قناة السيارات
السلام عليكم
بالبدايه اخواني العضويه المستخدمه مستعاره لكتابة الموضوع
سجلت معكم لكني اعاني مشكله مع التفعيل ولاني قادر افعل عضويتي ولا جتني رسالة التفعيل
المهم احب اشكر اخوي ابو مهند اللي دلني على هالمنتدى
لي اسبوع اقلب بمنتداكم واعجبت جداً بالعدد الكبير لعشاق الهيونداي وهالشي اللي ماجا من فراغ
حبيت اطرح تجربتي بحكم الممشى الكبير لسيارتي واتوقع يمكن اكثر ازيرا ماشيه
موديلها 2006 من اوائل الازيرات
ماشيه حاليا 182000
سبب امتلاكي للسياره هو اني بديت اميل للسوناتا شكل 2005 وفوق ويوم جمعت فلوسي وعزمت كان وقتها نزلت الازيرا وشفتها وعجبتني اكثر من السوناتا وسعر معقول فتوكلت على الله وشريتها
طبيعة استخدامي للسياره غير مبالي وانا من الناس الدفوش بالسواقه يعني دعس واكل بعض المطبات
اداوم عليها يومياً مسافة 110 رايح و110 كيلو راجع اكيد ان الواحد ماله خلق يحافظ او يجامل السياره خصوصاً ان الواحد يطلع من العمل تعبان ووراه مشوار للبيت او رايح للدوام ومتأخر
بالنسبه للصيانه مادخلتها ولا مره ولا طبت ارضية الوكاله لي مواقف سلبيه مع وكالة عبد اللطيف جميل لأن سيارتي قبل الازيرا كانت كامري 2001
احب السياره تكون قدامي وبين عيوني ولا ادخلها عند هنود يطقطقون عليها ويلبعون على الناس اخرتها
بالنسبه للازيرا ماشاءالله تبارك عيني عليها بارده
سياره يعتمد عليها اينما كانت وابهروني الهونداي فيها
شي يحيرني بصراحه لما اشوف ناس يقولون الهونداي حقت سنتين ولا مايعيش ومن الخرابيط هذي يعني مدري وشلون جت هالسمعه السيئه ما اشوف اي شي بسيارتي يوحي لان تكون من شركه سمعتها سيئه بالعكس والله ممتازه مره وانصح كل واحد فيها وارضتني اكثر من الكامري مع اني كنت معجب بالكامري كثيرا لكن الان لا افكر ابدا بالعوده الى تويوتا لاني مرتاح مره بالهيونداي الله لا يغير علي تقدرون تقولون ضمنتها
والغريب من الناس وبعض المواقف المضحكه مره احتاج اخوي السياره وسافر فيها اسبوع وواحد من الشباب معنا بالعمل ممن يسبون الهيونداي ازعج مخي وهو يقول وش فيها علمني قول الصدق , عادي قول خبطت المكينه , ترى هيونداي عارفينها ( والله القلق )
يعني تحس انك تملك سياره مظلومه واذا جيت تمدحها كذبوك الناس لدرجة اني صرت اقول السياره مش حاللك عشان ما احد يعور راسي
هذولي فئه بسيطه اما باقي الشباب معجبين فيها وخصوصا اللي يداومون معي بعض الايام
التغييرات اللي سويتها لها كلها شغلات عاديه وهي كالتالي
غيرت الفحمات الاماميه على الـ 90 والمره الثاني على الـ 165 اما الخلفيه ما تحتاج تغيير الى الان
غيرت لمبة اللوحه الخلفيه ولمبة الكشاف الايمن
غيرت البواجي على 140 الف
غيرت فلتر هواء المكينه على 100 الف ومره ثانيه على 140 الف ( المره الثانيه غيرته بسرعه لان مثل ما انتو عارفين الفتره الاخير كله غبار وعج وخط الدوام بالغالب يكون عج )
بس هذا اللي اذكرته والشغلات كلها استهلاكيه وتافهه والسياره خدومه جدا وماتقصر وماشاء الله ولا يوم من الايام عطلتني
مميزات السياره
1- رساوتها ماشاءالله عليها يعني تعطيك الثقه بالسرعه وكذلك بريكها قوي
2- هدوءها جيد جدا يعني افضل من السيارات اليابانيه
3- قويه وتنطلق بسرعه
4- مريحه بالسفر وفيها مميزات تريح الواحد
5- عليها مسجل جبار وشي غير طبيعي
6- شنطتها واسعه جدا وهذا شي تفاجات فيه اول ماشريتها بصراحه موعلى شكلها من برى
العيوب
1- النور العالي مو قوي
2- عندي صوت بالدرج الاوسط اذا تكيت عليه بقوه مثلا بعدل جلستي وشي عادي مو مضايقني بس من قولة اني كاتب بعض العيوب
3- الدركسون يتعب شوي اذا جيت بوقف في موقف ضيق
نصايح لملاك الازيرا
ابتعدو عن صيانة الوكاله صدقوني السياره تستحق الثقه ولا تحتاج الوكاله
لان الوكاله يغيرون قطع بشكل دوري حتى لو ماكان فيها شي
الازيرا قطعها الاستهلاكيه تعمر مده طويله لا يلعبون عليكم الوكاله ومتى ما احتاج الشي انه يتغير غيروه عند ورشه تثقون فيها وقدام عيونكم
هذا والله ولي التوفيق
رد مع اقتباس
.gif "A120(89)")
