السلام عليكم
اخوي لو تدري ان الماركيز هي افضل سياره للاستخدام الشخصي كان ما قلت عنها ( تبهذلك )
الماركيز هي ددسن الاغنياء
انا وانا اخوك معاي ماركيز موديل 95 من وكالتها باسمي ما خليت دوله ما سافرت عليها والحمد لله ما قام قيرها الا قبل 3 سنوات بسبب اهمالي للعمود الخلفي كان فيه عله ويرج خفيف مرات عند تبديل النمر بسبب الحمل الزايد على السياره باحدى سفرياتي
والماركيز سيارة تعطيها كثر ما تعطيك بالضبط
وابوضح لك نقطه مهمه عن كل السيارات ذات القير الاوتوماتيك
ما انصحك انك تكبس للموتر وهو توه بيحرك بقوه لانه مع الوقت بيروح عليك القير بسبتها
ثانيا دائما احرص على العمود وشيكه من وقت لوقت لان عطله يسويلك خلل بالقير ومع الوقت يخبط
ثالثا بالنسبه لمشكلتك غير الحساسات اولا او شيك عليها وهي اوفر لك من تغير القير وتقدر تروح للتشليح وتخليهم يغيرون لك الحساسات بشرط انك تجربها عندهم واذا ما نفعت معاك الخطه ترجعها
لهم بنفس الوقت
فيكون غالبا ان القير خبط
رح للبيان واشتر عمرك وعافيتك وهم يبدلون لك قير بقيمة 1600 ريال وضمان وريح دماغك
لان التوضيب اذا انت بتوضب بنفسك وتجيب قطع الغيار وبتابع العامل بنفسك بتكلفك فوق 2500 ريال القطع بس لحالها
لان العامل يقولك ابوضب لك القير ب 1500 ريال او 1200 ولكن الحقيقه ما يركب لك قطع اصليه او يغيرلك كلتشات وكم ترس معدوم واللي فيه نص عمر يخليه لك يمشيك وقت ويخبط ثاني مره
والفورد عموما يحتاج منك تغير زيت القير والفلتر كل تقريبا سنتين او سنه ونص ولا يكلفك الا 150 ريال ويوفر عليك مشاكل القير وهذا شي يغفل عنه الكثير
وانا سمعت ناس يقولون لك لا تغير زيت القير هذا يخليه يخبط
ولو رجعت لكتيب الوكاله لقيته يقولك غير زيت القير كل مسافة كذا .....
هذا والله اعلم
