السلام عليكم ورحمة الله وبركاته
اعرض لكم يا اخواني تجربتي ل الددسن ما يقارب سنتين ولله الحمد
بعد قطع مسافه ال50الف كيلو ولله الحمد بعطيكم سالفتي من البدايه
اول ما طرا على بالي اشتري سياره شفت المنطقه اللي انا عايش فيه وفكرت ف سياره صغيره وشلت الفكره على طول وحولت على البيك اب
السبب كما ذكرت منطقتي لاتدعم السيارات الصغيره:bigggrin:
ل وعورت المنطقه وكثره الحفر وانعدام الورش ايضا
جا ف بالي الهايلوكس والددسن لانها المواتر الشعبيه اللي لو تروح ل عامل البقاله عرف وش البلا اللي فيها
استخرت واتكلت على الله ورحت للمعارض وتشوفت من هالعربانات الجميلات الين طحت هايلوكس اماراتي كان كامل المواصفات وانا طبعا لا ارغب السعودي نهائيا وانتو عارفين السبب ولو جاني هديه بعته وشريت دباب ابو ثلاث كفرات
شف الهايلوكس واعجبني وكان سعره بحدود ال80الف 2ايرباق وكمره وشاشه طبعا موديل 2014 طاره كامري ايضا وتحكم دركسون ومانع انزلاق وتكايه بالنص وجنوط كروم نجمه
قلت خلني افر بالمعارض زود لعلي القا سعر ارخص
خذت كم لفه واطيح ف ددسن 2014 اللي شدني هو سعره كان على وقته يباع ب62وانا لقيته ب57ما ادري وش البلا فرق 5الاف عن باقي المعارض
وقتها شفت فرق السعر واللي عاجبني بالددسن هو المكيف والحديد فقط
فكرت فيها الفرق مايقارب 24الف او25الف بينه وبين الهايلوكس تجيب لي سياره صغيره اخت الجديده وتراجعت عن الهايلوكس وقتها ورجعت ل البيت انا والوالد الله يطول بعمره على الطاعه وكل مسلم كان مخيرني وعلى هواي وكنت اتشرط وقتها ويدري اني عاقل على شان كذا مخليني على هواي
فكرت فالددسن وقلت ل كم واحد من عيال عمي وكانو متحيزين لبعض الشركات وكانو يقولون النيسان مايتحمل والنيسان خرابات بعد سنه بيطلب منك واذكر كلامي
طبعا كم واحد قالوها لي كنت ب اتراجع عن القرار لكن يوم شفت احد اقاربي معه الجيلي الصينيه وقتها تمت سنه معه ولا اشتكى منها نهائيا
قلت وش بيجي الددسن لو قعد معي 5سنوات او اكثر وهذا هو مالي الشوارع اذا الكوري والصيني يكد كيف ب الياباني اجل
مع كثر المحاولات ل صرفي عن الددسن كنت اعاند كل من قابلني واقول انت ماعندك سالفه كيف موترك تدخله الورشه واذا جا قدامي تقول موتر يكد وما يطلب وهذا هو جملني (ف النهايه اتضح لي ان كلها محاولات ل صرفي عن الددسن )فقط من غير سبب
اتكلت على الله ورحت للمعرض نفسه ولقيت اخر حبتين منه صار وحده مبيوعه وباقي وحده فقط من نصيبي
اشتريتها ولله الحمد وبعطيكم العيوب والمزايا ووش ركبت ووش غيرت ووش واجهني
.......
ف البدايه بعطيكم القطع الاستهلاكيه والزيوت والفلاتر
ولله الحمد لم اغير حتى مسمار في سيارتي لحد الان
فحصت الفحمات والقماشات والاذرعه والمقصات وكل شي صار سليم
الفحمات بعد قطع مسافه ال50الف باقي فيه اقل من نصف عمر يمكن تمشيني الى 75الف او80الف او اكثر بعد
القماشات سليمه والجلب سليمه
السيفون غيرته 2فقط من شريته طبعا اخذه من العيسى
زيت المكينه ب البركه اغيره احيان الين مشا 8الاف واحيان 4الاف على حسب مسكات اركب بترومين كثافه عايليه العلبه ب15
غيرت زيت المكينه من شريته يمكن 8او9مرات
كنت ب اجازف مره واركب زيت عافيه اجرب بس ابشركم فكني الله
فكرت ف المكينه خفت تبوش واكلها علقه حتى رايح اسعر المكينه هههه
لقيتها ب 8الاف اخت الجديده يعني مستعد
شفت واحد يركب زيت عافيه وجاني فضول ثم تراجعت ايضا
........
مميزات الددسن
مكيف بارد ب عز الصيف الله يعز العراوي
ركبت هايلوكسات وشفت تكييفها
ددسن افضل حتى ف العصر تكييف ددسني افضل من ااهايلوكس بالليل
دفع الهوا قوي جدا وهذه ميزته
مموتر خدمني كفى ووفى
صرفيته ممتاااازه جدا و الان بقول لكم كم يمشيني اتوقع مانتم مصدقين صرفيت الددسن
طبعا ب كفائه الطاقه ماخذ ممتاز
اعبيه فل ب48وامشي عليه 650الى660كيلو وب ممشى 100الى120
طبعا تولع اللمبه اذا وصلت ال600وعليها وامشي 30كيلو ويبقى فيه شوي يمديني لكن مالها داعي المغامره
طبعا لست راعي سرعه شايب صغير*_^
اما داخل المدينه او ف حواري يمشيني من 500الى 540تقريبا
سواقته ممتازه
داخل البلد وما تخاف لان صداديمه حديد الله يعز العراوي
مع المنعطفات افضل من الهايلوكس من تجربه الهايلوكس يزحف مع المنعطفات على سرعه والددسن اشوفه ارسى والسبب الثقل ف الددسن هو اللي مساعده والنمره يمكن لها دور ايضا الددسن طول وقته حاشر
............
عيوب السياره
غير مريحه غالخطوط وجه السياره يهدر يرقى وينزل
ضيقه من ورى جدا جدا جدا وهذا عيب كبير
عزما تحس انه ضعيف ومافيها حييل لكن مع الوقت تنشط
ف البر انغبن من حاجه وهي الاهتزازات داخل الموتر والسبب لان مافيه يايات اماميه فقط مساعدات
عكس الهايلوكس من2006 وطالع يايات اماميه
قاسيه نوعا ما
صوت المكينه بعد سرعة 120الله يخارجنا بس
تفتح النافذه اصرف لك هوا ربي زيين 😂لايوجد عزل ارضي تسمع وشيش حدر الموتر
...............
المواصفات
مسجل مع مدخل auxهذا اللي اعرفه فقط اما الباقي ما اعرفه ابدا
قير عادي من5سرعات(مع دبل كلتش)😝😝
يوجد دركسون ف السياره وهذي نقطه مهمه قد لاتتوفر ف غيره🙃
فرامل الددسن ممتاز بالنسبه للهايلوكس ف هو افضل
.............
ف النهايه اشكر كل من حاول ان يبعدني عن الددسن وهذا سبب حبي له لومابه مواصفات ولا يجمل اذا ركب معك احد الا اني مرتاح به يارب لك الحمد وهذا انا اتردد على اقاربي وربعي اقولكم كل كم تغيرون الفحمات
تتغير وجيههم اذا سئلتهم
طبعا كل 4شهور او3شهور يغيرونها وانا للان يارب لك الحمد وباقي فيها عمر ايضا
من يحاول شراء هذه العربانه ف انا انصحه ب الغماره لانها للحلال وللتحميل تنفع وللروحات والجيات ايضا ماعليها خلاف اما الغمارتين ضيقه من ورى هذا عيبها
طبعا مشكلتي مشكله مع هالمنتدى ما اعرف انزل الصور ابدا ولا كان نزلت صورة عابر القارات
وفي الختام اتمنى ان يعجبكم موضوعي وتراني سردت هالموضوع عالسريع لاتلومونني لعدم الترتيب وكل شي متخالط
والسلام عليكم ورحمة الله وبركاته
