قررت التخلص من سيارتي المازدا 6 2014 بسبب ( كارثة العزل وصوت الهواء ) من يشتري ؟!

هل تمتلك السياره

الرجال يشتكي من العزل ما قال مكينه خربانه او قير ضرب او مشكله كبيره بالسيارة وليس كل ملاك السياره يشتكوا منه انا أشوف السياره ما يعيبها شي

المشكلة أن الناس بس تسمع أنه ياباني .. يعني خلاص ما في مثله أبد

أنا اتفق مع صاحب الموضوع ان العزل الهوائي فاشل
ومزعج جداً ، وكذلك العزل الأرضي سيء ..

انا ماني عارف ليش الناس تعير الانتباه لهذا الشي "عزل الصوت" ؟ , بالنسبة لي ما الفت له كليا ولا حسيت فيه شي غريب وكل يوم انا ماسكـ الخط الدايري ولا اتضايقت في شي من السيارة الحمدلله ! , ما ادري اللي فهمته ان هذا الامر يفرق من شخص لشخص والله اعلم ؟

لفت انتباهي الشخص Altima Forever اللي يقول سعر الفل المبالغ فيه !!!!!!!!!!!!!!!!!!!!! , الله يصلحكـ يخوي مو عشان عندكـ التيما , لكن اقلكـ اتحداااااااكـ تلقى سيارة بنفس المواصفات والميزات الممتازة واللي تجي في السيارات الفخمة , وتلقى الموتر يبناع باقل من 100 الف ؟ , بس تخيل هذي السيارة بنفس المواصفات وبنفس المميزات عند تويوتا كم تتوقع يكون سعرها ؟ (اجزم بانه اقل شي 120 الف) !

السياره ذات تصميم رياضي لكنها لا تعتبر رياضيه ابداً ابداً .


انا معي السياره وهو فعلاً في صوت لكن بالنسبه لي اعتبره عادي جداً و طبيعي و وجيد بالنسبه لشوارعكم والسياره من ناحية الرساوة والثبات ماعليها كلام ثابته جداً بالخطوط وراسية

واكبر مشكلتكم يالسعوديين انكم تسوقون بشوارع مكسره وخشنه ومقشره وتجي تقول العزل الاراضي خايس وانا اسمع اصوات الكفرات .
البلا من شوارعنا المخيسه مصممي السياره يوم جربوها جربوها على شوارع اليابان
واكبر دليل جرب السياره على شارع ناعم او جديد راح تحترم سيارتك جداً وتلقاها هاديه مره .
وهذا السبب اللي مخلي السعوديين ماغير يسبون بعزل كل السيارات الا ماقل وندر منهم .
السبب هو شوارعكم الزباله الله يكرمكم.

اخوي صاحب الموضوع اليوم روحت للوكاله الي بالشفاء وبلغته عن سالفة العزل الرجل واثق ويقول اتحدى ومحد جاء اشتكى منها تكفى اذا انت بالرياض روح ..

اخوي صاحب التيما هل تصحني بالتيما ووش الفرق بين 13 و 14 التيما عاجبني سعرها عندنا بس لمن بحثت لقيت في مشاكل الوكيل وقطع الغيار والقير وهل القزاز التيما مدبل ولا عادي .. كلام موظف العيسى يقول القزاز مدبل عشان العزل يعني زي الكزس ... وشاكر لك

هلا أخوي

بالنسبة للسعر و خصوصا في اﻹمارات على المازدا يعتبر مبالغ فيه ﻷن المازدا ليست مشهورة مثل النيسان و التويوتا و الهوندا و الغالبية العظمى من الناس تفضل اي نوع من الي ذكرتهم على المازدا، في البداية لما كان السعر 105 ألف درهم أنا كنت فرحان ﻷنهم بهذا السعر ضربوا الكامري ضربة قاضية ﻷن الكامري الفل سعرها 105 ألف درهم فأكيد الي بيشتري سيارة بيروح للمازدا ﻷنها نفس السعر و بمواصفات أكثر عن الكامري و عن الهوندا أكورد و أرخص، ولكنهم رفعوا السعر حتى وصل ﻷعلى من الكامري الفل و اﻷلتيما ستة سلندر فل و أقل قليلاً من اﻷكورد فل أربعة سلندر وبذلك خسروا المبادرة الي كانت بتخليهم يبيعوا أكثر و تشتهر السيارة في السوق، سعر الفل في السعودية 98 ألف ريال و في رأيي هذا السعر مناسب جدا.

بالنسبة للألتيما سبب رخصها ليس لعدم رغبة الناس فيها أو بسبب السي في تي، عندي صديقي في وكالة النيسان في دبي سألته عن السبب في رخص الفل ستة سلندر عن السنة الماضية و قالي عن 3 أسباب وهي:

1- إلغاء فئة النص فل 3.5 sv
2- وضع سعر اﻷلتيما بعيدا عن سعر الماكسيما
3- للمنافسة في سوق الستة سلندر وجعل اﻷلتيما في متناول الجميع

وصراحة ان اﻹستراتيجية ناجحة جدا حيث ان اﻷلتيما صارت منتشرة بشكل كبير و كما ذكرت اذا أخذت الفل ستة سلندر سعرها ممتاز مقارنة بالمنافسيين، سعرها 106 ألف درهم أقل من المازدا 6 الفل و اﻷكورد أربعة و ستة سلندر الفل و أغلى بألف درهم فقط عن الكامري الفل.

بالنسبة لوكيل المازدا صراحة صيانته صارت سيئة مع مرور الوقت و هذا الكلام عن خبرة 10 سنوات معاهم حيث اني امتلك مازدا و دائما اوديها الصيانة كل 5 ألاف، حاليا النيسان في اﻹمارات في مركز و مستوى ممتاز و أسعارهم جيدة جدا و في إقبال كبير عليها و يكفي انهم من شهرين أخذوا جائزة عالمية كأحسن وكيل سيارات في العالم في خدمة ما بعد البيع و تشمل الصيانة و توفر قطع الغيار.

بالنسبة للفرق بين اﻷلتيما الخليجية و اﻷمريكية فروق بسيطة و لا نحتاجها في دول الخليج مثل تسخين الكراسي و المقود فهي غير ضرورية بالمرة و العجلات في اﻷلتيما اﻷمريكية الستة سلندر تيجي 18 انش و هنا تيجي 17 انش هذا كل الفروقات.

وتقبلوا مروري

Altima Forever

فعلا عيب كبير وتوني انتبهت للموضوع انه لون الديكورات اسود مع انتي امتلك الفل اقول ليش السياره بارده بالشتاء الحق ابيع قبل لا يدخل الصيف.

واضف الى ذلك العيب الكبير لون الديكورات كله اسود في اسود

حتى الفل كامل مايفرق الا ابيض على الكراسي فقط والباقي اسود

يعني حار جدا بالصيف وبارد جدا بالشتاء

السلام عليكم ،

أخوي أحمد ، أنا من ملاك السيارة وحتى اللون نفس اللون اللي عندك :)
صوت الهواء في نظري معقول وخصوصاً أني جربت السيارة أكثر من مرة على الخطوط السريعة وأنا لا أعتبره سيء أبداً.
نعم الصوت موجود ولكن لا أعتبره مزعج.

أذا أنت مش مرتاح من السيارة ، فأنت عندك كل الحق أنك تعرض السيارة للبيع ويكون هذا درس انك تجرب السيارة تجربة كاملة قبل ما تشتري . وأنا أنصحك أنك تستأجر السيارة لمدة يومين علشان تعرف المميزات والعيوب قبل ما تقرر أنك تشتريها.


والله يوفقك بالبيعة...

عارض موترك للبيع وذكرت هالسبب


انت شجااااااااااااااااااع

المشكله انها كل العزل فيها تعبان سواء صوت او هواء على كلامك
لان الي اعرفه السياره كل ماكان عزل الصوت فيها قوي
بتخف الاصوات وبتلاحظ اضعف الاصوات وهي دخول الهواء وهذي حصلت معي في التورس
ذات العزل الصوتي الجبار

وحتى الكامري عزلها جدا تعبان لكن صوت المكينه خفيف على سرعات معقوله 120 140 ويكان ماينسمع الى اذا رده نمره
وصوت الهواء وقت الاجواء الطبيعه اسمعه اذا مشيت فوق 100 وبشكل متقطع وليس مستمر اما اظا الجو كان متقلب يزيد الهواء وممكن تسمعه على 80
اما الرساوه فيها مره تعبانه على سرعه 100 تروح يمين ويسار مع الهواء

الموضوع مو موضوع صادق ولا كاذب مساله العزل تختلف من شخص لشخص وتقيمها يخلف وفي ناس ما تهتم له وفي ناس تركز عليه كثير ولو جربت كل السيارات في فئاتها كلهم حول بعض مع اختلافات بسيطه.

للأسف مشكلة العزل في مازدا الجديدة تكررت كثير

بين ملاكها ( الصادقين) .. والله يكون في عونك اخي

الكريم .. وإن شاء الله يعوضك الله بسيارة أزين منها .

بخصوص السعر اشوفه معقول وغير مبالغ فيه نظرا للمواصفات التي قل مانشاهدها في سيارات لفئات اعلى ..

واتفق معك في مسألة العزل وصوت المحرك بالاضافة الى قساوة التعليق بسبب انها في نهاية الامر سيارة رياضية بمعنى الكلمة حتى وان كانت ذو اربع سلندرات ..

والاتيما سيارة جميلة وأرى من وجهة نظري تدني سعرها بسبب نوع ناقل الحركة CVT الغير مرغوب لدى البعض بالاضافة الى قلة المواصفات مقارنة بالاتيما الامريكية مثلاً ..

اجل وش اقول في الاكورد شكل ٢٠٠٨ -٢٠١٢

السيارة الي معي فل

عاجبتني في كل شي الا :

العزل الارضي-صوت المحرك باالنسبة لي ازعاجه قوي نوعا ما

اصواات الديكوور الي هبلت بي :(

خذت الافالون حقت اخوي....بغيت اصيح من قوة الفرق في كل شبر

والراحة وتحس فعلا انك شاري سيارة !!

عمري مااقتنعت في سيارة كثر الافالون ..لولا قطعها الغالية

اعتقد العزل في هاالفئة واحد تقريبا فلا تشيل هم

ولو كان قوي راجع الوكالة والله ييسر امرك

هلا بالشباب

بالنسبة لصاحب الموضوع أقوله الله يكون في عونك، أنا جربت السيارة 3 مرات وقررت اني ابعد عنها لثلاثة أسباب وهي:

1- صوت المحرك.
2- عزل الهواء.
3- سعر الفل المبالغ فيه.

أنا جربت السيارة بمحرك 2.5 و فوجئت ان صوت المحرك عالي و كان أعلى من صوت محرك اﻷلتيما ستة سلندر، وأيضاً صوت الهواء كان مزعج مقارنة بعزل اﻷلتيما الممتاز، وبالنسبة للسعر الوكيل في اﻹمارات نزل السيارة بسعر 105 ألف و لما باع الشحنة اﻷولى رفع سعر السيارة في الشحنة الثانية ل 110 ألف و حاليا سعر السيارة 113 ألف الفل لذلك قررت اني أكنسل فكرة المازدا 6 و قررت أخذ ألتيما ستة سلندر فل بسعر 106 ألف درهم ( سعرها 109,500 بالتأمين لمدة سنة )، السبب في المقارنة بينها و بين اﻷلتيما هو اني كنت ناوي على واحدة من اﻷثنين ولكن الكفة تميل لصالح اﻷلتيما لهذه اﻷسباب و أسباب أخرى حيث اني جربت السيارتين 3 مرات لكل واحدة و اﻷلتيما كانت تتفوق في كل مرة.

وتقبلوا مروري

Altima Forever

مع ان العزل ليس بذلك السوء بالنسبة لي بل اكاد اجزم ان سيارتك فيها مشكلة حقيقية بالربلات ولك ان تتأكد في الوكالة او تجرب تست درايف عندهم .. وانا عندي تنسيم خفيف في الزجاج الايمن الخلفي واتوقع من الربلات لامحالة ..

عاد توني جاي من البحرين قبل ساعة وكنت امشي في حدود 120 والعزل جيد نوعا ما وليس "مزعج" !! ..