السلام عليكم :)
بشهر 4 من عام 2005 شريت Audi A4 1.8T من سماكو بالخبر وكانت المعامله من احسن مايكون حتى يوم تأخر تسليم السياره.. عطوني التست درايف كار (سياره التجارب) من الاربعاء الى السبت الى ما استلم السياره يوم السبت)
من شهر 4 الى قبل 3 ايام .. استخدمت السياره وكانت جيده بل ممتازه (احلى ياعربي) ولكن بالصيف وبالحر الشديد بدأ ظهور شقوق على صبغ الكبوت (بالبدايه كان على شكل شمخ.. قلت يمكن واحد حك الكبوت بمفتاح او قلم) ولكن بدا يكبر ويصير على شكل كسر.. وبدا يكبر ويكبر
قلت خليني انبهم عليها على تشييك 15 الف (اللي هو اول تشييك).. مرت الايام وفي اخر اسبوع برمضان.. اختفى زيت بور الدريكسون فجأه!!!! رحت لهم وماقصروا... اخذوا السياره على طول وحطوا فيها زيت واخذتها... واخذت موعد بعد العيد على اساس الصيانه والكبوت وشويه مشاكل جانبيه
رحت لهم بعد العيد ودخلت السياره وكانت ماشيه 13300 الف..
قلت لهم
1- صيانه 15 الف
2- صبغ الكبوت (على الضمان)
3- تغيير ايرباج الدريكسون... انفتح الجلد من الزاويه (يعني شئ بسيط لكن كل شئ تحت الضمان)
4- الكرسي اللي جنب السايق.. انشق من اعلى ظهر الكرسي من الخلف شق بسيط !!!
5- الشنطه صارت خبله.. احياناً اعاني مشكله بتقفيلها واحياناً تقفل بشكل طبيعي
6- اسفل باب اللي جنب السواق .. طلع من مكانه بشكل طفيف
قالوا يبغى لها من 7 الى 10 ايام بالصيانه
طبعاً استأجرت سياره بـ 60 ريال باليوم
بعد مرور 8 ايام اتصلت عليهم وكان يوم اربعاء.. وقلت لهم وش صار على السياره؟؟ قال ماخلصت وراح تخلص يوم الاثنين
قلت هذي اكثر من 10 ايام!!!
قال زحمه على فرن الصبغ!!!
قلت المهم تخلص السياره الاثنين
يوم جاء يوم السبت.. قلت بنفسي خليني اطلع واشوف السياره عشان اذا بقى شئ فيها... انبههم عشان تخلص على موعدها المتأخر (اللي هو يوم الاثنين)
رحت للوكاله ومالقيت السياره بالصيانه.. وكانت الساعه 5 المغرب .. ويوم سألت احد الموظفين اللي خارجين من الدوام.. قال السياره واقفه بالحوش من الظهر
اتصلت يوم الاحد عليهم وقلت وش صار على السياره... قال ثواني
وبعد مرور 7 دقايق تقريباً قال باقي التلميع..
انا استغربت.. كيف السياره واقفه بالحوش وباقي التلميع!!
يوم الاثنين رحت لهم ولقيتها واقفه بالحوش واخذتها ولكن الغبار اللي عليها ماهي وقفه يوم واحد.. شكلها واقفه من يوم السبت!! يعني كلام الموظف صحيح والسياره خالصه يوم السبت
لكن الى الان ماني متأكد اذا استنتاجي اذا صحيح او لا
اخذت السياره ومادفعت ريال واحد (كلها على الضمان)
1- السياره ماصار لها صيانه والحجه انها ماوصلت 15 الف كيلو
2- الكبوت انصبغ وتلمع
3- الكرسي و الايرباج ماسوا فيهم شئ وقالوا قطع الغيار بالطريق (يعني طلبوها وينتظرون وصولها)
أ- اجزاء الكرسي راح توصل بعد شهر واحد :(
ب- الايرباج بعد 3 اشهر والحجه ان الايرباج فيه مواد متفجره ولازم يتابعون الطلب مع الدفاع المدني
4- اسفل الباب صلحوه
5- الشنطه وصلحوها
تقييمي لهم هو 6 من 10 فقط و الاسباب كالتالي
1- عدم توفر قطع الغيار (خصم 2 نقطه)
2- تأخر الموعد (اخذوا 13 يوم) علماً موعدهم الاصلي طويل وهو من 7 الى 10 ايام على صبغ كبوت وشويه اصلاحات بسيطه (خصم 2 نقطه)
3- اتساخ الجزء الاوسط من المرتبه الخلفيه للسياره و بعض مقابض البيبان والدركسون وارضيه السواق واللي جنب السواق بأيدي و أرجل عمال الصيانه (علماً اني مدخلها التلميع قبل العيد وكانت نظيفه جداً ولكن عدمو الدنيا علي) (خصم 1 نقطه)
4- ماطالبوني بريال واحد وكل شئ بالضمان تم تطبيقه عند الصيانه من صبغ واصلاحات اخرى على حسابهم (اضافه 1 نقطه)
لو بأشتري أودي -علماً السياره روعه جداً ومافيها اي مشاكل تقنيه او ميكانيكيه- مره ثانيه بعد كم سنه... اعتقد اني راح استبعد الوكاله من راسي اللا اذا تغيرت الامور بعد انضمام المملكه بمنظمه التجاره العالميه وصارت فيه وكالات اخرى للأودي بالسعوديه
والسلام مسك ختام
