عندي مشكله فى الباجيرو وين الخبراء

اخوي S_320

انا اتفق معك ممكن من الاعمده او الصليبات وانا اشك فيها

اخوي سيكل ما انصحك تشترى اذا كانت مشكلة الضجيج موجوده فى كل الباجيرو

انا كنت استخدم جيب لكزس قبل الباجيرو والشهاده لله اشتريته ماشي 120 وبعته ماشي 270 ما اذكر انى دخلته الورشه الا مرتين تشييك فقط
فرق بين الراحه والنعومه باللكزس والخشونه والضجيج بالباجيرو

اذا ناوي تشتري لاتعدا اللكزس والراي لك حتى لو موديل قديم مايعرف الورش ابد

تحياتي

اخو مخاوي مافيه رجه تذكر بالدركسون لاكن احسه بالبدي كامل

الله يعيينك يا اخوووي عالمشكلة ...

انا عندي بعد نفس المشكلة بالبي ام .... عند سرعة 80 بالزبببط ترججج السييارة ولما اعطيها فوق ال80 تروووح الرجة .. وترجع الرجة عند 170 وترووح لما اعطيها بعد ...
بس انا اعتقد انه مشكلتي من الكفرااات الأمامية لانه في رجه بالستيرينج ...

اتمننالك التوفييق ومبرووك السيارة وتشوف خيرها ويكفيك شرها ...
وانشالله الشباب يفيدوك اكثر
اخووك
سنايبر

والله يا اخوان ماقصرتوا والله يطمنكم دنياء واخره على تفاعلكم

الصراحه وديتها الوكاله بالجبيل طلع معى واحد يقولون هذا مهندس ويوم سئلته وش جنسيته قالى لى بنقالى ؟؟؟؟؟
قمت وديورت ونزلته وش فهم البنقاليه بالسيارات ياعالم قلت الى هذا اولها ينعاف تاليها
واتصلت بمهندس الورشه الى فى الدمام واحد لبناني وقال لى مشكلتك مشكلت ترصيص
قلت ياخوى تعبت وانا ارصص المشكله شي ثاني قال لازم تجيب السياره ونفحصها قلت انا مسافر الحين واذا رجعت يصير خير

ورجعت لكم استشيركم ثاني مره الصوت يخف بعد ال 120 تدريجياً
لاكنه مزعج بالمره
والكفرات جديده والجنوط فحصت عليها وشيكتها بجهاز ياباني لاكن مافى فايده لازم اطول المسجل اخر شي علشان ما احس بالصوت
لاكن كيف اميز هل هو رمانات والا صليبات والا اعمده

يا اخوان، يقول غير الكفرات. مادام غيرها فهذا يعني إنه رصصها وكل الرمل إللي بين الجنط والكفر راح.

أتوقع يكون عندك مشكلة في الرمانات. هل تشعر بالرجة في الدركسون، أم لا؟ إذا كنت تشعر بها في الدركسون فالمشكلة في الكفرات الأمامية، وإن لم تشعر بها في الدركسون فالمشكلة في الكفرات الخلفية. والله أعلم.

اخي الكريم /الورنيش

هذا الصوت طبيعي جدا .. وعندي في سيارتي من طلعتها من الوكالة ولكن بعد 120 الف كيلو متر اختفى ولله الحمد واعتقد ان سببه الار بي ام المرتفع + المحول الحفاز القريب من دبة الكنداسة ومع مرور الوقت والدعس الجامد تتفتح المسامات حقت المحول الحفاز ويختفي الصوت .. السيارة مافيها شي من الناحية هذي ,, اما الرجة يمكن تحتاج ترصيص , بس ابعد عن اجهزة الترصيص الماليزية المنتشرة عند البناشر لانها سيئة جدا .. دور لك الترصيص الالماني القديم او اللي بدون فك الكفر ..

لك تحياتي ..

اخوي شيك على جنوط السياره وتأكد ان كفرات السياره خاليه من الرمل لأنه لما تنزل النفود وتنسم الكفرات اكثر من الازم التراب يدخل بين الكفر والجنط ويسبب نفس الرجه .. اذا هي سليمه شيك على عواميد الكردان الأمامي والخلفي ممكن يكون واحد منهم جيته ضربه مع مالك السياره الأول .. فايحتاج وزن اوترصيص وبرضه شيك على فواصل الأعمده (الصليب) .. اذا الصوت تحسه جاي من تحت السياره وتحس ان القير فيه زي (االفيبريشن) لما تحط يدك عليه معناته الصوت يصدر من الأعمده او الفواصل (الصليب) .. كثير ما تصير بسيارات الدفع الرباعي لما يكون واحد من اعمدة الكردان فيه ضربه او يحتاج ترصيص .. طبعاً ترصيص الأعمده وتعديلها يكون عند المخرطه ... وبمبلغ زهيد مقارنه بسعر الجديد .

الخلاصه .. اذا الجنوط والكفرات سليمه فالصوت واحد من هالأثنين :

اذا الصوت يطلع من سرعه معينه ولا يروح يعني كل ما تسرع كل ما يزود هذا من فواصل الأعمده (الصليب)

اذا الصوت يطلع عند سرعه معينه ويختفي لما تزود او تنقص عن هذه السرعه هذا من اعمدة الكردان واحد منها يحتاج تعديل او ترصيص . والمشكله في عواميد الكردان اذا مافيها ضربه واضحه مايقدر احد يحكم عليها بالنظر لا وكاله ولا غيره لازم تنفك ويشيكون عليها المخرطه .فأنت خلي عواميد الكردان اخر شي تشيك عليه .


على فكره ترا صوت الصليب والأعمده لما يكون فيها مشكله قريب من صوت هزاز الجوال يعني تحس السياره كلها (ززززززز) مادري كيف اوصفه لك بس ترا مو رجه اقرب ماله اهتزاز :)

تحياتي لك ولبقية الأخوه

السلام عليكم ......

يالغالي ، مشكله الرجه مستحيل تكون طبيعيه لأنه كان عندي واحد موديل 2003 موتر الوالد وماكان يرج ابد ولله الحمد .
حاول انك ترصص الموتر عند واحد فني وتتأكد من سلامه الاذرعه وميزان الاذرعه .

ومشكله الصوت إذا كان مزعج جداً ويطلع لك لما يكون الاربي ام فوق 3 ونص حاول انك تشيك على الصليبات حق العامود لأني اشتكينا منها في البدايه وغيروها لنا على الضمان من وإلى .


واي سؤال حول الباجيرو اسئل وبإذن الله بفيدك ..،،

اخي الكريم

انا كان عندي باجيروا 2004 قبل كذا الي تشتكي منه موضوعين مختلفين 1- لصوت 2- الرجه
اما صوت الضجيج فهذا طبيعي جدا وانا بنفسي سالت الوكاله تلك الايام واكدو لي انه ما في مشكله

اما الرجه جرب رصصها في وكيل اطارات معتمد ويفضل وكيل نفس الاطارات الي عندك
ومبروك

اذا ماني غلطان المكينة 3.0 صح ؟
لأني قريت في مواقع أجنبية انه يطلع صوت المكينة بسبب الRPM العالي في جير ال4 سرعات

حسب خبرتي الظاهر يحتاج ترصيص
او ان فيه احد الجنوط مطعوج

والاخوان يفيدونك اكثر