بما ان الشتا قام يقرب شوي شوي .. نلاحظ ظاهرة او مشكلة اعتقد ان كثير من الناس يعانون منها ... اللي اهي دخول القطط للمحرك ( القطاوة باللهجة الكويتية او البساس باللهجة السعودية .. او البزازين باللهجة العراقية ) <-- صار درس ثقافة عربية :bigggrin:
المهم ان المشكلة يعاني منها نسبة كبيرة من اصحاب السيارات خاصة اللي يكون فيها مجال او فراغ او فضاوة في غرفة المكينة مثل الشفر القديم و الجمس و الفورد و اللاند كروزر و غيرها من السيارات ... و تكون المصيبة لما القطو يكون يم المروحة خاصة اذا كانت ميكانيكية .. تشوف هذا القطو المسكين يصير اشلاء و يتلف لك المكينة و تدفع مبلغ مو سهل للتصليح ..
احسن طريقة حق تمنع هالمتطفلين من دخول المكينة .. انك تجيب شبك خفيف نفس اللي يستخدمونه حق الاقفاص او قرقور السمك مثل الصورة ..
المهم ان يكون شبك خفيف ...
اذا بتسوي الشغلة بنفسك .. ارفع السيارة و انتبه و خذ بالك حط اي حجر علشان لا سمح الله ما يصير فيك شي اذا الرافعة خونت ..
شوف الاماكن المفتوحة للمكينة .. قدامك حلين .. يا تقص الشبك و يكون قطعة وحدة كبيرة يغطي مداخل المكينة من تحت بس بشرط تفتح فتحة لفلتر الزيت ... او ان تقص الشبك على حجم الفتحات اللي عندك ...
بعدين تجيب اسلاك حديد ( سيم ) و تربط اطراف الشبك مع اجزاء الشاصي .. ميزة الاسلاك انك تقدر تشكلها مثل ما تبي و بنفس الوقت اسرع و عملية اكثر من البراغي اللي ممكن تفلت خاصة مع الاستخدام و المطبات ..
بعدها اضحك عليهم لما بيحاولون يدخلون المكينة و يفشلون :bigggrin::smilie16:
