هل لك تجربة مع السيارات!!! أدخل واكتب عن تجربتك!!!

اخوي T.N.T مشكور على الموضوع الرائع

والحقيقة من اول ما وضعته وانا احاول تثبيته بس مو راضي يتثبت

وانشاء الله اراجع الادارة واشوف وش المشكلة ومشكور على الموضع

مشكورين يالاخوان على المشاركة واتمنى تفيدو الاعضاء من تجربتكم بس ياليت يكون هناك تفاعل أكثر

وشاكر لكم

مشكور على الموضوع اخوي TNT واخوي المشاركين بعد يعطيكم العافيه على المشاركات المتميزة :
في الحقيقه اول مابدات اسوق على كابرس 93 ال اس الصراحه سيارة بمعنى الكلمه مو مثل التكنه الجديدة ذي الصراحه جلست معي اربع سنوات زي الحلاوة ولاخراب ولاشئ لمن مشت 278 الف كيلو وجبت فيها العيد في حي القدس بالرياض وراحت تشليح لكن سيارة من ناحيه رساوة وراحه ماعليها كلام وطبعا مايحتاج انصحكم فيها لان زمنها راح ...
السيارة الثانيه فورد تورس 98 سيارة طيبه وهادئه لكن تطلع اصوات كثير من الدركسون ومن الفرامل جلست معي سنتين وبعتها مانصحكم فيها الصراحه مع العلم ان عليها مكينه قويه ...
والحين معي اكورد 2002 ماشي 56 الف كيلو وزي الحلاوة ان بغيتها رساوة وان بغيتها راحه بسم الله ماشاء الله لكن مع ذلك راح ابيعها :) واشتري 2004 وانصحكم بالاكورد مايحتاج اعدد ميزاتها لانها سيارة غنيه عن التعريف
واسف على الاطاله ...

حياك الله اخوي الغـــ07ـــامدي

خبرة طويلة ما شاء الله

وانشاء الله يستفيدون منها الاخوان

أحب أشكر أخي وعزيزي [ T.N.T ] على هذا الموضوع الرائع والممتاز .

نبدأ مع تجربتي ، أول سياره استلمتها كانت المكوك الفضائي { ECHO الإيكو } وبصراحه ما استمرت معي لأني سويت بها حادث مقصود عشان أتخلص منها ، السياره هذي يا كثر ما تحوص معك وأنت بالطريق ، تحذف كثير وأنا ما أتكلم عن الإيكو الجديده ، أتكلم عن أول موديل طلع وما أعرف متى لأني ما اهتميت لها !

اذا كنت من المسرعين ومعك { إيكوووو } ما تعيش ، تحس انك راكب في ورقه تطير من الهوا !

ميزة الإيكو: تصلح للنحاف فقط !

عيوبها: تصرف بنزين بشكل غير طبيعي تقول التانكي مخروق ، تحذف وماهي راسيه بالطريق ، تحوص في المنعطفات و اللفات ، الكفر صغير وما يجمل كأنك راكب سيكل !

الخرابات: ما أذكر خربت علي لأني كنت أطلع بالأسبوعين مرتين .

وشي أكيد ندمت انها جتني وما كانت باختياري طبعاً ، كانت بإختيار الوالد -طول الله في عمره- .

وهل أنصحكم فيها: تبغى الصدق؟ لا والله !

وسبب الحادث ، كنت داعس على 133 إلى الآن أذكرها ودخلت منطقة مليانه تراب وحاصت معي يمين شمال ودقيت برصيف ، رجعت البيت والصدام جنبي بالسياره وزي ما قلت لكم ، كنت مخطط لهالشي من أول .

بعد كذا نجي للسياره اللي جتني بعد المقروده إيكو ، اشتريت { كورولا 2001 } خضراء قير أتوماتيك طبعاً لأن مهوي في العادي !

ميزتها: تعيش معك ، سياره ما عمرها قالت: آي -ما شاء الله تبارك الله- !
والله اني حبيتها وفعلاً سياره أبدعت فيها شركة تويوتا ، من ناحية التعديل حلوه وكل شي فيها حلو .

عيوبها: يمكن شكلها مو قد كذا وتحذف بعد !

الخرابات: ما قد خربت علي ولله الحمد بس أذكر القماشات عندي انعدمت من كثر دعس الفرامل بقوه .

وإلى الآن والحمد لله ما ندمت عليها .

وشي أكيد أنصحكم بشراء هذي السياره الجميله .

أما من ناحية السيارات اللي سقتها فكثير ، منها: جيب برادو الجديد 2003 ، من أروع ما يكون في الطريق والبر .

سقت: هونداي آكسنت: من أغبى ما يكون في الطريق وتحوص أكثر من الإيكو .

سقت: لكزس GS 300 وسياره ما عليها كلام أبداً ، روعه بكل المقاييس بس فراملها كأنها طياره !!

سقت: تريل بليزر حق الأخ العزيز [ فهد ] << العضو B_52 وما عليه كلام ما شاء الله تبارك الله .

سقت: جيب لاند كروزر موديل 2003 وأنصح راعين طلعات البر بشرائه وأنصح الشباب أيضاً .

آسف طولت عليكم وإن شاء الله الجميع يستفيد .. تحياتي للجميع

انا كابرس 2004 LS وكانت مريحه صراحه وفخمه
وقويه وما بالك SS
وانصح الشباب بهذي السياره واللومينا SS
تقبل تحياتي

تجربة رائعة واتمنى تكون فادت الاعضاء وللمعلومية الوالد كان عنده زمان كراون اشتراها وكالة موديل 85 على ايامه والى الان ما انساها والله كانت سيارة رائعة وعزمها حلو وراسية وكذلك فخمة ومريحة ومافيها اي خرابات لكن خلاص راحت بعناها قبل حدود 5 سنين والحين معانا كابرس موديل 2000 وبرضوا سيارة رائعه وحلوة وانا ناوي ان شاء الله اطلع لومينا بإذن الله

شاكر للجميع المشاركة وياليت يكون هناك تفاعل اكثر!!!

انا سيارتي
تويتا كراون 98 ماشالله 6سنوات من يوم شراها الوالد ولا طلبت منه شي والحين معايا والحمدالله مانخرب عليا الا سلك البنزين (سلك الدواسه انقطع) والسياره ماشالله قويه جدا وراسيه وعيبها صرفيه البنزين

مشكور يخوي والله تجربة مفيدة وفريدة اتمنى تعجبكم وفعلا لازم نتعلم من اللي جربوا وان شاء الله ماحد يستعجل على شي وباين عليك ياسواد الليل انك اخذت خبره ماشاء الله عليك بعد المواقف هذي

ما شاء الله اخوي سواد الليل خبرة طويله

الله يوفقك ومشكور على المشاركة

شكراً أخوي T.N.T على الموضوع،،،

فعلاً، الشخص ما راح يستفيد إلا من كلام اللي جربوا السيارة، أما كلام المجلات والوكالات كله (وسع صدرك)

في بدايتي كان معي هوندا (أنتيجرا)، طبعاً انقطعت الآن، وكان موديلها (اعتقد 92)، بوقتها كانت سيارة حلوة، CD وفتحة ومواصفات كثيرة وكنت فرحان فيها مرة إلى أن جانا ذاك البرد في الرياض (تذكرونه؟؟!!) وكاتن سيارتي من الضحايا، وبعتها بعد فترة، وتصبرت بسيارات كثيرة، كلها قواطي أستحي اتكلم عنها.


بعد كذا غلطت غلطةالعمر في منتصف عام 99 وشريت دايو (ليجانزا) كامل المواصفات موديل 2000، شريتها بـ60 ألف ريال. بصراحه، ما ادري كيف تهورت وأخذتها، سيارة سئة جداً، لعبوا علي بالجلد والفتحة والسي دي ومراتب الكهرب، بس القوة ما عندك أحد، ومن ثاني شهر على ورش الصيانة لحد ما كرهت السيارة وندمت على شرائها. اذا تذكرت الحين اني شريت كوري اضحك على نفسي. المهم اني بعتها بـ 39000 ريال بعد استعمال 7 أشهر فقط، لاحظوا الخسارة 21000 ريال.

بعد كذا أخذت لي ماكسيما موديل 2000، بصراحة سيارة صح، تحمل، قوة، مواصفات حلوة، وشكل حلو، أنا اشهد ان المكسيما سيارة، والحمدلله ما تعبتني ابد في الصيانة، يمكن قطع الغيار شوي مرتفعة، بس هذا حال اغلب السيارات. المهم اني بعتها قبل فترة، وبسعر طيب بعد كرف 3 سنوات ونصف.


بعد كذا رحت لهوندا ودفعت لهم علشان اخذ الجيب الكبير اللي عندهم MRV وخلصت معهم تقريباً، وما بقى إلا يطلعون اللوحات، وبنفس اليوم اللي عطيتهم فيه فلوسي، يشاء العلي القدير أنه يمر من قدامي Ford Explorer، ويوقف عند الإشارة، بصراحة ما أدري وشي السيارة وقتها ولا أعرف عن الفورد شي، لحقت الرجال عند الإشارة، وسألته، وش هالموتر؟؟ قال هذا فورد اكسبلورر، وطيران علىالوكالة علشان ما انسى الاسم، وصلت عندهم وشفته، بصراحه اعجبني جداً جداً، وندمت على ان تسرعت على الهوندا، والمشكلة أنه ارخص من الهوندا وأحلى.

كلمت ممثل المبيعات اللي في هوندا وقلت له السالفة، وطلع الرجال متفهم، وقال مر بكرا وخذ فلوسك، والحمدلله شريت السيارة اللي بغيتها، فورد اكسبلورر أسود ومن جوا بيج، خيال ما شاء الله تبارك الله، قوة وفخامة ودفع رباعي طبعاً. صار له معي 4 أيام فقط.


طولت عليكم وخرجت عن الموضوع، بس علشان يستفيد الأعضاء من المهابيل اللي مثلي وتسرعهم عند الشراء.


تحياتي،،،


سواد الليل

مشكور يخوي تجربة مميزة وفريده ويعطيك العافية

ميركوري قراند ماركيز ال اس خذيته اول ما تغير شكله وصراحه سياره بمعنى الكلمه لا خرابات والحمدالله مو ندمان عليها وانصح الشباب فيها

انا لو لي تجربة كان كتبتها من بداية الموضوع لكن نحن في انتظار مشاركات الاعضاء

بس اخوي لو تكتب انت عن تجربتك يكون احسن

مشكور يخوي على ردك ومشاركتك واتمنى من الاعضاء ان يتفاعلون