيت ولعت عندي اللمبة الصفرة مرة ثانية ... وبعد يومين رجعتها عالوكيل وقدمت شكوى ان صيانتهم غير كاملة. عموما اخذو السيار عالفحص تذكرت اني سمعت صوت خفيف من السكان (الدركسيون اذا ماخاب ظني) وقلت لهم يفحصونها مرة وحدة.
...
...
بعد يومين اتصل فيني الموظف من الوكيل وقال لي ان توجد مشكلة في نظام التوجيه (الستيرنغ) ولازم يتغير الكت والربلات اللي داخلها ... وقال لي اذا ماغيرتها راح تلاقي مشكلة تدريجية في عملية توجيه السيارة، وفعلا تذكرت اني بآخر الايام قمت احس بتغيير طفيف في تحريك عجلة القيادة. عموما سعر القطع 4500 ريال وتغييرها 750، وقبل ما ابتدي في الاستنكار قال لي اصبر شوي لان عندك مشكلة ثانية بالسيارة وهي وجود رجة خفيفة بمحرك السيارة ... وتذكرت يوم كان صديقي في السيارة وانا نازل اشتري غرض قال لي انه حس بهزة في السيارة استمرت دقيقتين، وقال لي الموظف بالوكالة ان الخللفي قطعة اسمها throttle body وهي قطعة يمر فيها البنزين للمحرك وان لازم تتبدل وسعرها 1630 ريال وتركيبها 500 ريال.
...
...
انا طولت بالموضوع سامحوني راح اختصر
...
...
تصليح السيارة بالكامل بيكون 7500 ريال وانا دافع لهم قبل ايام 2300 ريال ... شي يجنن.
ايام وانا افكر اصلحها عندهم او اخذها لاي كراج وانا ماعرف كراجات كويسة عندنا وبعدين كنت شاك بمصداقية الوكيل ... يومين وانا ابحث بمواقع السيارات العربية وماحصلت معلومات وافية عن الموضوع لكن لقيتها بالمواقع الامريكية وعرفت من اكثر من موقع انها مشاكل شائعة في سيارات جنرال موتورز حتى الجديدة منها، وكل اللي قاله لي موظف الصيانة لقيت المواقع تأكد نفس الكلام.
...
...
وبعد شد وجذب مع الوكيل واتصالات ما منها فايدة مع جنرال موتورز بدبي قام الوكيل وخفضني 1200 ريال وهي قيمة تركيب القطع يعني مارح ياخذون منى سعر التكلفة للقطع.
...
...
هذي مشكلتي وحبيت اشارككم فيها، وطبعا لاني احب سيارتي تكون خالية من العيوب قلت لهم صلحوها وامرنا لله.
...
...
ما ادري اذا الوكيل نصب علي او اني غلطت في قبول دفع هذا المبلغ الكبير..!!
وسامحوني طولت عليكم
