السلام عليكم
كل عام وانتم بخير اخوتي اعضاء المنتدى
حاب اقدم لكم باختصار شديد انطباعي عن الالنترا
خاصة لمن يبغى يعرف وش الفروقات عن الجيل القديم
لاني جربت القديم اكثر من مرة
وللي وده يشتري
========
الايجابيات :
- الديكورات تحسنت بشكل ممتاز عن الموديل القديم وتحسها مليانة ومتماسكة اكثر*
ولو انه كان ودي يكون فيها اكثر نعومة بدال البلاستيك القاسي*
- المكينة الـ 2لتر ممتازة ونشيطة ومع وجود القير 6 سرعات مرتاحة
- ازرار المسجل والدركسون اصبحت افضل من الجيل السابق
-صار من اقل فئة النور عدسة مثل الكيا سيراتو وهذا افضل
- ابعاد السيارة صارت افضل وسواقتها سهلة من اول ما تشوف زين
من التعفيطات الي بالبدي والسقف , الان حتى تقدر تريوس وانت مرتاح مب مثل قبل
خاصة ان الصدام صاير تصميمه هادي فـ بالزوايا اريح المناورة الان
- البدي اشوفه ممتاز من ناحية قوة مقارنة بالكورولا
- اعجبني تصغير حجم الكشاف
لان فيه ناس الله يهديهم يشغلي الواطي والكشاف بنفس الوقت
ويعمينا
السلبيات :
- الواجهة الامامية نازلة وخاصة اللمبات وهذا شيء اشوفه سيء*
اوكي نزل الصدام بس لا تخلي اللمبات نازله*
المشكلة الان اي صدمة بتصير بتاثر على الشمعات وهذي مشكلة تكلف كثير
بالسابق لو صارت فيه صدمة ولا احد رجع عليك الي بيتضرر الصدام وممكن
الكشافات وهذي بسيطة
لكن الان الشمعات مشكله , خاصة انه اكيد سعرها غالي مع وجود الليد الامامي وانها صارت عدسة
فـ هذي سلبية كبيرة , مب مكفينا الي عند الاشارات كل واحد حاط القير بالفاضي ويطقطق بالجوال
ويدحدر عليك
- الحجم من الخارج صار اصغر , وهذا شيء ما افضله , لو حافظوا ع الحجم الكبير كان افضل
عندكم الهوندا سيفيك الان كبروها طالعة اجمل , مع العلم ان الاتساع الداخلي زي ماهو نفس الجيل القديم
لكن انتقادي للخارجي
ادري ان بالابعاد يقال انها اطول لكن قصدي وانت شايفها من بعيد مو زي الشكل القديم
خاصة مع ورا , القديمة تحسها سيارة اكبر
- توفير البنزين مب هذاك الزود , اي دعسة خفيفة تشفط شفط , لا احد يجي يقولي اي سيارة كذا
ولو فيه فرق كبير عن المازدا 3 والنيسان سنترا , وهذي نقطة ما اعجبتني
والي بيشتري يفكر فيها قبل خاصة ان البنزين ممكن يرتفع زود السنين الجاية
- الفرامل مثل الجيل القديم فعاليته مازالت عادية واقل من عادية احيانا , ما ادري من الكفرات ولا من ايش
والي بيعطيها ولده ولا اخوه يفكر قبلها
==========
- بالمجمل ما حسيت انه طوروا شيء كبير بالسيارة , هي نفسها القديمة وباختلافات بسيطة ومحسنة
وشكل مختلف , هذي الي حسيت فيه حسب سواقتي , ما علي من الكلام الي يتناقل
- اكبر سلبية بالسيارة هي الوكيل والمعارض , كل السيارات اسعارها نازلة من جيوب وجموس حتى*
الكامري التويوتا نازلة اسعاره والامريكي الا هيونداي ما شفنا اي فرق يذكر خاصة بالالنترا
اشوف سعرها مرتفع صراحة والمفروض ينخفض دام كل السيارات منخفضة والمفروض الوكيل
يحاول ينافس فيها , خاصة انه الان فيه بدائل افضل وارخص
=======
بالنهاية اتمنى استفدتم , وللي يفكر بسيارة صغيرة انصحه يشوف
1/ المازدا 3 الجديدة من اقل فئة صار فيها (مثبت سرعة) وحتى لو منتب ماسك خطوط
بيفيدك بشوارع مثل التخصصي وسعرها بـ50
وتوفير البنزين فيها ياشباب مب صاحي ممتاز ممتاز جدا
ولا ننسى ان صناعتها يابانية 100% والقير طبيعي مب سي في تي
2/ النيسان سنترا وسعرها 44 , توفير البنزين فيها افضل من الالنترا
بحكم قير السي في تي بس بعضكم يمكن مايجوزله , وتتميز السيارة
بالديكورات حقاتها فيها نعومة وحتى مخمل بنفس ديكور الباب
فيه خيارات كثيرة حاليا ونصيحة شخصية لا تخلي موديل السيارة السابق يلعب براسك
اذا كانت الالنترا الجيل السابق ناجح والافضل في فئته ترى مب شرط الجديد يكون نفس الشيء
زي ماكانت الكورولا 2008 هي افضل شيء , هي الان ناظر وين مكانها
بالتوفيق
