مرحبا اختي بنت قطر
انا اشوف البورش احسن بوايد من الرنج للاسباب التاليه :
البورش قطع غياره ارخص من الرنج واختلاف السعر بينهم وايد .
عند البيع البورش محافظ على السعر لكن الرنج ينزل سعره بشكل كبير جدا وخصوصا اذا استعملتيه
اكثر من سنه .
ويصبح غير مرغوب تماما لين خلص منه الضمان . لانه خرابه كثير ومشاكله اكثر .
من ناحية الامان والقوه والمتانه اكيد البورش يكفي انه الماني من شركه المانيه عريقه جدا فى
السيارات .
انا عندي بورش وطوارق ماشين معاي من احسن ما يكون . اهم شئ الصيانه الدوريه .
بالنسبه لاسعار التواير فهي نفس السعر للثلاث سيارات البورش والطوارق والرنج لانهم نفس
المواصفات . طبعا انا اتكلم عن رنق مقاس 19 .
والسعر فى الدوحه 1450 ريال للتاير فى جميع الموزعين المعتمدين لتواير مشلين .
الرنج فى الدوحه يتميز بشئ واحد فقط وهو توفر قطع الغيار بشكل دائم والخدمه الجيده لانه
الفردان هو الوكيل ومنظم كل شئ فى الوكاله بعكس الدرويش وكيل البورش اللي مشاكله ما
تخلص . بس سمعت انه اللحين الامور ماشيه تمام عندهم فى الوكاله .
وانا حاضر اختي لاي سؤال عندك . وياهلا ومرحبا فيك يابنت بلادي
تحياتي
