ناوي على باترول نص فل 2016 سعودي ..وأحتاج مساعدتكم

اهم شيء لاتشتري 6 سلندر لانه مو متناسق مع حجم الموتر

وابتعد عن نظام التأجير المنتهي بالتمليك وأنت بخير

افضل حل اخذ قرض من البنك وشرائها كاش

الكاش ملك

خذ هذه النقاط في بالك :

1- موديل 2016 يجي 8 سلندر وافتح الكبوت وتلاقي فيه مروحة اضافية.
2- خذ الوارد السعودي او الخليجي ثم تأكد من الوكيل أنه يدخل بالضمان لأن بعض المعارض يجيب أردني وعراقي ثم يدخله من منفذ الامارات ويقول هذا مستورد خليجي وهو تدليس ولا يشمله الضمان.
3- موديل 2017 أبو 6 سلندر برأيي الشخصي ما أشتريه بريال هو ومكينته الضعيفة.
4- الكاش ملك لأن الأسعار في نزول حقيقي ..الباترول موديل 2016 نص فل كان ينباع بـ 204 ألف ريال ثم نزل الين 186 ألف برمضان والحين يصرفونه على 180 ريال سعودي..

نصيحتي لك واللي أنا بسويه ..الكاش ملك ..
أنت الملك لأن الفلوس بيدك ..وكلها شهرين الى ثلاث .. بيصير كالتالي :

- ينزل موديل لاندكروزر 2017
- ينزل باترول 2017
- ينزل برادو 2017
- ينزل يوكن 2017 واحتمال ينزل القير بـ 8 تعشيقات.
- ينزل اكسبدشن 2017 ويمكن ينزل بشكل جديد.
- ينزل برادو لكزس 2017 ويمكن يتغير الشكل او لا.
- مخزون 2016 + السيولة تضعف بيد المواطن والحكومة.

يعني باختصار ... بنتظر شهرين الى ثلاث ..ثم أطب وأتخير ..يا اشتري جديد ..او تصيد مستعمل نظيف أخو الجديد بسعر رائع..

ولا تغرك الكلمات الرنانة .. مثل قولة هذي اخر دفعة ..وهذي مقطوعة من السوق ..وهذا خصم ما يتكرر ..في الاخير هذا حديد يخدمني ..واذا ما اشتريت الجديد ..خذ أخوه النظيف وبسعر يطيب الخاطر ..ولا أسمح للشريطي والمعارض يصرفها علي ...

لذلك أقول لك ..الكاش ملك ..لأنك انت الطرف الأقوى..و شفني انا حاط رجل على رجل جالس أتفرج عليهم ..الين أطب وأتخير السيارة اللي تبرد خاطري..

بالنسبة لطريقة الشراء :

- خذ قرض ..و لو تتسلف عليه شوي ..واشترها كاش..
بحسب لك حساب سريع وتقريبي ..نقول مثلا فائدة القرض 1.5 (واحد ونص بالمية) على خمس سنين لسيارة قيمتها 180 ألف ريال ..بيكون التالي :

- القرض بـ 180 ألف ..بتدفع قسط شهري 3225 ريال وبيطلع عليك الاجمالي 193500 ريال ..يعني أخذ البنك عليك فايدة حول 14 ألف ريال فقط ..والسيارة باسمك ..

أما تأجير منتهي بالتمليك...يا ويلك تاحذه ..واحذرك ..لا تقرب له ..ولا يضحكون عليك تأمين شامل..تراك انت تدفع التأمين ..والفايدة حقتهم نقول 9% ..يعني :

- السيارة بـ 180 ألف ريال ..بتدفع قسط شهري 3800 ريال..وبيطلع الاجمالي 228000 ريال + دفعة اخيرة كاش لا تقل عن 20 ألف ريال..يعني الشركة بتاخذ عليك ربح لا يقل عن 40 ألف ريال..والسيارة مو باسمك بعد ..بس أنت مستأجر..

وبالتوفيق يارب.

والسلام مسك الختام.

بشر وش صار معك ياراعي الموضوع انا مثلك محتار

ياليت ترسلون لنا تقرير مفصل عن الفئات والله عجزت اعرفها

^^^^^^^^^^^^^^^^^^^^^^
كلام فاضي ماله امل الامريكي صحيح اخف تانكي واحد
اذا السيكويا اقل نوع دفع ثنائي وهو اخف من اللكزس
مايسوي الشي ذا الي في المقطع
احتمالي الباترول 317 او ماطق له خبر
او طاق الباترول 200 الف بدون تغيير بواجي وتنظيف ثلاجة والامور الثانية
للمعلومية الفرق الي بينهم لما دعسو ماكان قليل
ومايقدر يعوض بالسهولة هذي

لا والدليل شوق هذا الرجال راعي لكزس وارد أمريكا ما شاء الله يمسك مع باترول 400 وقد يروح عليه
فرق 20 حصان توقعتها عادية بس مو هينة أبد

https://www.youtube.com/watch?v=U6tSMY4j5WY

بينما مقطع للكزس سعودي مع باترول 320

https://www.youtube.com/watch?v=g5S07uurzAw

محرك تويوتا هو نفسه ، بس الفرق ان احيانا يحسبون الاحصنة بالصافي وهو 361 او يحسبونها بالاجمالي وهو 381

خذها مني
اللي بيحصل هو الفيس لفت وليس التغيير الكامل

تو السيارة ما اخذت حقها

التغيير القادم هو 2020

اللاند كروزر بعد الفيس لفت يبي له اربع سنوات ثم يتغير ،،،، يعني 2020
اللاندكروزر صار له تسع سنوات وسوف ياخذ اربع سنوات يعني 13 سنة بس صار له فيس لفت مرتين

نجي للباترول

الباترول حصل له فيس لفت واحد بس

ولذلك بقي له فيس لفت ثاني ثم بعدها بثلاث سنوات او اكثر يتغير شكله جذريا

قد يكون الفيس لفت 2017 او 2018 والله اعلم

التغيير الكلي لن يكون قبل 2020

موديل 2017 سيطرح في شهر 9 ميلادي يعني بعد ستة شهور تقريبا ،

أسبوعين بالكثير ثلاثة
ورح تلقى النيزمو موجود
لأن تسربت له صور هنا بالممكلة

عندي لك اقتراح طيب
ليش ماتاخذ le t2 قيمته مقاربة لـ se t2
الفرق ان المكينة400حصان والبباقي نفسه

او انك تنتظر ربما سيتم توحيد محركات الباترول الى 400حصان
او انهم يطرحون المحرك الاخر 390 وينقصون القوة للاقتصاد+عشان يكون شوي اضعف(نفس فكرة محرك تويوتا 5.7 في لاندكروزر واللكزس الخليجي 361حصان اما السيكويا والامريكي 381 حصان)

مساعدة بسيطة
متى تتوقع ينزل 2017 ؟؟ برمضان ؟؟
لأن شوي الحسابات بدت تقلب براسي :bigggrin:

2017 فيس لفت وليس جيل جديد
+ الأرمادا لن يأتي
والدليل 2017 رح ينزل الباترول نيزمو نفس هذا الشكل
نيزمو الفرع الرياضية من نيسان
فكيف بنفس العام رح ينزل الباترول العادي بشكله الجديد
التغيير الكلي عام 2019 أو 2020
هذا والله أعلم

هذا المتداول إن التغيير الجذري للباترول واللاند بيكون عام 2018
طبعا أنا ما شفت مصادر..

حاليا قمت بتأجيل قرار الشراء..وجزاكم الله كل خيـــر.

وعليكم السلام ورحمة الله وبركاته

إذا كان التغيير الجذري سيكون عام 2018 كما هو متوقع فلا أظن أن تغييرا سيحدث عام 2017 ...

اجمعين يارب
الله يجزاك كل خيــر
صراحة أنا بسمع كلامك..والانتظار مو شين..
لأني البارح كانت تدور براسي هالأفكار لما نزلوا الأرمادا 2017 (الباترول المقنع) بأمريكا ..

فكرت بحاجتين :

- يمكن 2017 يسوون نيسان شيء بالمكاين..يعني يمكن يلغون 320 حصان ..او يمكن يوحدون المكاين ويخلونها 400 حصان ..وخصوصا اشوفها تقليل تكاليف على نيسان أنهم يوحدون مكينة الباترول والأرمادا بجميع الفئات..

- يمكن 2017 ينزلون مواصفات جديدة مثل يو اس بي في المسجل أو نافقيشين بالنص فل.

وقلت لحالي..ترى رمضان مو بعيد ..وموديلات 2017 للباترول واللاند والأرمادا ...بيكشف لي نية الشركة اذا بيغيرون الشكل على 2018 وزي كـذا..

شكرا لمشاركتك..لأنك عزمتني على رايي بالانتظار..
وبردت شوي من عجلتي..لأني صراحة عجول..وما أفرمل..
بس هالمـرة ...لا ..

جزاك الله كل خير

والسلام مسك الختام.