محتار وأبي أستشير إلى لهم خبرة في اليوكن والسوبربان

[CENTER]بسم الله الرحمن الرحيم

الأخوة الأعضاء

السلام عليكم ورحمة الله وبركاته|3|

الله يعطيكم العافية والله ينفع بمواضيعكم

والشكر موصول للقائمين على ها المنتدى

أنا في حيرة بنوع السيارة إلي أبي أشريها وأبي مساعدتكم

كل يوم تطلع لي فكرة سيارة جديدة وودي أشريها بعدين أفكر بوحدة أفضل وأبحث عنها وأشوف سعرها ثم بعد مده تطلع لي سيارة جديدة غيرها أفضل ....

أول كنت أبي الباجيرو ومقتنع فيه وخلاص كنت مصمل ثم تراجعت

بسبب ما سمعت عن وكيله أنه سيء من خلال المنتديات وغيرها، وصراحة استكثرت عليه
( 138 ) ألف وخاصة أن الباجيرو سعته التخزينية محدودة وتكاد تكون معدومة والمقاعد الخلفية غير مريحة مقارنة بسيارات أخرى، مع تقارب الأسعار
وكذلك يعتبر خاص بالمناطق الصحراوية أكثر منه للعائلة والسفريات مقارنة بسيارات أوسع منه وأفضل بالمواصفات وتعتبر عائلية ومريحة للسفريات وتستخدم في المناطق الصحراوية لحد ما.

وخاصة بعد أني ما ني حق طلعت كثيرة والسيارة إلي أبي أشريها راح تكون أكثر شيء للسفريات وأغلب وقتها في الكراج.

حينها فكرت بسيارة جنرال موتورز Z71 لتخصصها في الطرقات الوعرة وأريحيتها على الطرقات وذات سعة جيدة.

حينها ذهب إلى الجميح في طريق خريص ولقيتها عندهم بـ(145) ألف فل كامل LTZ حسب كلام الموظف

المهم قلت أنتظر عروض رمضان على وعسى ينزل سعره خصوصاً ما ني مستعجل عليه وحرام أدفع الحين وبكرة أتحسر على العروض

أدري بتقولون جلده بس من حقي أستغل العروض مثل ما يستغلونا الوكلاء 20.000 أو 30.000 فرق حلو، حرام يسرقونها مني وخاصة أنه ما يمديهم يقولن أنه غير متوفرة لأن ما عليها طلب.

بعدها شار علي الوالد الله يحفظه وقالي خذ XL >>>>> ما يدري أنه غالي علي الله يحفظه ( بس يسلفني )

المهم قلت XL .... XL عشان الأهل بعد ويمكن أجمع الحريم وعيالهم سوى

لا تصدقون مافيه إلا أنا وبنت الحلال بس

وأنتم تعرفون أن الـZ71 – NO xl

المهم اخترت اليوكن XL (SLT) (جنط 20+فتحة+جلد+دبل 4*4) ولقيتة بـ(173) ألف

ورجعنا قلنا خلاص هذا الموتر بس الوعد رمضان الله يبلغناه ويأكم

ثم جوني ناس وشاروا علي بالسوبربان قالوا أقوى وأفضل وسمعته معروفه وأنا قلت سعره أرخص

رجعت وطلعت لنا نقطة ضعف جديدة وهي هل أخذ LT بمحرك 2500 وأضحي في الباب الكهربائي الخلفي ومقابض الباب من الكروم.

أو الـ LTZ 1500 بمكينتة الأقل وأحصل على المواصفات كلها بس أضحي في مكينة الـ2500.

>>>>> وأخوكم في الله يبي كل المواصفات يعني الفل أوبشن.

وعلى طارئ السوبر واليوكن أبسئالكم سؤالين:

س1/ أيهم أفضل توجيه وتعليق الـ1500 أو توجيه وتعليق ألـ 2500. وهل هناك فروق غير ما ذكرت في السوبر بين LT وLTZ ؟

[/CENTER]
س2/ وهل في فئات اليوكن مكينة 2500 و1500 أو كلها نوع وأحد؟

[CENTER]نرجع للتكمله

وهنا طلع لنا في الأخير رجال الله يحفظة بمشورة الفورد اكسبدشن وأنه أريح وعطله قليل وأرسى على الخطوط وما هو مثل اليوكن والسوبربان سريع الأنقلاب المهم رحنا قلنا يمكن نرسى على بر ويوم دخلت الوكالة إلي بطريق خريص حسيت أن فيه شيء غلط في شكل الفورد.... وش؟ الله أعلم.

المهم سئلت عن أفضل نوع في المواصفات وكان الفورد اكسبدشن ليمتدد إلي في مقعده الثاني ثلاجة وبلون لئولوئي قلنا على بركت الله كم سعره قال (170250)ألف.

أول كنا بحيرة الحين صرنا بخبال لا مواصفات مثل اليوكن وسعر نار يالله العافية

والسوبربان واليوكن أطول منه وأوسع وأقل شيء شكلهم يفتح النفس

المهم

أدري طولت عليكم بس والله قربنا نخلص

أبي مشورتكم بسيارة من خلال النقاط التالية:

1. سيارة عائلية.

2. سعرها فيها إذا بغيت أبيع لا سمح الله.

3. سيارة للبر ( ماني راعي تطعيس طلعه أو طلعتين بالسنة مع الأهل ).

4. مريحة في السفريات.

5. قطع غيارها مؤ غالية.

6. أكثر المواصفات الجديدة فيها إذا مؤ كلها.

باختصار أبي أجمع أكثر شيء أقدر عليه من المواصفات في سيارة وحدة وأهم شيء تكون دبل4*4

تكفون لاحد يقولي لأند لأنه خارج ( حساباتي ) والبركة في أبو جميل

وأختم [COLOR=red]بسؤالين + سؤال[/COLOR]

أيهم أفضل الـ(LT أو LTZ) في السوبربان من خلال التجهيزات الميكانيكية والمواصفات الداخلية والخارجية في السيارة؟

أيهم أفضل اليوكن أو والسوبربان من خلال التجهيزات الميكانيكية والمواصفات الداخلية والخارجية في السيارة؟

هل تتوقعون ألقاء اليوكن xl SLT ( دبل 4*4 + فتحة + جنط20 +جلد ) بحدود ( 150.000 ) بعروض شهر رمضان؟ يعني أقل بـ 23.000 عن سعره الحالي.

الخل الوافي – أبو أنس – دكار -[COLOR=#153766] Genius_m – الأخوان في وكلاء GMC - الأخوة إلي لهم دراية كافية بسيارات الدفع الرباعي <<<<<<<<< نبي فزعتكم.[/COLOR]

ودمتم بعافية

[/CENTER]