سؤال لأصحاب الدفع الرباعي عموماً ولإصحاب ( الباثفايندر ) خصوصاً لو تكرمتم ؟

تسلم أخي ناصر وماقصرت

اخوي انا راح اجاوبك على الجزئيه الاخيره من موضوعك

وهي عن جهاز الانذار

الهدف الاول / تخويف العابثين والسارقين وايجاد مكان السياره لو فقدها في مواقف السيارات مثلاً

الهدف الثاني / وهو الاهم لا سمح الله صار عليك حادث في عباره او حصل لك شي لا قدر الله ازمه قلبيه ربو او اي طاري ولا تستطيع الحركه داخل السياره كل ما عليك هو ضغط زر التنبيه !! فوراً كل اللذين حولك سوف يلتفتون اتجاه الفلاشلات ( الانوار) والزمار ( البوري ) وهكذا يمكن انقاذك

----------------

اتمنى اني افدتك والجميع

بارك الله فيك أخي صالح

السلام عليكم

الشباب كفو ووفو

لاكن نصيحتي انك تنسم الكفرات 15 وتخلي معاك ماطور هوى ( كمبرسر ) علشان تعبي الكفرات ولا تنعدم عليك من الزفلت

والنصيحة الثانية لاتسحب اي احد خاصة السيارات الكبيرة اذا كانت مغرزة موترك قير تماتيك وراح تتأثر عندك الكلتشات بسرعة

واخيراً اذا كنت تبروح تصعس لاول مره حاول تروح معاك سيارة ثانية جيب علشان تساعدون بعض وقت الزنقة

بالتوفيق

الله يعطيكم العافية جميعا وماقصرتوا على هالمعلومات القيمة جعلها الله في ميزان حسناتكم

بسم الله الرحمن الرحيم


شف يالغالي

تنسيم الكفرات على حسب النفود الي انت داخل فيه يعني تشوف الارض اذا كنت بالصيف او في الشتاء

اذا كنت في الصيف لابد ان تنسيم الكفرات مابين 10 الى 15 <<هذا للتمشي اما اذا كنت ناوي تطعس وتراقي الاماميات 10 والخلفيات 5

وتشبك الدبل الخفيف

واذا صار النفود طويل ولاقدرت ترقاة بالخفيف فمالك الا تحطه بالثقيل واذا صار عندك محرك السيارة قير عادي بالثالث والرابع <<على حسب طول النفود وعلى حسب المسافه الي انت اخذها عزم

اما القير الاتوماتيك على الثقيل وعلى نمرة تحت الD النمرة الي بعدة علطول

اما اذا فيه سيارة مغرزة وناوي تسحبها على الثقيل ولا تحسبها بقوة الا اذا شد الواير واذا سحبت السيارة المغرزة لف الدركسون يمين ويسار علطول تطلع السيارة

والثقيل والي يقول لك انه يحوس الموتر هذا اعرف انه جاهل في السيارات لاني مع واحد من الشباب معاه باثفاندر 2003 ومن يوم يشتريه والى الان ماشاء الله ماشتكى من حاجه لانه بيني وبينك الثقيل يطرب النفود

وهذا الي عندي يالغالي واذا تبي اي حاجه استفسر انا ماراح اقصر معك ورحله بريه سعيدة


باي

اهم شي لابغيت تطعس حط هوا الكفرات على15 مع الدبل الخفيف وكنك تمشي على الزفلت

اخي الكريم اذا دخلت الرمل

خفف هوا الاطارات الى 20 تقريبا وشغل الدبل على الدبل الصغيير الاول
لاتدعس بكل قوتك خلك وسط واذا شفت نفسك بتغرس حاول تلف يمين و يسار مع دعس متوسط


اما كيف تجر سيارة مغرسة

اشبك الحبل في مكان الصحيح ولا تقبل بتعليق الحبل في المساعدين او غيره في وسط الصدام او في مكان المخصص (الهوك )
وحبل طويل بقدر يقبل لك ان مايصطدم بك

و السحب بحسب تغريسة السيارة المراد سحبها

اذا غارسة كثير لازم تجر بقوه مرة وحده علشان تطلع من الحفرة الي هي فيها وبعدها تسحب بشكل معتدل

اذا كانت الغرسة خفيفة اسحب بدون دفعة قوية

اما السيارة المعطله في الشارع فامرها سهل تركيب الحبل في مكان جيد وسحبها فقط عليك ان تحاسب على المسافات وان يكون صاحب السيارة المعطله ينتبه دائما على الفرامل ولا يغفل عنها وطبعا السرعة غير مرغوب فيها ابدا

جهاز التحكم عن بعد ( الريموت كنترول )فيه زر أحمر إذا ضغطته علق جرس المنبه ( البوري ) ما فائدة ذلك ؟
اعتقد و الله اعلم انه اذا تاهت منك السيارة في مواقف عامه ولا تعلم مكانها بضبط تضغط على هذا الزر
|10|

الله يعطيك العافية وماقصرت ولكن:

بعض الأسئلة التي طرحتها انا لاتحتاج للعملي بل يكفي النظري

ولازلنا نتظر المزيد