السلام عليكم ورحمة الله وبركاته ..
انا أحد ملاك الالتيما 2013 وبعد ما مشت السياره 6800 كيلو او 5800 ناسي بالضبط واجهتني مشاكل بالسياره :
1- تسريب موية الرديتر أو بالأحرى كسر بالعلبة
2- صوت غريب بالفرامل لما ارجع ريوس او اخذ منعطف بالسياره وكل ما زاد الوزن بالسياره زاد الصوت
3- ريحه تطلع من المكيف
4- الكنب الخلفي يطلع صوت كان في فراغ من الخلف كأنه تم فكها وتركيبها بشكل خاطئ حتى الموظف استغرب وقال لي شاريها وكاله ولا مستعمل.
المهم دخلت السياره عند اوتوستار بتاريخ 16\07\2013 وقال لي الموظف ( اسمه ساتيش ) ان السياره بتقعد يومين او ثلاثه بالكثير , انا انبسطت ونسيت كل الكلام السيئ اللي اسمعه عن مماطلات وكالات السيارات , المهم عطيتهم جوهم وقلت لا تجيهم الا بعد 3 ايام ولا تزعجهم مساكين دامها 3 ايام تهون ..
جيتهم باليوم الرابع وهنا نقطة التحول ..
فاجأني الموظف ساتيش بوجه مختلف وبدأ يشرح لي ويقول لي مشاكل السياره كثيره ( مسجلها بالورق اظن 6 مشاكل 4 منها خاصة باصوات البريكات ومشاكلها لكن مدري ليش سجلها بهالطريقه ) , قلت له يا صديق انت قلت يومين ثلاثه قال لي لأ هذا يمكن يقعد اسبوع يعني ثلاثه ايام وارجع لنا , انا قلت مو مشكله 3 ايام ما تضر - مع العلم اني طالب ومنزل ترم صيفي - ..
جيته بعد ثلاث ايام واعطاني عذر جديد قال انا قصدي الاسبوع نفحص مشاكل السياره واكتشفنا ان عندك كسر بعلبة الرديتر وتحتاج تغيير وأرسلنا للعيسى للسيارات اننا نحتاج رديتر لانه مو موجود بالمخزن , قلت له كم يقعد قال يومين عمل عشان يوافقون وقلت له طيب بقية المشاكل اجابني بنبرة ساخره " يا صديق انا ما اقدر احرك سياره كيف تبغاني اكشف على بقية المشاكل " , سبحان الله وكأن الخرب بالقير والمكينه مع العلم ان لو عبو الرديتر يمشيهم نصف ساعه تكفيهم لكن البليد بليد ..
بعدها بثلاث ايام رحت لهم لقيت الأخ ساتيش ماخذ اجازه ورامي هموم العمل , لقيت واحد ينقال له ابو ناصر وقال العيسى ما أرسل اعتماد تصليح وقلت نفس كلام خويك قال لي والله المشكله مو من عندنا وقال مرنا بعد يومين , وأنا ماني من النوع العصبي اللي اصارخ واخذ حقي بالصوت وماشي على نياتي ان المشكله من العيسى ..
وبعدها بيومين ( احس طفشتكم بهاليومين لكن عشان تحسون باخوكم صاحب السياره ) رحت لهم ولقيت نفس الكلام من ابو ناصر لكن قلت هالمره بكلم مدير الصيانه ..
جاني واحد اسمه زياد وردد نفس كلام موظفينه - يعني ما استفدنا شي - فقلت دام المشكله من العيسى فما لي الا اكلم العيسى , وتذكرت ان عندي رقم محمد كمال واللي اظن انه مدير مركز خدمة العملاء بالعيسى بالرياض وهو اول من تواصت معه قبل ما اشتري السياره , كلمته بتاريخ 25-07 ووعدني خير وقال لي انه تواصل شخصيا مع زياد مدير مركز الصيانه وقال انه بيسرع حل المشكله , بعدها بخمس ايام رحت وانا براسي شر وناوي اخذها بالصوت لكن لقيت ابو ناصر وقال لي انهم طلبوها ويبغى لها يوم عمل عشان توصل من الرياض , قلت له يعني متى اخذها قال لي تعال الأسبوع الجاي , جيتهم يوم الاحد ولقيتهم مقفلين ( مع انهم معلقين ورقه انه في دوام ويوم سالت قالوا ما في دوام اليوم ) , رحت اليوم اللي بعده اللي هو اليوم الاثنين لقيت موظف جديد سألته عن السياره قال للحين ننتظر الموافقه , انا قلت له انتم قلتوا لي هالاسبوع قبل العيد تكون جاهزه قال لي من قال لك وقلت له ابو ناصر .. قال ابو ناصر ترك الشركه :| , قلت طيب وين زياد قال ماخذ اجازه ..
انا هنا وصلت حدها وقلت ما ينفع الكلام , اتصلت على وزارة التجاره وقال لي الموظف اجراءاتهم غير نظاميه واخذ معلوماتي ووعدني خير , اعذروني على طول الكلام لكن بغيت اشرح الوضع بالتفصيل عشان ما يكون في أي تضليل للقراء ..
-معلومه نسيت ذكرها : انا قدمت بلاغ سابق قبل ما اتواصل مع محمد كمال لكن يوم وعدني خير الغيت البلاغ وكنت بحلها بشكل اكثر وديه-
[COLOR="Indigo"]المشكله الان اننا مقبلين على عيد الفطر والصيانه بيقفلون يعني الانتظار بيدوم لاكثر من شهر
هل في احد جرب يقدم شكوى مماثله او يعرف احد قدم شكوى وحصل على نتيجه ايجابيه ؟! , لأن بكل امانه ماني مأمل خير ابدا دايم الانظمة لمصلحة المواطن تكون ضعيفه لكن شي يغبن 3 اسابيع عشان ياخذون موافقه على علبة رديتر , من الحين شايل هم لو خبط القير او المكينه.
وأنا والله ما جيت أشوه سمعة اوتوستار المشوهه ولا جيت اشوه سمعة العيسى لكن ذكرت هالكلام كله بالتفصيل وان كان في موظف من العيسى هنا عنده اللي يثبت عكس كلامي يتفضل .
وباذن الله بفيدكم باخر التطورات.[/COLOR]
