السلام عليكم ورحمة الله وبركاته
في بداية حديثي أود ان اقول لكم السبب اللي دعاني إلى كتابة هذا الموضوع وهو ما لاقيته من اوكس كول من نصب واحتيال وهناك سبب آخر وهو تنويه كل من يقرأ هذا الموضوع وتنبيهه قبل أن يتهور ويذهب إلا اوكس كول (في السعوديه) طبعا اود أن اقول بأن كلامي هذا هو ليس عن الشركه نفسها بل هو الوكيل ذاته.
أولاُ/ أود أن أنوه بأن أوكس كول هي شركة لتظليل السيارات والمباني
ثانيـاُ/ أريد أن أسرد لكم قصتي وما حصل لي أنا وأخي من أوكس كول وهي كالتالي:
ذهبت إلى معارض الرياض وكان هناك تخفيضات على شركات التظليل مثل في كول وليومر وزيبارت وأوكس كول طبعا انا قابلتني شركة أوكس كول في بداية المعرض المهم اني دفعت ثلاث عربونات لثلاث سيارات سيارتين باسات2007 وفورد ولما خلص المعرض رحت لهم انا واخوي وطلبنا منهم التظليلة اللتي اخترناها (اللي على اللكزس 430 )وقاللي المصري اللي في المعرض هذي مايشملها العرض ويوم تشادينا في الكلام قالي أصلا هي مخلصه من عندناولاهي جايتنا إلا بعد 6 شهور قلتله اوكي عطني فلوس العربون قالي ما اقدر ودار حديث طويل بيننا وفي نهاية الحديث قالي خلني اتصل المدير واشوف ايش يقول ([COLOR=red]ما تلاحظون يا اخواني أنه في البداية قالي مخلصه)المهم جيت لهم بعد يوم[/COLOR]
قالي المصري مبروك المدير وافق قلت تمام خير وبركه الله يعطيكم العافيه المهم دخلت سيارتي انا واخوي وظللوها بعد ما خلصوا التظليل شفت التظليلة مختلفه عن اللتي اخترناها طلع لونها رصاصي عاكس علما بأن اللي اخترناها شفااف واكيد بعضكم شاف اللكزس اللي في معارض الرياض
ولما قلنا لهم اللون مختلف قامو يحطون أعذار وابقولكم عذر من أعذارهم وهو انهم قالو ان القزاز حق الباسات لونه أخضر فاتح فلما حطينا التضليله اللي اخترتها طلعت غامقه قلت اوكى مهي مشكله ولما طلعت من عندهم لقيت كسر في التظليله الاماميه
بلغتهم عن المشكلة وشافوها وقالولي هذي تروح بس خلها على الشمس المهم خليتها شهر ونصف ولا راحت
رجعت لهم وشافوها وقالو هذا كسر في الفلم وراح نغير لك التظليلة الأماميه قلت اوكى المهم جا وقت التغيير للتظليلة الامامية
وطبعا وقفت فوق روسهم علشات اشوف شغلهم لأن شغلم الاول مش حالك المهم وانا اشوفهم يفكون التظليله الاماميه لقيت لون التظليله يختلف عن اللي اخترته جيت واخذت التظليله اللي فكوها وخليتها معي طبعا داخل المحل جاني واحد يمني بداخل المحل وقالي عطني التظليلة خلني ارميها بالزباله قلت خلها انا بأرميها عنك في الزبالة بس ابيها شوي قال ما اقدر اخليها معك لأن سيستم الشركة يمنع أن أي شخص ياخذ ولو قطعة صغيرة من الفلم
وطبعا وهو يقول هذا الكلام والله يا جماعة الخير انه مرتبك قلت له ليه تلعبون علي تقولون لي اننا مركبين لك التظليلة اللي اخترتها وطلعت تختلف قالي اليمني هذ نفسها المهم اني طلعت للمدير وقلت له قصتي (من إلى ) وقالي في النهايه اوكى نركب لك التظليله اللي اخترتها بس تدفع 500
قلت له بأي حق ادفع لكم 500 الغلط منكم قالي (((ولو العميل لازم يتحمل جزء من الغلط )))والله العظيم ان هذا كلامه لي والله على ما اقول شهيد
المهم طال الحديث بينا وفي النهاية تنازلت عن حقي في هذي المسأله ودفعت لهم 300 ومع انه ليس لهم حق في هذا الشي وكلمت اليمني وقلت له ليش تكذب علي قال انا ما كتبت لك الاوردر قلت اجل مين قال المصري قلت اوكى واروح للمصري ونفس الشي انكر المهم اني دخلت السياره عندهم وغيرو التظليلة
الآن هل تعتقدون ان المشكلة انتهت؟ لا والله ما انتهت طلعت السياره ولقيت خدوش في الزجاج الأمامي والخلفي والراكب ولعبو في الجلد حقت القزاز قلت له الحين سيارة جديدة وتلعبون في قزازها قال ايش يظمن لي ان هذي مننا قلت السياره طالعه من الوكاله للمحل قالي في سيارات تجي مخدش قزازها قلت بالله عليك
المهم مسكت احد العمال فلبيني قلت له من ظلل هي القزازه وأشرت له على قزازة الراكب قالي واحد بنقالي طبعا من نفس المحل لا تفكرون انه من برا المحل وخلوني اوقف عند هذي النقطة وهي العمالة اللي عندهم واحد بنقالي واحد اندونيسي واحد سوداني وغيرهم لا تحسبوني امزح اقولكم هذا الكلام جاد
خلني اكمل وش صار يوم مسكت البنقالي قلت له ليه تسوي كذا المهم انه اعترف رحت لليمني وقلت له واحد من عمالكم موجود ومعترف بخطأه قالي اصبر لين يجون العمال الثانين اللي ظللوا لك السياره قلت اوكى جيتهم بعد كم يوم طبعا بعد المشاكل لأنهم يبون يصرفوني مره يقولون لي المدير مو موجود ومره العمال طالعين عندهم شغل في عمارة وووو وطبعا انا ناشب لهم في حلقهم وإلى يومكم هذا ما عطوني موعد وآخرتها اليوم دقيت عليهم ورد على اليمني وقالي المدير مو موجود قلت وانتو وش شغلتكم قال انا ما اقدر ابث في هذي المشاكل واخر كلامه لي اذا جا المدير راح ادق عليك وافلقوني اذا دق علي
وأود ان انوه في نهاية حديثي عن ان السيارة الثانيه ولله الحمد لم يتهور صاحبها ويغير التظليلة علما بأن فيها مشاكل بس
لما شاف المشاكل اللي عندي هون ((اللي يشوف مصيبة غيره تهون عليه مصيبته)) طبعا سيارة اخوي جاها حقها لأنهم اعدمو المثلث حقه بالموس .
واخيراُ: أرجوا منكم إبداء آرائكم في هذي المشكلة
واعذروني على أسلوبي في الطرح لأن هذي أول مره اكتب فيها موضوع بهذا الشكل واعذروني أيضا على إطالتي
كلمه أخيره: نصيحة لوجه الله لا أحد يظلل عندهم وإلا راح يعاني ولو بجزء بسيط من اللي عانيته ولكن ما أقول غير [COLOR=red]حسبي الله ونعم الوكيل.
[/COLOR]
أخوكم الضحية/kaser_kr
