(( قصتي مع الاكسبلورر وسبب عشقي و رغبتي لرفع السيارة ))
اخوكم فالله راعي بر واكثر ماطلع للنفود . << وانا من حايل وعندنا طعوس كبيرة وصعبة ولا يمشي بهالطعوس الا التويوتا والنيسان وغير هالنوعيه تتعبك كثير ولا تقدر تقطع مشاوير ولاتستانس وبس يدك على قلبك وكل شوي مغرز. طبعا مشاويرنا من 10 كيلو داخل النفود الى 60 . واحيانا المشوار الواحد من بعد مانصلي الفجر وحتى صلاة العصر وحنا بالسيارات . المهم ماطول عليكم خبرتي بهالاماكن جربت فكس ار 94 وجي اكس 97 ونيسان 2000 وشاص ... الخ . كتب الله اني اشتري (( فورد اكسبلورر )) ford explorer ماتجرئت اني استخدمه بالنفود . استخدمته فقط مشاوير بسيطه وسفر وبعض القيلات الصغيره << كشتات ... مشالله تبارك الله مايعوقه شي . شوي شوي وتجرئت قبل اسبوع وقلت للعيال تحملوني بالتغريز وشتريت قلص وتوكلت على الله ونسمت الكفرات 18 . طبعا كفرات الوكاله . ودخلنا كلنا نبي مكان اسمه الجفر يبعد اكثر من 15 كيلو شمال حايل كله نفوووود وعر . ولله الحمد الموتر اوك والشباب كل شوي بالجهاز يشيكون علي...!!! واقولهم توكلو على الله الامور زينه . ووصلنا الموقع ومافيه اي مشاكل ولله الحمد . وتعلمت امور جديده بالنسبه للفورد . الدبل الخفيف والثقيل وفصل مانع الانزلاق. والموتر ماشالله موجود قاعده جوال نوكيا ان 95 ومشغل القارمن . وجهاز مكالمات . كانو العيال يتشمتون يقولون قارمن جوال وفورد اكسبلورر وداخل للجفر..!!! وكانت سياراتهم شاص وربع ونيسان والقارمن المثبت على الطبلون وتوانك البانزيزن ووو الخ . وحنا في مكاننا طرت علي فكره وفكيت الحية السوداء الموجودة بالصدام تحت ... وجاء وقت الرجعه تجرئت شوي وصرت اجاكرهم وصرت احاول اتجاوزهم ..... وفعلا تم تجاوزهم . مثل ماقال احد الاعضاء هنا فعلا تسمع شحيط مواترهم وانا مسيطر على الوضع تمام . وتجينا الطعوس الكبااااااااار ويطلع الربع اولنا ماشالله مايحتاج الربع .والشاص ماقدر لانه محمل واجي انا بعد الشاص والحمدلله واطلع باول مره . ويجي النيسان بس للاسف ماطلع من اول مره !!! بس راعيه يقول ماخذت عزم. ماندري عنه !!! المهم بالاخير كل العايل الي معي تغيرت نضرتهم من جد عن الفورد اكسبلورر ... فعلا اغرمو بالسيارة ماتوقعوها كذا .. ولله الحمد القلص مانزلتله بالعكس صرت ادور احد متعلق اسحبه .
على شان كذا ودي اغير الكفرات على شان يوم كنت اجاكر الربع كان بطنه يحك شوي . طبعا الربع مايحتاج مشالله . الفورد ودي ارفعه لو بكفرات زينه بالنفود على شان اسوقه وانا مرتاح ان بطن الموتر مايحك...
وشكرا على زياراتكم...
