السلام عليكم ..
كيف حالكم شباب .. انشاءالله بخير .. ؟!
هذي أول مشاركة لي بهذا المنتدى الأكثر من رائع ..
وأتمنى انكم تقبلوني عضو بينكم ..
في البداية .. أحب أقولكم قصتي مع السيارات .. وسالفتي مع الـ xA ..
بسم الله نبدأ ..
في الصيفية اللي راحت .. أخيرا وافق الشايب <-- الله يحفظه .. انه يشتري لي سيارة ..
وقاللي رح للوكالات واختار السيارة اللي تعجبك ..
وأنا من سمعت هالكلام ,, وأنا مناقز من وكالة إلى وكالة أدور لي سيارة على قدي ..
أول شي .. مريت على نيسان .. وكانت الألتيما 2005 توها نازلة ..
شفتها وأعجبتني بالحيييل .. يعني تغير شكلها 100% وصارت فخمة .. بس مشكلتها كبيرة شوي ..
وأنا أحب السيارات الصغار <---- حدي xA وتخب بعد :D ..
بس كانت غالية .. الفل بـ 101000 ريال .. <--- مالها داعي أول سيارة تكون غالية ..
وبعد كذا مريت على الحاج علي حسين .. وشفت الزوم 6 .. وسعرها فل كامل معقوول مررة ..
ويوم طلعت منهم رحت لسماكو <--- على بالي اني بشتري بيتل |14| ..
كان سعرها فل كامل بـ 80,000 ريال .. يعني ما تستاهل .. وحتى قطع غيارها غالي بالهبل ..
وأخيرا مريت على تويوتا .. وشفت الـ xA وأعجبني شكلها الخارجي ..
سيارة رخيصة وصغيرة وتويوتا .. وأول سيارة لي .. يعني جميع المواصفات اللي أبيها موجودة فيها ..
وقلت للشايب .. وما وافق للأسف ..
وسحبت فيه يمين يسار وما فيه فايدة ..
وأخيرا مدري ليش غير رايه فيها و وافق ..
والحمد لله شريتها 2004 اتوماتيك <---- تعرفون بالرياض اللي ما معاه توماتيك بيتعب بهالزحمة ..
خلصت العطلة .. وبدت الدراسة .. وياليتها ما بدت ..
المهم ..
أول يوم دراسي .. أخوكم مستانس بسيارته الجديدة .. ومين قده معاه xA <---- تكفى يال بورش :D ..
وأنا رايح للمدرسة .. وقفت عند دوار .. عشان الزحمة .. وما دريت إلا ويخبطني ذاك الفان من ورا ,, <--- أول خيير |5| ..
ومن قوة الصدمة نقزت أنا وسيارتي قدام .. بس الحمدلله ما كان قدامي أحد ..
ونزل الهندي .. سوري بابا ما في شوف وبدا يخربط علي .. المهم الصدمة خفيفة نسبيا .. يعني بس كم حكة ..
ومشيتها له ..
ورحت للمدرسة مقهوووور .. السيارة جديدة ما كملت ولا شهرين ..
ويوم طلعت من المدرسة .. وأنا أمشي بالشارع مسرع .. وفجأة وقف اللي قدامي .. وصدمته طيرته قدام ..
سلامات وش اللي صاير .. ما حصل الا خير .. والحمدلله سامحني .. والصدام انعدم كله ..
بعد كذا باليوم الثاني كنت واقف عند نفس الدوار .. ويجيك ذاك الشايب الله لا يوريك .. ويسقط علي .. ويعدم لي الرفرف الأيمن والباب ..
والمشكلة انه مادرى انه عدملي الموتر .. معاه جمس موديله 85 .. وهو ما جاه شي ..
حاولت أوقفه .. بس شفت معاه عائتلة .. وبالصبح الناس كلها رايحه تدرس مالها داعي ..
وصارت سيارتي .. الله لا يوريك كلها صدمات ..
واحد من أخوياي أشار علي إني أوديه لورشة مضمونة وزينه <---- وياليتني ما وديته ..
وسمكرو لي الصدام اللي قدام مع الرفرف والباب الأيمن .. وأخيرا وصلنا للمشكلة ..
أنا يوم رحت آخذ السيارة ما دققت واجد .. بعد تقريبا اسبووع .. دققت ولاحظت ان اللون يختلف مررره ..
صاير أغمق شوي من لون السيارة ..
رجعت لهم السيارة ومدري ايش وزحمة .. المهم ما فيه فايدة ..
وش رايكم بالمشكلة .. ؟؟ وش أسوي بهالحالة .. ؟
وهل فيه ورشة مضمونة 100% بالرياض تقارب اللون مرره .. بحيث انه ما يبان انه مصبووغ ..؟
وآسف جدا على الاطالة <--- تحملوني شوي والله يعينكم علي ..
مع خالص تقديري واحترامي لجميع أعضاء المنتدى الكرام ..
|3|
