بسم الله الرحمن الرحيم ..
السلام عليكم ورحمة الله وبركاته ..
بما اني باجازة هاليومين , وعندي طاري اني اشتري سيارة , وكنت محتار جداً بين الكابريس والافالون واللكزس , فانا ما ادري اشتري سيارة غالية وادفع فيها , ولا اشتري سيارة متوسطة واصبر كم سنة ..
المهم مالكم بالطويلة , اني اليوم مريت على العيسى "الرياض طريق الدائري الشمال" والجميح "فرع خريص" وعبداللطيف جميل "شمال الرياض" والحمراني "خريص"
بصراحة ما سألت عن انواع كثيرة , لكن سألت عن كم سيارة , وان شاء الله تستفيدون منها ..
المقصد اني كنت ناوي الكابريس , لذلك حطيت الموضوع هنا :a1120(86):
مريت الجميح ..
اول شي .. الجميح سعر الكابريس ال اس بـ 96 الف 8 سلندر
............. الجميح سعر الكابريس ال تي زد بـ 123 8 سلندر
............. الجميح سعر الكابريس رويال بـ 151 8 سلندر على ما اعتقد
ثم مريت العيسى , ما عندهم كابريس خير شر .. يقولون مخلص , ومالك الا تنتظر 2012 لأن 2011 معاد فيه منه شي , حتى بالعرض ماعرضوا لا لومينا ولا كابريس !
لكن سألته وش كانت الاسعار عندكم .. يقول الكابريس ال اس 8 سلندر بـ 100 ! والـ ال تي زد بـ 116 <<بس مجرد فضول مني , ومجرد اجتهاد منه , لأن ما عندهم اصلا الكابريس ..
بعدها مريت الحمراني اللي على خريص ..
وعلى الطريق رحت اشوف لي الددسن .. واحد من الربع يبي يشوف سعره .. انتوا سمعتوا وش قلت اشوف .. ددسن مو بانوراما ! نعم ددسن واللي يسمونه البعض عراوي :c0214: !
سعره الغمارتين منه السياحي بـ 70 الف ريال سعودي فقط لا غير :a1120(121): ! بصراحة حرتني جبهتي يوم قال السعر , كأني سائل عن بي ام .. اعوذ بالله شي مب طبيعي , وعلى فكرة هالسعر فقط بالسعوديه , ولا الدول اللي برا ارخص .. اجل هنا الفل منه فوق ال80 وربي جنووون لا وتايواني <<بيتصفق من اصحاب الدداسن , بس كلامي عشان سعره مو رداً فيه <<اشوا انه يبي واحد :tongue:
المهم , رحت اوسع صدري عند ابو جميل بعد ما صفقني الحمراني ,قلت باشوف لي اللكزس , قلت والله ان كان فيه رجال بيدفع 80 في ددسن , وانا مستخسر مئة وستين في لكزس , فانا غلطان <<يهّون على عمره :bigggrin:
عاد رحت اسأل عن اللكزس الصغيره ..
سعر اللكزس ES350 ماهي بانوراما .. بس فيها شاشه .. واللكزس فيها نوعين جلد .. من الخارج ما تفرق اللهم فرق طفيف في الملمس .. هذا هو النوع الاول ليس الافضل ..
سعرها 160 الف .. وهي السيارة الوحيدة اللي اشوف ارتفاع سعرها عن قبل فترة ارتفاع طفيف جداً بحيث لا اعتقد يتجاوز الفين او ثلاثة .. مقارنة بباقي سيارتهم اللي ارتفعت على الاقل 10 الالف خلال الشهر الاخير ..
ورحت اشوف الكامري الستاندرد للي هي اقل نوع .. سعرها بـ 79 الف .. <<من يصدق اننا كنا نشتريها بأول الخمسين في عام 2002
ثم شفت الاوريون اللي كنا شارينها العام بـ 83 اللي هي ايضاً سياحية .. اليوم سعرها 92
بالاخير .. عندي ملاحظة بس بخصوص الكابريس .. شباب انتوا عارفين لو قارنا بين الـ LTZ والـ LS في السعر راح يكون الفرق تقريبا 20-25 الف .. يا اخوان بصراحة انا اليوم لما دخلت , كنت متأكد اني باشوف فروقات كبيرة .. لكن انصدمت من الواقع , الا ان كاني على خطأ فصححوا فترى خبرتي فيه ليست قوية ..
الحين صحيح اننا ندفع 20 الف مقابل مساكة يد وحساسات ونصف تخشيبة وكم طفسه من الاشياء الخارجية اللي ما تودي ولا تجيب ..
بصراحة انا كنت متوقع بالاقي فرق على اقل اقل تقدير شاشة نفقيشن , او اشياء فعلاً تفرق .. لكن تفاجات انهم كلهم لهم نفس الشاشه اللي هي شاشة الـمعلومات العادية حقت الـ ال اس !
يعني شلون اقول اني داخل اليوم وناوي مرره على ال تي زد , بس يوم شفت ان هذا الفرق والله ان السيارة طاحت من عيني عقب ماكنت لي شهر اهوجس بها وشبه متيقن اني اخذها !
والملاحظة الثانية : هذي الاسعار اخذتها مع قليل من المكاسر مع حقين الصالات , فانتوا اخصموا في المبلغ اذا كانت اسعاركم كاش الى الـ 5 اعتقد كحد اقصى وبتحصلونها ان شاء الله .
بالاخير .. يارب يارب يكون الموضوع افادكم .. ويكون سهلت على البعض منكم عناء 4 ساعات في زحمة مدينتي الجميلة :a1120(82):
في حفظ الله .
