إزالة منبه السرعة والحزام وكل شيء للسيفيك 2006 وفوق...بالصور
تنبيه ... من أراد أن يطبق الطريقة فعلى مسؤوليته الشخصية...ولا يتحمل المنتدى أو كاتب الموضوع...
أي تبعات تحصل للسيارة جراء تطبيق الطريقة هذي...
بداية القصة:
أي واحد جرب الهوندا بشكل عام يعرف أن صوت التنبيه مزعج بشكل لا يطاق...
وأنا من أول ما شريت السيفيك وأنا اربط الحزام والحمدلله ..لكن المشكلة في منبه السرعة...
من أول ما يصير عداد السرعة على 120 يشتغل التنبيه..!!؟ طيب أنا أبغى امشي 120 يعني نظامي
ليش يشتغل التنبيه...!؟؟
ومن ذاك اليوم وأنا أدبر المكائد و أحْبُك الحيل حتى أتخلص من شره المستطير...لكن قاعدلي بالمرصاد...
حتى نزلت السيفيك 2009 وصار التنبيه مثل السيارات السيدان الاخرى (كامري-التيما-اكورد-لومينا) تنبيه بسيط على 120 وبعدين ينطفي التنبيه...وتؤشر لمبه في الطبلون وخلاص.
رحت الوكالة لعلها برمجة بسيطة للتنبيه وتنحل المشكلة...لكن قال المهندس يبغالك كمبيوتر جديد..!
في تلك اللحظة قررت الانتقام بالطريقة الانتحارية...(علي وعلى أعدائي)...
بأفك الطبلون وأفقع وجه المنبه إلين يقول بس...واللي يصير يصير...خلاص...
بحثت في المنتديات الامريكية حتى وجدت من فك الطبلون (وهم كثر) فاستعنت -بعد الله- ببعض الصور التي سأوردها الآن...
أولا : لازم تفك اصبع البطارية السالب...حتى لا تتأثر البرمجة أو يحدث التماس -لا قدر الله -
ثانيا: تفك الغطاء السفلي اللي تحت الدركسون(الطارة) وهي كلها كلبسات موضحة أماكنها باللون الأحمر
كل الكلبسات تنفك بالسحب...بس انها قوية شوي..اسحبها ولا تخاف..
فك المسمار المؤشر عليه بالاصفر
بعدين إبدأ بفك الجزء العلوي ولا تنسى تفصل اسلاك التحكم في ارتفاع النور (في الصورة التالية موجود اسلاك التحكم في المرايا ..النسخة الأمريكية)
بعد ما تفك الديكور...ستجد العداد لحاله مسكين لكني ماصورته إلا بعد ما فكيته...
عشان تفكه لازم تفك المسامير الثلاث المحاطه بالاحمر وتفك الكيبل المحدد بالاصفر في الصورة التالية
بفضل من الله تم اكتشاف وكر الارهاب والازعاج (مكان المنبه)
تفك الغطاء الابيض عن طريق كلبسات تحيط به من كل الجوانب (واضحه بس زيادة شرح)
هذا هو المنبه الذي اقض مضجعي لسنتين وزيادة...
طبعا توجد اكثر من طريقة للنفيس عن الغضب في المنبه..إما تكسره وإلا تعزله بحيث يكون صوته خفيف جدا..
انا حطيت عليه سيليكون شفاف وصار صوته خفييييف مره..
تخليه حتى يجف مره وتعيد تجميع الاجزاء بنفس الطريقة .. وتشبك البطارية وتشوف النتيجة..
انتهى بحمد الله
ملاحظات:
انا ما فصلت البطارية وهذا خطأ ... وبعد ما شبكت العداد ولع عندي اللمبة هذي (محددة بالاحمر في الصورة)
استمرت كذا ساعة وانطفت ومادري ليه اشتغلت وليه انطفت ...بس الحمد لله افتكينا منها..
الكلبسات قوية لكن...لا تفكها بطريقة مائلة او بشد قوي للبلاستيك وإلا ستتعرض للكسر
يوجد خلف العداد كلبسات بلاستيك خفيفة تعامل معها برفق وحرص..لأني كسرت واحد...خخخ
لا انصح بكسر المنبه لأنك قد تحتاجه..مثل الجنلط اذا كان مسحوب على خفيف وانت تمشي
يطلع تنبيه عشان ما يتضرر الجلنط...
واستمتع بالقيادة بهدوء...بدون منغصات...
أي سؤال أنا حاضر
والحمد لله الذي بنعمته تتم الصالحات.
