دعوة للنقاش حول نواقل الحركة الجديدة والضمان

السلام عليكم جميعا واسعد الله اوقاتكم في هذه الأيام الجميله على المملكة والمنطقة
موضوع مهم جدا ضرب الوتر الحساس عندي خصوصا وانا ابحث حاليا عن سيارة جديدة من الوكالة وأقوم باستبعاد اي سيارة ناقل الحركة الخاص بها من نوع CVT ما جازلي ابدا بالقيادة ولا شفت أحد مبسوط معاه اما انه خبط عليه على 60 ولا 70 الف ولا عايش يهوجس بالزيت والجير
تجربتي كانت غريبة مع الجير
اقتنيت في حياتي 4 سيارات كلها مستعمله ملعون خيرها ولا اعرف الماضي الخاص بالجير وزيته ولا عمري غيرت زيت جير والسيارات بيعت ماشيه وأمورها طيبة ولا تشتكي من شئ ماعدا آخر سيارة وهي سيارتي الحالية كانت انظف سيارة اقتنيها وشيكت الصيانة بالوكالة زيتها يغير كل 40 الف مع مالكها الأول غير مرتين بالوكالة وانا استمريت وراه على تغيير الزيت الخاص بالجير بالوكالة وللأسف هي السيارة الوحيدة اللي قيرها خرب علي او بالأصح قريب يهرب حيث عندي نتعه بين الأول والثاني وفحصت الجير كمبيوتر طلع فيه ضعف وفعلا الضعف واضح يالقيادة علما أني اخذتها ماشيه حول 100 ألف والآن ماشيه معي حول 270 ألف وقيادتي عاديه الى مملة وغير شاقه ابدا ولا فيها خطوط ولا طعوس

موضوع مهم ومفيد وراح اتكلم عن تجربتي الشخصيه

اشتريت سوناتا 2011 وكان مكتوب في كتاب السيارة زيت ناقل الحركة لايحتاج تغيير او استبدال ومشيت عليها 480 الف كيلو حتى بعتها ولا غيرت الزيت ابدا

وسيارة امبالا حاليا اغير زيتها كل 70 الف كيلو حسب كتاب السيارة مع ان الوكاله تقول مايتغير بس انا اغيره ويخلوني اوقع على ورقة اخلاء مسؤولية

والحمد لله ماواجهت مشاكل في السيارتين

المهم تمشي على تعليمات الشركة المصنعه ولايهمك كلام الوكيل ولا غيره

موضوع رائع للنقاش
شكرا يا مبدع

خلال الشهور الأخيرة كنت أبحث عن إجابات عن متى يجب تغيير زيت القير لسيارات عندي.
المواقع المختصة لا تعطي إجابة واحدة
كل موقع يقول كلام.

وكتيب السيارة لا يذكر شيء.

ولذا يظل صاحب السيارة تائه. هل يغير أم لا يغير. ومتى يجب أن يغير؟

لذلك فطرح هذا الموضوع في غاية الأهمية لأنه سيجيب على كل هذه الأسئلة.

السلام عليكم

موضوع مهم بالتاكيد والاخوان ماقصرو في طرح اراءهم

في بعض الشركات مثل كاديلاك ذكرت في فترة من الفترات ان قيورها ماتحتاج تغيير زيت واغلب الشركات تطلب تغيير زيت القير كل 60 او 80 او 100 الف
الواقع ان اكثر السيارات الجديدة دفع امامي اساسي والقير يقوم بمهمة القير والدفرنش في نفس الوقت لذلك نسبة التأكل والاحتكاك اعلى من فير سيارات الدفع الخلفي لذلك التغيير مطلوب وحسب اللزوجه الموصى بها

المشكلة ان الوكيل اذا كان بيغير زيت القير او الدفرنش والسيارة خارج الضمان يقول على مسؤوليتك الشخصية وحصلت معي في سياراتي قالي تغير على مسؤوليتك الشخصية قلت واذا ماغيرت وخرب قال على مسؤوليتك الشخصية:44:

اعتقد انك اذا محافظ على تغيير زيت القير بانتظام ماعندك مشكلة لكن اذا تجاوزت الفترة المفروضة بكثير فالتغيير مباشرة قد يسبب مشكلة والمفروض التغيير على دفعات

شكرا لك اخوي ابو مصطفى هذ اللي كنت اقوله ان الوكيل للشركة يقول لاتغير الزيت هذا مدى الحياة الا اذ حصل نقص للزيت او تسريب فهذا مايقوله اغلب الوكلاء للسيارات الجديدة والقير اصلا سعره ماهو رخيص لا يقل عن 18 الف ريال بينمى تغير الزيت مع الفلتر حوالي 400 ريال

حياكم الله اخوتي الافاضل :
اليكم هذه المعلومات المهمة حول الموضوع , وهي جزء من موضوع كبير سوف اقوم بتدوينه قريبا ان شاء الله في قسم الورشة
المعلومات من مصادر اجنبية رصينة ومعتبرة :
تتفاوت فترات تغيير زيت القير الموصى به من قبل المصنع ما بين 30000 الى 50000 ميل , وفي حال كنت تسحب مقطورة او تقود سيارتك في مناطق جبلية فعليك بتغيير زيت القير اكثر من مرة , هذا بسبب الحمل الكبير المسلط على القير في مثل هذه الظروف الشديدة .
اليوم العديد من السيارات لا تحتوي على مقياس مستوى زيت القير ؟
كيف تعرف اذا كان الزيت يحتاج الى تغيير ؟ قد يساعدك القاء نظرة على جدول الصيانة .
ربما لا يتم ذكر تغيير الزيت في جدول الصيانة , او يتم تضمينه فقط في ظروف القيادة القاسية مثل المناطق الجبلية او سيارات الشرطة او سحب مقطورة او سيارات التاكسي , وهذه يطلق عليها شروط التشغيل الخاصة .

السؤال الذي يطرح نفسه وهو : اذا لم يكن موعد تغيير زيت القير مدرجا في جدول الصيانة , فهل هذا يعني ان زيت القير مستمر مدى الحياة او العمر التشغيلي للقير ؟
الجواب : نحن نعلم انه يتعين علينا ان نأخذ بتوصيات الشركة المصنعة وبدقة والتزام شديدين , تريد الشركة إظهار تكاليف صيانة اقل لمنتجاتها , ولكن هذا لا يعني ان ننقاد لهذه التوصيات بشكل اعمى .
صحيح ان زيوت القير قد تحسنت جودتها ونوعيتها ولكن لا , لا يزال التآكل الميكانيكي للقير واردا جدا , لا تزال مشاكل القير موجودة سواء كانت ناجمة عن التآكل او لاسباب اخرى .

زيت القير له وظيفتان وهما :
1- تزييت وتشحيم مكونات القير .
2- نقل حرارة القير بعيد عنه والتخلص منها , حيث ان درجة الحرارة الداخلية للقير تكن اعلى وبما يصل الى 150 درجة فوق مستوى درجة حرارة المحرك , اي بمعنى ان القير يسخن بدرجة اعلى من المحرك .

عبارة ( Filled for life ) : تعني ان زيت القير لا يتغير ومواكب الى مدى العمر الافتراضي للقير , وهذا بالضبط ترجمة لعبارة ( صلاحية المصنع ) .
طيب ماذا نفعل ان عطل القير بعد انتهاء صلاحية ضمان المصنع ؟ ماذا سيكون موفق وتصرف الوكيل ؟ وماذا سيفعل ؟
الجواب ببساطة : لا يفعل شيء , انت من تتحمل تكاليف تصليح القير او شراء قير جديد , لهذا من المهم جدا ان تقوم ولو لمرة واحدة بتغيير زيت القير المختوم مدى الحياة خلال العمر الافتراضي للقير لكي يدوم معك اطول مدة ممكنة .
خلاصة القول : ان عبارة ( Filled for life ) هي عبارة مضللة خصوصا للذين يستخدمون سياراتهم في ظروف تشغيلية شاقة .
تحياتي

مرجعك دليل المالك وكتيب الصيانة اذا مكتوب يتغير غيره وباللزوجة المحددة في الكتيب اذا لا لا تغير
المفترض ان الزيت يتغير لكن ليش يقلون لاتغيره لان قيور الzf تستخدم زيت تخليقي عمره الافتراضي طويل الى وقت عمر القير الافتراضي ! داخل القير الاوتو فيه قطع استهلاكية مثل الكلتشات الي مقابلها الكلتش في القير العادي تستهلك مع الوقت ولابد من فك القير وتغير !!
اذا وضبت القير هنا لابد من زيت جديد
الزيوت تطورت اذا زيوت المكينة وصلت ل٤٠ الف كيلو اكيد زيوت القير توصل لعمره الافتراضي لانه اقل حرارة واحتكاك من المكينة

مرحبا الف اخوي سهيل أنا ما اتكلم عن قير ZF أنا أتكلم عن اغلب انواع القيرات الجديدة اللي الوكالات تقول لاتغير زيت ناقل الحركة لأن الوكيل قال لي لا تغير الزيت وسيارتي ناقل الحركة ZF والمراكز تغير الزيت والفلتر والناقل موجود على العديد من السيارات الامريكيه والألمانية واليابانية وكانت عندي سيارة أمريكية قال لي الوكيل لا تغير زيت القير فعلشان كذا طرحت الموضوع لان فيه ناس تظررو وبعضهم يقول الوكيل سحب عليه

موضوع جداً مهم و كانت لي تجربة سابقة مع قير CVT

بالنسبة لمن يتحمله، ان لم يوضح الوكيل ان تغييره يسبب مشكلة فيتحملها الوكيل لانه اخفى معلومة مهمة

و اذا عكس هذا فالمسؤولية على المالك، يعني لو بصفحة من صفحات كتاب التعليمات حق السيارة مذكورة هالمعلومة تصير المسوولية على المالك اتوقع، لانهم راح يعتبروها تقصير منه

في الاخير و الاهم قد يشملها الضمان و اذا الوكيل قال ما يتغير اذاً نمشي على كلامهم و لا نغيره

انا كانت عندي نيسان مكسيما 2011 و قيرها CVT اشتريها مستعملة عام 2014 او 2015 ، و اتذكر غيرت زيتها و انا ما كان عندي علم بهذه الامور. الكثير قال لي راح يخبط القير لانك غيرت زيت مختلف عن الزيت السابق !! و انا ما شفت اي ملاحظات على السيارة ابد

و بعدها بشهرين طابت نفسي من كلام الناس و بعتها، رغم انها كانت سيارة جميلة و ناعمة للغاية، لكني صرت اهوجس و قلت لراعيها الجديد على السالفة و قال ما عندي مشكلة و ما يؤثر!

رجعت كلمته بعد 5 او 4 اشهر و قالي الى الان السيارة تمشي مثل الحلاوة و لا فيه اي مشكلة في القير !!

يعني كله كان كلام فاضي ، و اذا الواحد اعتنى بسيارته ما يفرق

المكينة عمياء و لا تفرق بين زيت او زيت الا في درجة لزوجته

لم يسبق لي امتلاك سيارة بقير ZF و لكن موضوع مهم للغاية ، الف شكر لك