أستشارة بخصوص الباجيرو و العيسائي

اصل السيارة ما شاء الله جودتها عالية
والصناعة يابانية
وفر فلوسك وخدها من الامارات

ياليت تعطينا تجربتك .. كاملة عنه .. بالتفاصيل المملة ..

وصراحة بعته بسعر جداً زهيد .. صحيح أنهم قلة رواده .. ولكن لو صبرت عليه يجيه زبونه بسعر طيب :smile:

.. وننتظر تجربتك وسبب البيع .. وكيفية الشراء والتعامل معا الوكلاء والصيانة .. غيرها ..

ولك أطيب تحية

اخوي انا قبل سنتين صار لي نفس الشىء مع العيسائي . نويت اشتري ذاك الوقت باجيرو فل كامل وكان سعره 135750 ريال ودفعت الفلوس وماطلوني عشان شاشة الملاحة واسحب الفلوس منهم وقالوا لي لاتسحبها ترى سعره بيصير 140000 ريال لكن توكلت على الله واخذت فلوسي واشتريته من الكويت مع الجمارك الى الرياض (فل كامل ) 126300 ريال .

وتوني بايعه ب85000 ريال .

والله يوفقك

وعليكم السلام ورحمة الله وبركاته ..

والله أذا تبغى نصيحة .. أولاً صل ركعتين وأستخر ربك ..

وثانياً ..أذا بغيت العلم الي يجمد على الشارب غير (الملا) لاتدور (وكيل ميتسوبيشي في الكويت) الأفضل سعراً ومواصفاتاً وخدمة .. والله فعلاً أنهم يستاهلون وكالة الميتسو .. ماهو التخلف عندنا الله يعوضنا خير بسـ في وكيلنا ..:smilie20:

ولك أطيب تحية

كلها نفس الشئ بس هناك ارخص

ظالم يا العيسائي

السلام عليكم

الاخوان ماقصور وواح انهم اجمعو انك تشتري من الامارات وانا اتفق معهم

بالنسبة للشراء حتى تضمن المواصفات وان السيارة غير ملعوب بها عليك بالوكيل مباشرة وابعد عن المعارض وهذا هو الاضمن
كذلك سمعت ان الباجيرو في الكويت منتشر واسعارة جيده
انصحك تتصل على الوكالاء قبل السفر وارقامهم تحصلها في النت في موقع متسوبيشي الرسمي
وابشرك انك اخترت سيارة تستحق الاقتناء ولو تفكر في 3.8 افضل لان فرق الاحصنة اكثر من 70

في الختام انصحك بالاستخارة

بالتوفيق
صالح

اتمنى لك التوفيق

وتوكل على الله الفرق يستاهل تشتري من الامارات

الله يعطيكم العافيه يا اخوان بس و الله كثير ناس خوفونا من الامارات وان عندهم تلفيق و تخبيص كثير بالسيارات بعضهم يقول ان السيارات تجي تدركسون يمين ويغيرونه يسار :confused1:

وعليكم السلام ورحمة الله وبركاته


خذ لك من الكويت او من الامارات

اما بالنسبة للوكيل فصدقني ماراح تحتاج له

واذا صار في السياره شي وكالاء الخليج افضل ضمان من العيسائي
كلها كم كيلو (خلها سفره وتصليح)

اضافة الى ذلك ارخص بحوالي 20 الف

اما الدفلوك تقدر تركب بـ 5000 الاف من شركة مشهوووووره


وانا افضل لو تاخذ لك 3.8 من الكويت او الامارات (ولو كان اقل نوع منه لانه يجي اقوى وافخم من 3.5 بفرق)

وتلقاه في الكويت بحدود 128الف على حسب ماقريت (واخر السنه يسوون تخفيضات)

وبالامارات بـ 130 الف واصل للسعوديه على مااظن

حاول تتواصل مع الوكيل في الخليج وهم يفيدونك


والله يكتب لك الخير

انا اضم صوتي للشباب واقول خذه من الامارات ووفر على نفسك

وتوكل على الله الضمان على الورق فقط واذا احتجته ما استفدت منه

أخوي فيه طريقة يكون الضمان شامل يعني يشملك وكيل السعودية ولو السيارة من الإمارات

ولاكن ما أعرف الطريقة

تقدر تستفسر من الجمارك السعودية يفيدونك من ناحية الضمان مادامت السيارة جديدة

والموديل حديث السنة

أو تتصل بوكيل ميستوبيشي في الإمارات يمكن يفيدونك من هذا الخصوص

ولو صار الضمان عندك شامل يضمنك الوكيل غصب عليه

وإذا رفض الوكيل لاتتفاهم معه روح لوزارة التجارة ويرسلون معك مندوب يلزمهم على الضمان

أو يغرمونه ويسببونله مشاكل عويصة والوكلاء يخافون من المشاكل

والله أن يتنافضون لو يدرون أنك رايح لوزارة التجارة

الوكيل المحلي (على علاته) يبقى الخيار الأريح
والجديد بحفظ الله ما يبي وكيل
لكن ما يدري الواحد

الى يسمعك يقول انك شايل مليون روبية فى جيبك.
كلها خمسين ستين سبعين الف ريال ابو خمسمائة ورقة،
تحطهم كلهم فى جيبك......
ولا حولهم الى دراهم ورقة الف،
عليك الحساب كم ورقة فى جيبك.
ورق فى ورق على كولة العراقيين!


انصحك بالشراء المباشر عبر الأعلانات التى تجدها فى الجرائد الأماراتية/دبى.

يعني نتوكل على الله و نسافر الامارات

طيب يا اخوان ايش فضل طريقة للدفع للشخص الي يبغى يشتري من الامارات غير الكاش علشان الكاش مشكله يضيع وتشيل معك مبلغ مشكله

و الشيك المصدق يتاخر يومين

و التحويل بعد مشكله

:( ياليت تفيدونا

انت تتكلم عن ميتسوبيشى باجيرو اليابان
مو صناعة امريكية....

من تجربة،
لاداعى اصلا للخوف من الباجيرو بحيث تجعل من
الضمان اساس فى قرارك.
ضمان هذه السيارة فى سمعتها من واقع تجربة.
لذلك تجد بعض الوكالات كما فى بعض دول الجوار يعطون ضمان
كبير جدا!
مو كرم منهم ولكن يعرفون ان السيارة هذة خالية من المشاكل!

و الله كلامك صحيح اخوي ابو ديالا

حط العشرين ألف بجيبك

والله الضمان ما يغطي إلا الحاجات البسيطه , أي شي مكلف يدبسونه براسك بحجة سوء الإستخدام

وإذا لا سمح الله صار شي بالسيارة عندك العشرين ألف تنفض فيه اللي تبي .

ولا تنسى إنه إذا كنت تبغى سيارتك تكون على الضمان لا بد تراجع الوكالة كل 5 الآف كلم وكل زيارة لها حسبتها .
وإذا مشت سيارتك 60 ألأف كلم بتكون زرت الوكالة 12 مره

يعني الفرق المادي يكون كالتالي ( 22 ألف + تكلفة الصيانه لعدد 12 زياره ) وعليك الحساب .

هذا رأيي الشخصي ويبقى القرار لك لأنك أنت اللي بتشتري

و الله الواحد محتار اتمنى احد يقنعني اكثر :(