السلام عليكم
اليوم عصر كنت امشي في احد الشوارع الرئيسية في الرياض وسرعتي نظامية وقدامي سيارة وعلى يميني سيارت وانا بالمسار الايسر
وكان وراي واحد مدري وش يبي حاط صدامه بصدام سياراتي ويكبس انوار ويضرب بوري والاشكال هذي كثيرة المهم انا ما اقدر اطلع يمين بحكم ان يميني سيارات وقدامي سيارات
مادريت الا والمتخلف طلع يمين وكان مسرع وكانت المسافة بيني وبين السيارة الي قدامي نظامية وضيقة
وشوي الا ويحدني ويخش بيني وبين السيارة الي قدامي ثم ضربت فرامل وفرت سياراتي يسار وضربت الصبات كان الصوت قوي ( انا قلت السيارة راحت فيها من قوة الضربة) ثم ارتفع ضغطي لانه مشى لحقته
وصفيت جبمه ثم اشرلي يقول انقلع (على فكرة ضربة الصبات كانت في الكفر والجنط اما البودي سليم ولله الحمد) المهم يوم قال انقلع طلع لي الشيطان وقال اصدمه والله واصدمه بالرفرف الايسر لسيارتي ويختل توازنه ويقوم يبترم يبترم قدامي ثم صدمته مع الجنب يم اعترض قدامي ثم في الاخير صارت سيارت جنب سيارتي وهو عاكس يعني باب السواق في باب السواق
السيارات ماصار فيها شي قوي سوى بعض الحكات ويوم نزل من سيارته كان يزبد ويرعد والمشكلة انه رجال كبير لحيته فيه شيب قلت ياولد الي بنتهاوش ويمكن يتطور الامر الى مالاتحمد عقباه
قمت ودعست وخليته
السؤال الحين هل اذهب للمرور وابلغهم على نفسي ولا انتظر لين يبلغ علي ولا وش السواة والله اني نادم اشد الندم رجاء ارشدوني
