محتار بين الكابرس والفورد المستعمل

السلام عليكم

مساكم الله بالخير جميعاً

حبيت اخذ رأي اهل الخبرة لأني محتار بصراحة

اخوكم يبي يشري سيارة خلال الاسبوع الجاي بالكثير وحاط ببالي الماركيز أو الكابرس

ميزة الماركيز قطع غياره رخيص ومليان بالسوق وفيه كمية كثيرة منه نظيفة وكلن يعرف له

اما ميزة الكابرس فهو ان شكله حلو مقارنة بالفورد واحسه اكشخ وارز واثقل وسعره على موديله يعتبر حلو مقارنة بالفورد

يعني الماركيز 2004 و 2005 بالـ 50 والكابرس 2007 LS أو 2006 LTZ كذلك بالخمسين

من عيوب الفورد اللي ذكرت لي ان الموتر خفيف واقل لفة بالدركسون تخليه يحذف والامان فيه قليل مقارنة بالياباني <<< معه اكورد

والكابرس يقال انه اذا اخذت اعلى من LS فأنت تبي تدخل بمشاكل تصنيعية ووو لكن لقيت ناس اعرفهم يستخدمونه ويمدحونه ويقدسونه

فما ادري هل المشاكل اللي يقال انها بالكابرس في موديلات قديمة ووش وضع موديل 2007 والـ LS

وهل امان الماركيز كما قيل لي مش حالك ويبي له ركادة وسواقة شيبان ولا جيت تاخذ ملف طف الموتر ثم لف

برضه ماحبيت بالماركيز او الفورد عموماً انه طويل يعني مابقى الا جرس الريوس ويصير تريلا

طبعاً اخوكم من النوع اللي يحافظ على الموتر ويسوي له صيانة بشكل مستمر

يعني اكد الموتر وامسك به خطوط لكن بالمقابل ادلعه واسوي له صيانة كل فترة وفترة وما اخلي شي يخرب به ولا اهمله

والصراحة اني مهتوي الكابرس لكن الواحد يدور الافضل على المدى البعيد

آرائكم لو تكرمتم