بخصوص المازدا CX9 ...؟

بندر .. @user_306425 · 16-03-2015

السلام عليكم ورحمة الله وبركاته

أسعد الله أوقاتكم بكل خير

أخواني لاهنتم بعيد عن المقدمات
حبيت اخذ اراءكم ومشورتكم في جيب المازدا CX9 2015

الفل كامل والنص فل

ياليت اذا احد مجرب أو ينقل لي تجربة كامله عن السيارة
عن العيوب والمزايا وعن كل شي يخص السيارة
وهل الموتر يصبر
وكيف القطع الغيار

وهل فيه منافسين بنفس أو بقرب سعر المازدا ؟

الله يعطيكم العافية يارب ..
أنتظركم

myayh @user_63782 · 18-03-2015

سيارة رائعة بكل المقاييس

X_abu.s_X @user_189988 · 17-03-2015

وعليكم السلام ورحمة الله وبركاته

فيه واحد من الشباب قبل فتره كأن محتار بين الباثفندر و المازدا cx9 وهذا ردي عليه

ابتكلم عن المازدا لاني املكها ما اقدر احكم الان اذا هي عمليه او لا لان السياره جديده ما بعد كرفتها

لكن اعرف اثنين معهم 2009 و 2010 كلهم يمدحون السياره و الي معه 2009 ماشي 400 الف

اذا حافظت على السياره وحافظت على صيانتها اول بأول بتعيش ان شاء الله معك

بس الوكيل يعطيك ضمان 3 سنوات او 100 الف كيلو

من ناحية قطع الغيار فتعتبر متوسطه ولا تنسى انها يابانيه يعني تعمر معك اذا استخدامك معقول

بالنسبه لراحه المقاعد تعتبر مريحه بس مو مثل مقاعد الامريكي لكنها ممتازه يعني في الخط ما تحس بألام في الظهر لانها طبيه هذا بالنسبه لمقعد السواق و الراكب اما الخلفيه ففيها ليونه وراحه افضل من الامام

اما راحة مطبها ففيها قساوه شوي خصوصاً ان الجنط كبير وكفراتها قاسيه انا بالنسبه لي عادي
لان قساوتها مومثل السيارات الرياضيه يعني مثل اي سياره صغيره

من ناحية الرساوه كجيب تعتبر ممتازه ومع اللفات تطرب اذا مريت من عند شاحنات مايلعب فيها الهواء مثل الجموس والطاره فيها ثقل بسيط عشان تعطيك ثبات على السرعات العاليه

بالنسبه لي ايجابياتها : سعرها مقابل مواصفاتها وجودتها ـــ مكيفها ماشاء الله ثلج في عز الصيف مع ان الصف الاخير مافيه مكيف لكن بعد ماتشغله بـ5 دقائق تبرد السياره مع ان فيها 7 درجات للمروحه لكني ما قد حطيتها اكثر من 3 درجات وانا ماضللت وكنت شاريها في عز الصيف ـــ رساوتها ـــ حجمها كجيب ماتحس بحجمها كأنها سياره صغيره.. وايجابيات كثيره

اكبر عيب هو عزل الهوا عادي الى سيء لكن عزل الارض تسمع صوت الشارع في راسك اذا كان الشارع مكسر لكن على كلام بعض المالكين الي غيروا كفرات الوكاله ( بريجستون ) بأنواع ثانيه يقولون خف الازعاج وصارت الين في المطبات والعيب الثاني اذا انت مو راعي سرعه مايهمك الي هو الفصله تفصل على 162 كيلو طبعاً هذا الفل اما السياحي ( دفع امامي ) يفصل على 190
وباقي بعض الاشياء البسيطه ما اقدر اقول عيوب لكن فيها بعض الملاحظات

اخر شي اذا كنت راعي بر فالسياره ماتنفع لك يعني ممكن تدخل البر تتمشى بس او تدخل عند البحر
لكن تطعس فيها وتعاملها كأنها شاص بيخرب القير والدفرنس على طول ولو بحثت عن السياره بتحصل ناس تشتكي من القير او الدفرنس انه دايم يخرب واغلب الي يشتكون منه يا اما انه يدخل فيها بر كثير ويكرفها او ما يغير زيت القير في وقته فا اذا انت تحافظ على السياره من ناحية انك ماتكرفها في البر كثير وتحافظ على الصيانه بإذن الله بتعيش معك بأقل خسائر

والشكل 90% بيتغير في 2017 يعني الشكل الحالي بيكون اخر موديل 2016

وفي النهايه استأجر السياره وجربها بنفسك التجربه خير برهان ولاتنسى صلاة الاستخاره والله يكتب لك الي فيه خير

Ppp888 @user_302773 · 17-03-2015

انا شاري قبل شهرين الفل الكامل

بصراحة حلوة بس في مشكلة في الفل الكامل يفصل الطبلون على ١٦٠كم

techmate @user_74279 · 17-03-2015

قبل 10 سنين ماكان لها سوق لأنها كانت الوحيدة (يمكن ينافسها هوندا (MRV) إللي كروس أوفر بثلاث صفوف مقاعد, ومنافسينها (برادو وباثفايندر ودرانجو وإكسبلورر وترايل بليزر) كانوا 4WD والناس ماكانت تفضل الكروس أوفر

بس الآن الكل صار كروس أوفر ماعدا البرادو, لكن بسعرها وصناعتها اليابانية ومواصفاتها وإقتصادية صرف الوقود ستفتح لها سوق أفضل من منافسينها

انا وسيارتي @user_181125 · 17-03-2015

وعليكم السلام ورحمة الله وبركاته

حسب ما أسمع عنها انها سيارة عملية قليلة الأعطال ..

وبخصوص المنافسين يوجد نيسان باثفندر وفورد اكسبلورر وإن كنت أنصح بالمازدا أكثر ...

ولعلك تزور رابطة ملّاك CX9 فتجد عنهم إجابات أفضل وأشمل ..

http://www.assayyarat.com/forums/t272183.html