مساعدتكم في اختيار السيارة

نقطة جميلة اخوي ابو اسد بخصوص التهوية الداخلية ، وتهمني كثير خصوصا اني ما افتح الهواية الخارجية الا نادرا .
افضل تنسيم السيارة عند ايقافها على اني افتح الهواية الخارجية .



السيارة حلوه لكن فيها ميلان واضح جهة اليمين ، ومشكله عالميه حتى مالكينها من امريكا يشكون منها .
الشي الاخر شكل السيارة لم يعجبني ، يعطيك العافية .


اليوم جربت اليوكن عن طريق الجميح ،
السيارة جميلة بشكل عام لكن لاحظت الفرامل ثقيله وسيئة فرق كبير في الاستجابة بينها وبين سيارتي الحالية.
قبل فترة جربت الباترول ، فراملها افضل من اليوكن بمراحل .
اليوكن الشهادة لله ماتحس انه سياارة كبيرة ، ملمومه وتقنياتها جيدة رغم ان الفئة المجربة الستاندرد.
باقي اللاند ماجربته ، وشكلي بنتظر نزول الموديل الجديد رغم توقعي بارتفاع سعره بشكل مبالغ فيه ..

يعطيكم العافيه ياشباب جميعا على مقترحاتكم .. والله يكتب اللي فيه الخير

دامك بتستخدم فترة طويلة خلك على النيسان و التويوتا

لاندكروزر gxr 2016 الجديد او نيسان se بلاتينيوم

إذا مستخدم لكزس وكنت مرتاح معه, ونفس الوقت معك ميزانية GXR V8

أنصحك بلكزس لك وللزمن ومتماسك ومحرك أقوى من جسم السيارة وهي GX460
جيب حقيقي صناعة يابانية بحجم متوسط ومحرك 8 سلندر وتوفر صف ثالث من المقاعد ونفس الوقت كشخة في المناسبات وغير منتشر يعطيك تميز

مافي زي الباترول.. من واقع تجارب وإمتلاك الباترول افضل الخيارات كسيارة عائلية

تمشي في جميع الدروب ( بطل الدروب) .. ومستوى الراحة والعزل هو الأفضـــــل .

كلام صحيح , امتلك لكزس اي اس 2011 وتاهو 2012 ونظام التهوية في اللكزس اقوى من التاهو يعني لو تقفل التهوية الخارجية في اللكزس تحس بنسبة بسيييطة عكس التاهو الي هواه ملحوظ وانت في الخط , لكن في التاهو التهوية من داخل السيارة يزيد من قوة التهوية على الاقل وهذا مع كل السيارات ..

نقطة أخيرة نسيت أذكرها لأخ Pioneering

شفت هذا الزر بالمكيف

الي تقريبا مافي ولا سيارة حديثة إلا فيه هالزر الي يخلي الهواء يدون بوسط السيارة ومايجي من الخارج

حبيت أقولك أنه (من باب المزح فقط) شكل على الفاضي بأغلب السيارات الأمريكية :smilie16:

لا بل أقصد أنه بأغلب السيارات الامريكية لا يأدي مهمته الحقيقة بشكل كامل وهذي نقطة مهمة جدا بالنسبة لي ما أشتري سيارة

فياكثر ماجربت اليوكون وبعض سيارات فورد تضغط هالزر لكن للأسف مازلت تشم روائح سيارات وتريلات الديزل وأذا مامريت بجانب أماكن مقرفة مثل البيارات وأنت بالكرامة للأسف تدخل بوسط المقصورة وأنت مشغل هالخاصية

يعني ممكن ماتشتغل عند الأمريكي إلا بفاعلية بنسبة 50% :c0214:
وهي مهمة أيضا بعزل حرارة الهواء الخارجي الحار علشان تبريد أفضل
وايضا عزل الاتربة والغبار أذا كان الجو مليئ بالرياح المحملة بالاتربة

تستطيع التأكد من كلامي بنفسك لما تجرب سيارة يابانية ثم تجرب بعدها امريكية

ماشاء الله , الاخ أبو أسد ما قصر

و انا أقولك بدل اليوكون SLT بـ تاهو LTZ , أجمل شكلاً فقط , لا يوجد فرق كبير بينهم .

و رغم أن اللاندكروزر سيارة ممتازة للغاية , لكن طلعها خارج خياراتك ..

أنصحك أذاً في اثنين ( باترول SE و تاهو LTZ )

و أنصحك تستخير الله , فهو سبحانه افضل من تسأل

و تاخذ الأفضل لك من ناحية الراحة النفسية + المادية , و عسى الله يبارك مقدماً

ما عقب رأي ابو اسد رأي ما شاء الله

رأيي المتواضع خليك وسط لا يوكن غير العملي ولا لاند ضعيف المواصفات وشوف الباترول


فيه شي جيد لدى وكيل اليوكن ولا ادري هل مطبق في بقية الوكالات ولا لا .. وهو تمديد فترة الضمان لعدد معين من السنوات وطبعا بمقابل مادي ...


والله يوفقك

ماشاءالله ،
الله يزيدك من علمه ،

شكرا على الرد الوافي والله يعطيك العافيه ،

اللاند عاجبني بس مشكلة ال gxr شح المواصفات .
يعني اللي مخليني متردد ان مواصفاته اقل من سيارتي الحاليه ، فبيصير بالنسبة لي داون قريد .
يعطيك العافيه اخوي




اللي متخوف منه الجودة ، يعني لما تستخدم سيارتين نفس الفترة وطبيعه الاستخدام.
ستجد ان سيارة عن سيارة تفرق. عالعموم الله يعطيك العافيه يالغالي والله يكتب اللي فيه الخير ،،




الله يعطيك العافيه اخوي عالنصيحه ،

وعليكم السلام

اليوكون طبعا بيكون أفضل من ناحية المواصفات والتكنلوجيا وماشابه ... الخ

لكن أعتمادية! لا أعتقد ذلك أذا تمت مقارنتهم بالعملاقين اليابانيين لاندكروزر وباترول
وترى اليوكون لو تبحث عنه بالصيانة راح تجد فيه تعقيدات كثيرة جدا مقارنة بهاتين السيارتين يعني عادي مستقبلا تحصل مشكلة تفحص وتصلحها وتحصل انك ماصلحت المشكلة بسبب أنها لم تكن المشكلة الاساسية وياكثر من تحصل له بسيارات الامريكية, لا أنكر أنه الياباني ممكن يصير له نفس الكلام لكن بنسبة أقل بسبب بساطة صناعة السيارة في أغلب الاشياء وتقليل التعقيدات بها وهذا مايجعلها أسهل صيانة عن غيرها وأن كانت فيها بعض التعقيدات لكن تكون كمافي الامريكي تعقيدات مع احتمالية مشاكل متكررة مستقبلا

وعلى فكرة كثيرين ياخذون لاندكروزر وباترول ولا يعرفون البر خير شر
كنت بالبداية أنتقد أختياراتهم لكن مع الوقت ما صرت ألومهم فالي يبي يبحث عن راحة البال لفترة طويلة يبعد عن المنتجات الامريكية أفضل له (قد أقول ياخذ خيار الياباني المنافس لليوكون والتاهو والاكسبدشن أقول افضل وهم السيكويا والارمادا لكن مشكلتهم طولو جدا ماتغيرو لذلك اللاند والباترول بيكون ساعات افضل وليس دائما)

حبيت أوضح لك فكرة ان نظامين الدفع الموجود بالاندكروزر والباترول كلهم يعتبرون نظام Full Time 4WD

هذا النظام صحيح مخصص للطرق الوعرة لكنه بنفس الوقت تم تصميمه للثبات بالطرق المعبدة لأن السيارة طول الوقت تمشي بدفع الرباعي المستمر (على الخفيف High طوال الوقت) وهذا يعطي ثبات ممتاز وتماسك بأصعب الظروف

يعني فيه فرق شاسع بينه وبين تاخذ سيارة دفع خلفي فقط بالثبات
حتى لو أخذت اليوكون دبل يضل نظام اليوكون الدبل عبارة عن Part Time 4WD أي أنك ماتشغل الدبل إلا عند حاجتك فقط ولا تستطيع السرعة عليه بسرعات عالية وأغلب الوقت على الدفع الخلفي

على فكرة ممكن بتقول ان هذي الشغلة الدفع الرباعي المستمر بتزيد صرفية السيارة
لا تخاف الموتر يمشيك بالخط كثير
ففيه فرق بين تانكي اليوكون الي سعته 98 لتر وبين تنكي اللاندكروزر والباترول الي سعته 140 لتر

وعلى فكرة تعليق هالسيارتين اللاندكروزر والباترول يتحمل الطرق المكسرة أكثر من أي سيارة أخرى لان السيارة مخصصة بالدرجة الاولى للطرق الوعرة يعني الموتر راح يضل متماسك معك داخليا وخارجيا أكثر وأطول من غيره

لذلك نصيحتي لك خذ باترول أصرف لك
السبب أني لم أنصحك باللاندكروزر هو أن اللاندكروزر لا يتفوق على الباترول إلا بكم شغلة وهي:
1- خدمة الوكالة أفضل.
2- فروع الوكالة منتشرة.
3- سعر أعادة البيع أفضل من الباترول.
4- أذا حملت السيارة فوق طاقتها الكفرات تفحج عن الباترول بسبب أنه تعليق مستقل خلفي وحلها مساعدات ويايات أقسى أو بوالين بالمساعد, لاحظ أذا حملت السيارة فوق طاقتها فقط.

لكن بالمقابل مستوى العزل ومستوى الراحة ونشاط وقوة السيارة ومستوى الثبات وقيمة السيارة مقابل ماتحصل عليه من مواصفات وميزات وشكل وفخامة السيارة داخليا كلها لصالح الباترول لما تقارنه باللاندكروزر وخارجيا أشوف الباترول أجمل وأفضل ولو ان ممكن هذي الشغلة مسألة ذوق تفرق بين كل شخص لكن من الداخل مافي اي مجال من الاجمل

شغلة نسيت أذكرها
التبريد في اليوكون بالنسبة لي (أتكلم عن 2007-2014) مهب بذاك الزود بالنسبة لي (لاحظ أتكلم عن نفسي فقط ولا أتكلم أنه عام)
والسبب انا ما اعترف إلا بتبريد قوي جدا جدا جدا وهالشيء محصلة للياباني أكثر
اليوكون وماشابه للأسف ولو كانو تبريدهم قوي ترى بدي السيارة مايعزل الحر الخارجي عن مقصورة القيادة كثر الياباني بالاخص لما بتكلم عن الباترول تحديداً بحكم أني امتكله وعندنا يوكون من نفس الجيل (لا أعرف أن كان 2015 نفس الشيء أم لا لكن ما استبعد ذلك ابدا فالامريكان ماعندهم تكلف بتصنيع سياراتهم بجودة افضل اهم شيء سعر اقل بتكنلوجيا اكثر)
وأعيد أني شخص ما اعترف ولا أرتاح إلا بتكييف قوي جدا فقط وبتحصل بعضهم يقول السيارة الفلانية ثلاجة لكن أذا أنا ركبتها أحس تبريده عادي بالنسبة لي

ولا تنسى جربت الثلاث سيارات ولا تنسى الاستخارة



وشي المواصفات والأضافات الموجودة باللاندكروزر GXR أفضل من الباترول SE :c0214:

من ناحية العملية ارشح لك الاند كروزر وبعده الباترول، لانك بعد الله بتجلس معك السيارة سنوات مثل الRX تبعك، اليوكن ماضمنه مايطلب منك خصوصاً بعد 4 سنوات.

الباترول واللاند , سيارات مخصصة للطرق الوعرة , لكن في الآونه الأخيرة أضافوا بعض التعديلات لتناسب جميع الطرق , لكن بما أن الدبل ليس من الأولويات , فاليوكون هو الإختيار المناسب جدا , سيارة عملية وإقتصادية وقوية وأثبتت جدارتها منذ زمن طويل جدا

أخوي من كلامك أنك ما يهمك الدبل يعني ما تطلع طلعات برية او رحلات تخييم
لذلك نصيحتي روح لليوكن والمكيف حسب تجربة تاهو 2014 من عمي ثلاجة ما شاء الله
وبإذن الله يعيش معاك في ناس معاهم يوكن 2006 و 2007 إلى الآن
بالتوفيق