ابي رايكم ونصيحتكم..

اكورديات @user_16890 · 16-01-2005

السلام عليكم

ياجماعه انا انسان امتلكت اكورد موديل 2003 سياحي

طبعا تحت ضروف انجبرت اني اشتريها (اتكلم عن السياحي)

اممم سويت فيها حادثين اضطريت اني ارش الابوب الاربعه

المهم الزبده ان نفسي طابت من السياره عقب الحادثين

والشي الثاني ياجمااااااعه ظهري انكسر من مركبهااا

يعني وربي ماشفت الراحه من شريتها

اوكي هي راسيه وهاديه

وعزم

بس ياناس ماارتحت لجلستها

قررت بيوم من الايام اني اجرب قيادة كيا اوبيروس

انهبلت

ضاعت علومي يوم سقتها وركبتها

مركب وتقنيه

يعني سياره متكااامله والكامل وجه الله

قررت اني اشتريها

بس بنفس الوقت محتار

يعني يجي ببالي اكثر من سؤال

شلون اترك هوندا واتجه لكيا

شلون اترك الياباني واروح للكوري

احيان اقول الاكورد شبابيه اكثر من الاوبيروس

اشيااااااااااء كثيره

بس استعنت فيكم بعد الله سبحانه وتعالى

والبركه فيكم

ماودي اتسرع واشتريها وبعدين اندم

انتظر ردودكم

ويعطيكم الف عافيه

alkadhemi @user_15685 · 18-01-2005

سلام عليكم

أخوي ... بدل المراتب و خلاص ..

و ابعد عن الكيا ... كان عندنا كيا كرنبال .. رحمة الله عليها خلطت و بعناها ... حقيقة الكيا ما تسوى ولا بقرش تتفتك بلوحدهاا

تحياتي

أكورد وبس @user_7944 · 18-01-2005

ممكن تركب مراتب ماليبو .. لأن الماليبو تصميمها ياباني بحت .. ومراتبها مريحة جدا

أو تلبسها جلد وتبطنها إسفنج .. وهذا أنا مجربه .. وفعلا يريحك شوي

LAMBADA @user_13601 · 18-01-2005

اصبر عالاكورد لين رمضان الجاي .. وطق فيكتوريا 2006 الشكل الجديد .. اذا كنت مهتم بالراحة والفخامة :)

احسن لك من الاوبيروس ألف مرة ..

أبو يوسف @user_603 · 17-01-2005

خلك على قردك لايجيك اقرد منو.........

مع التحية

اكورديات @user_16890 صاحب الموضوع · 17-01-2005

الله يعطيكم العاااااااافيه ياالغالين

وماتقصرون

بصراااحه مسالة اني اغير المراتب صعبه شوي

يعني سيارتي جديده 2003 وماودي احوس فيها

مراتب فياجرا والا مسجل انفنتي والا مدري ايش

قالي واحد لو تركب جلد يمكن شوي تتعدل

اما بالنسبه اني ابيع سيارتي واخذ نص فل 2005 ب80 الف

بيني وبينك حراااااام
ادفع 80 على اربعه سلندر

عالعموم مشكووووووورين

وانا ابستخير واللي الله كاتبه بيصير

راعــي فــزعــه @user_14406 · 17-01-2005

لا ياخووووووووووي

لاتغلط وتشتري كيا

والله لتندم

سياره دماااااااااااااار من جد وبقوووووه

كلها سنه سنتين بالكثير وبعدها تخق

الاكورد روعه واذا على المراتب مثل مقالوا الشباب غيرها وانتهينا

.

مسترنت @user_16834 · 17-01-2005

الاخ اكورديات
ما انصحك تبدل الهوندا بسيارة كيا
لا تغرك دعاياتهم واعلاناتهم حديد ومعدن الكوري خفيف جدا وما ينفع والدليل روح اسأل اي مكانيكي خبرة عن الكوري اذا ارتفعت الحرارة شوي راس المكينة ينكسر زي الفخار
اما الضمان فهو ضمان 60 الف كيلو او 3 سنين ضمان شامل والخمس سنين ضمان على المكينة والجير فقط
وطبعا هم اذكياء لانهم يطلعو قيمة الضمان من قطع الغيار الي يبيعوها غالية
وشكرا

بيكم @user_13357 · 17-01-2005

انا اقول حرام تدفع فلس واحد في سيارة كورية
الهوندا و بس و الباقي خس

مافي مجال للمقارنه اصلا
الهوندا ما يتقارن بالكيا
و السعر يحكم
شكرا

Ghonaim.a @user_5082 · 16-01-2005

وعليكم السلام

اخوي اكورديات

بما انك امتلكت اكورد فهذا اول شي صحيح تسويه في مجال السيارات

لكن فعلا الحوادث الكثيره تكرهك في السياره وانا مثلك الان معي كامري 2000 لكن الحوادث كرهتني فيها

واما انك تتركها بسبب انها غير مريحه فهذا سبب غير مجدي لترك افضل السيارات اليابانيه

هالحين مو سعر الاوبيروس 80 الف ......... طيب طق لك اكورد نص فل 2005 وريح بالك

اما الاوبيروس شكلها موحلو مره لكن الدخليه والمواصفات فيها خياليه لكن تبقى كيا ولا تقارن بهوندا

والخيار لك في الاخير

ولا تنسى ان معك اكـــــــــــــورد

اخوك ك ا م 717

الـصـقـار @user_12505 · 16-01-2005

لاحظ انك تضحي بأشياء مقابل شي واحد

هذا اللي حبيت انبهك له

LAMBADA @user_13601 · 16-01-2005

والله وانا اخوك مدري ...

بس اللي اعرفه ان الاوبيروس عليها ضمان 5 سنوات ...

والموتر من داخل شوية فيه رووعة ... ولا تصف الاكورد جنبه :)

انت اسأل عنه اول شي ...

واستخر ربك

وتوكل على الله

المهنا بيك @user_16176 · 16-01-2005

عندي سؤال هل الأكورد قير اوتو ولا عادي؟.
اذا كان اوتو نصيحه لا تبيعه غير المراتب وعدل عليها وتصير لك روعه بدل من انك تخسر عليها كم الف عشان تبيعها

وييييييييييين نصيحه لا تشتري اي شي اسمه كيااااااا

حنا معنا فان كيا كرنفال معاك كويس سنه ونص ويبدء يتفكك

بس حنا نكرفه :)

بس انا سمعت ان سعر ابورس حدود 70 او 75 ان وصلت لهذا السعر خذ لك لومينا ltz بمعرض وعليه ضمان بعد واروع مما يكون راحه معروف الامريكي بالراحه قومات قوه عاد اللومينا ما عليها كلام :) قطع غيار واقعي واقل من الواقعي بعد راسيه يشهد لها الناس بالرساوه والدليل انها دفع خلفي يعني ما فيه امل تزحف بأذن الله ومليانه ايرباق للأمان

طبعا الراي لك قبل كل شئ

LEGACY @user_3814 · 16-01-2005

في هذي معاك حق ....

مقارنة الاكورد والكيا الجديدة ..الفخمة ذي .. من ناحية الداخل .....

صحيح تريحك وكذا ... بس لا تستعجل اذا كان هذا مطلبك .. لأن فرش الكوري خيخه ... مثل سيارات اللومزين الباقين شوف الفرش لهم ليوم .. مع العلم انه موديله 2002 و2003 ... بس يستوي فرشهم الداخلي مع الأستخدام كانه كابيرس موديل 83 ...

وبالتوفيق في اي اختيار ...

922 @user_10667 · 16-01-2005

السلام عليكم

اذا ضاقت من المراتب فكهم وركب مراتب فياغرا والا BM والا اي سيارة عاجبتك مراتبها من التشليح ولحمهم على القواعد الاصليه

والحمد لله

ولاتبيع سيارة عشان مراتبها

مزعجتك قساوة المساعدات

فكهم ورهم مساعدات خفيفه بتخف الرساوة بس اهم شي تناسبك

ولاتبيع سيارة عشان مساعدتها

الف حل وحل ولا تبيع وتشتري وتخسر نفسك

تحياتي
محمد

أكورد وبس @user_7944 · 16-01-2005

بصراحة

أوافقك في هذا

مراتب الأكورد قاسية جدا .. وهذا عيبها

واسأل محلات التأجير عن الأوبيروس .. لأنها جديدة .. وكونها فخمة بالشكل هذا وسعرها رخيص فأنا أتوقع إنها مش حالك

لكن اسأل محلات التأجير وهم يشيرون عليك

** حسن ** @user_38 · 16-01-2005

وعليكم السلام..

شف وانا اخوك..

بالنسبة لكلامك عن انك راح تترك هوندا وتتجه الى كيا...

لا يهمك الي يقول كوري وياباني..

لالالالا .. هذا زمن اول..

الحين كيا شركة قوية ومحترمة..

بس عيبها القطع شوي مبالغ في الأسعار..

بس مقارنة بهوندا (في القطع) ما اعتقد هناك فرق..

وبشهادة بعض الشباب الي عندهم سيارات كيا..
ما احد يوم اشتكى انه الوكيل تعباااااان او شي..

بس هوندا.. الله بالخير.. كل يوم نسمع قصص ((أشكال وألوان))..

اتكل على الله..
وخذ لك الاوبيرس ... دام انك مرتاااااااااح لها..
الاوبيرس سيارة رفاهية ((يعني اكثر من شبابية))..

طمن بااااااااالك..

تحياتي
** حسن **
:cool: