اما انا فكنت في زيارة ترفيه للشرقية بجمس 1978 أحمر وكان هذا الامر قبل حوالي 7 سنوات وطبعا كنت أسمع عن شاطيء الهافمون فقلت خلني أمره وأشوف وش ذا الشاطيء....
طبعا خويكم وصل الشاطي وكان أيامها مدينة العاب الحكير توها بدأت وكانت هنالك أكشاك للبيع بشكل سمكة (لا أدري إن ما تزال موجودة الى الان أم تغير الوضع نظرا لاني لا أزر تلك المنطقة منذ ذلك الحين).
لا أطول عليكم,,, طبعا قلت خليني أجرب السباحة في مياه الخليج وهاذا أنا مغير ملابسي وطب...... وانا غاطس في البحر.
طبعا أستمتعت فعلا بمياه الخليج الدافئة وقت العصر وانا اتسبح إلا وأشوف ذاك الهايلكس اللي يرقى طعس كبير بجانب الشاطيء وينزل من الطرف الثاني ويكرر العملية ولا كأنه ماشي فوق رمل وطبعا جلست أناظره طوال سباحتي وقلت ليش ما أحاول أقلده (اخس على التقليد عمره ما كان ينفع) وما ألاقي نفسي إلا وأخرج من الماي واجفف نفسي وألبس ملابسي الداخلية فقط (فلينة وسروال سنه) وأركب وأتوجه على الطعس....طبعا وأنا نافخ صدري
المسافة اللي خليتها عني وعن الطعس (مسافة الاقلاع) كانت كافية للهايكلس أنه يرقى الطعس بكل سهولة فقلت الجمس موتره أقوى (8 سلندر) وراح يجيب هاذا الطعس بكل بساطة طبعا وأهجم وأنا قايل (جاكم لاعصار وخر عن طريقه) وأقول في نفسي أن رواد الشاطي سوف يندهشون لهذا الجمس الاحمر اللي يرقى الطعس بكل سهولة وياليت هالهفة أو الصفقة في دماغي ما صارت. طبعا تعرفون وش اللي صار. غرز الجمس تغريزة عمر أبوه ما غرز مثلها من قبل.
طبعا من حوالي الساعة 5:30 عصرا وحتى العاشرة مساءا وأنا حايس في تطليع هالبلوة (الجمس) من الرمل. الناس تطوف حولي وأبدا ولا جنبك أحد!.
إلى أن ربنا وفقني بواحد إبن حلال راعي كاديلاك جلس يناظرني من بعيد في الاول ومن ثم جا وجاب معه لوح خشب طويل (قرابة مترين) وجلسنا نحطه تحت الكفر حتى يمشي شوي ويغرز ثاني وعلى كذا حتى طلعت من الطعس حوالي العاشرة مساءا
تشكرت من أخي صاحب الكاديلاك (ما أذكر أسمه بس جزاه الله خير) ورحت للشاطي تسبحت لإزالة أثار الرمال من على جسمي وركبت موتري بعد ما صارت رمال طعوس الشرقية كلها داخل الجمس وتوكلت على الله وعلى طريق الرياض (رقدت في السيارة يوم غلبني النعاس بالطريق بجانب محطة بنزين ومن ثم أكملت ثاني يوم حتى وصلت الرياض وعلى طول مسكت طريق الطائف وما وقفت الا لتعبئة البنزين أو قضاء الحاجة أو شراء شي أكله أو اشربه حتى وصلت منزلي في مكة.
من يومها لا طفت الشرقية ولا أدري وش اللي تغير فيها بس إنشاء الله راح تكون لي زيارة حين عودتي للوطن لاني فعلا مشتاق لايام زمان.
أعذروني على الاطالة وأشكر لكاتب الموضوع فرصة تجديد نشاط ذاكرتي بهالقصة.
تحياتي|3|
