هل تؤيد النور العالي ؟ والزينون؟

إذا كانت غير أصليه أو مركبه منقبل غير مختص فغالبا ما تأدي إلى مشاكل كهربائية أو حريق للسيارة

اذا كان الزنون من الوكالة زي اللكزس او البي ام ما اختلفنا لأنها تقدر تقول قوية وماتاثلر على العين بقوة

ام اللي يركبونة على السيارات القرنبوعة ولونها اقرب للبنفسجي هذا المفروض يعطوه غرامة

+ مصادرة الزنون ... لانهم ماخذينها حق لعب واذية ...

السلام عليكم

بصراحه أنا أؤيد منع الزينون وبقوه وعنف أيضاً ...

أنا ولله الحمد نظري 6/6 ولكن ..

حين يقابلني أحد ويضرب العالي بالزينون أرى الدنيا سودااااااااااااء (( نوعا ما ))..

إذا ما هو حال والدي (( الله يطول عمره وأعمار جميع المسلمين بطاعته ))..

فهو مريض سكر وضغط ومسوي عمليه في عينه اليمين (( الحمدالله نجحت ))..

وهو من الناس اللي ما يحب المنه يحب يسوق سيارته بنفسه ...

فيجي واحد مطيور وبالزينون هذا (( حتى لو كان مو قاصد )),, راح يسبب مشكله للوالد ..


وبصراحه اللي يقول النور ضعيف ...

فيه حلول كثيــــــــــــــــــره ..

مثل أختيار نوعيه لمبات ممتازه ..

+

كتاوت

+

تركيب كشافات هالوجينه (( أتوقع أرخص من الزينون ))...

وما فيها أذيه مثل الزينون ...


تحيه طيبه

أنا ودي أركب زينون وأعظم وخاصة عندما يكون أمامك واحد من هالبزارين اللي يسوق في الليل وهو مولع النور الصغير (السكن)

يعني في الليل يولع السكن وفي النهار يولع العالي قمة التخلف!!!

مشكور أخوي كامري 2005 على هذا الموضوع المهم كثيييييراً بس أنا ماايد منع الزينون لانفيه ناس كثير محتاجينه بالاخص حقين الخطوط إلا اذا كان من النوع الممنوع من قبل المرور لانه خطير جدا ولا عاد تشوف حاجة والله يهدي الشباب

أنا اقول يمنعون الزينون حق الغرابي اللي لونه ازرق ... او يمنعون الزينون بشكل عام

ويكون مسموح بالنور العالي العادي اللي يجي في كل المواتر

ومشكوووور على الموضوع

يا أخي المشكله ليست في الأداه ..

بل في من يسيء استخدامهاااااااااااا ..

وشكرااااااااااااااااااااااااااا

والله يبن الحلال شوووف الزينون سلاح ذووو حدين زي ماااتفضلو الإخوان يعني تقدر تجهر الناس فيه وتقدر تنور المكان اللي أنت ماااشي فيه واللبيب بالإشارة يفهم؟؟؟؟؟؟؟؟؟؟؟؟؟؟؟

اذا كان فيه ازعااج بالليل اؤيد

او اللي مثلا يجيك بالنهار او بالليل خصوصا مشغل النور العالي ومسرررع بالطرق السريعه ويخوف العالم هذا منع وحجز سياره بعد


بس مرات مثل ماقالوا الشباب تتسفيد منه بالطرق المظلمه خصوصا داخل الحارات اما تشغله ولا تاكل مطابات الرياض كلهااااا

لو النظام يخلي الزينون مسمووووح للي عندو عدسات من الوكالة لأنو ما تعمي

اما اللي ما عندو فدا مخالفة ع شان مررررة يجهر الخلق

اخوي اولا شكرا على طرح الموضوع وثانيا العالي معقول علشان الخط في الليل

لكن الزنون صنعوه لدول غير دولتنا والمفروض يمنعوه لأن 5-6 امتار تفصل بين الخطين بالكثير في بلدنا ونور الزينون يعشي الخط الثاني بينما في امريكا لاترى الخط الآخر بسبب المسافة والأشجار
وجهة نظر

تحياتي

السلام عليكم
المفروض منع الزينون لانه اعمى الناس وسببت الكثير من الحوادث
وشكرا‘‘‘‘‘‘‘‘‘‘‘‘‘‘‘

انـا مثلا معي باثفندر نوره ضعيف جدا لا واطي ولا عالي .

وانـا اخطط على تركيبه بإذن الله .. بس مو ازعاج .. لأن نور موتري ضعيف جدا .

الزينون انا اشوف انه فوائده اكبر من مضاره
وبالذات في بعض السيارات اللي يجي نورها ضعيف
او للي كثير السفر وبالذات في الليل ويحتاج لاناره جيده
وصدقني اللي يبي يزعج الناس بيزعجهم حتى لو ماركب زينون
يعني العيب مو فالزينون العيب في اللي مركب الزينون





تحياتي

المشكلة مثل ما قال ميدو في العقول اللي تركب الزينون...

الزينون اذا كانت شمعاته نفس مقاس شمعات السيارة وما قلبت الشمعات :rolleyes:
أو رفعت وزنيته لفوق :rolleyes:

يطلع شكله جميل واضاءته قوية بدون اذية...

أنا مركب على سيارتي....نفس مقاس الشمعات ووازنه مزبوط...
والحمدلله محد اشتكى....( خليت كم واحد يمشوا بسياراتهم قدامي )

اضافه الى ان ظروف الطريق أحيانا تجعل النور وكأنه يجهر ويعمي...
مثل طريق غير مستوي وهذا يجعل مستوى النور عالي...

فحتى السيارات اللي يجي عليها زينون من بلدها أحيانا كثيرة تعمي بحسب الطريق...
مثل البي ام واللكزس والاسكاليد ( لأنه عالي )

والصراحه شوارعنا يبغالها زينون عشان ينور صح عشان ما نطيح في الحفر ونكسر سياراتنا...


وحسبي الله على من تعمد الأذية...

اذا جات على الزينون في العالي والواطي طيبة
لا وفي ناس يحطونة بالريوس وهاتك ادعية وسب في الادمي والله المستعان

الزينون ميزته ان اطوال الموجات فيه اعلى من طول الموجة الضوئية في الهالوجين اللي هو النور العادي لان مصدر انبعاث الضوء اقوى من الهالوجين العادي لان الزينون يستخدم يستخدم ثوران الغاز اللي موجود فيه مع قلة الضغط والكهرباء اللي مصعوق فيه الغاز هذا فيعطي طاقة اقوى وانارة افضل بينما الهالوجين او النور العادي بس قضيب معدني في زجاجة عادية خالية تماما من الهواء ويمر بالقضيب الملفوف هذا كهرباء يؤدي لسخونته ويضيء قولوا لي اي التقنيتين افضل ؟

بالنسبة للزينون هو افضل واكثر جودة من النور العادي واللي يستخدم الزينون هو من يسيء استعمالها .

حتى لو النور في العالي بالعكس هذا جيد لانه يعطي مدى رؤية ابعد

بالنسبة للكوامري وايضا السيارات الاخرى اللي النور الواطي فيها مايجي بعاكس صغير لابد انك تركب لمبة الزينون مع العاكس الصغير علشان يوجه النور للمسار المحدد وهو يكون فارش الارض .

وانا وجهة نظري ان الزينون فوائده افضل من مساوئه.

مثله مثل البلوتوث والله يعطيك العافية على الموضوع.

.
.
.
انا عندي في الاكورد زينون عالي واطي ,,, وماركبته لجل " التكبيس "
ركبته لجل " اضيء " المكان اللي انا فيه ,, لاني كثير اكون في مناطق اضائتها ضعيفة ,,,

المشكلة مو في الزينون ... المشكلة في العقول ,, اللي تركب الزينون


وخذ عندك التجربة الثانية في التاهوو ,,,, تصدق اني أمشي بدون انوار على السكن و الكشافات فقط
لان ارتفاع السيارة عن الارض ,, يخلي مستوى النور في عين السيارات الاخرى ,, لذلك لما اسوق التاهوو امشي ع الكشافات فقط ,,,

هذا مثال على ان المشكلة ليست في الزينون " تركيبه او لا " ,,, المشكلة في الاستخدام



ملاحظة :: اعطيني تعديلاتك ع الاستبيان وانا اعدله !!!

طبعا الزنون شكل.............وقوه ...............رائع جداً

لكن من ناحيه انه مؤذي للآخرين.............

هذا عيبه بس...

تحياتي.....