قصتي مع اللكزس RX330 2004

Queen Knight @user_12377 · 20-01-2005

السلام عليكم ورحمة الله وبركاته

كيف الحال شباب؟؟

أنا شريت لكزس ار اكس 330 موديل 2004 ... والظاهر جتني عين عليه واللي صار اني رقيت رصيف و تضررت السيارة من تحت و صلحتها في الوكالة قبل 3 شهور ... ولاحظت ان السيارة مو مثل قبل و انا انقهرت من ذا الشي لاني احب هذي السيارة مره ..

و أفكر إني أبدله وما أدري كم بتجيب لي سعر .. مع العلم إن السيارة نظيفه جدا جدا من الداخل والخارج ... برايكم كم راح تجيب سعر؟مع العلم ماشية 20 ألف ... ولونها بحري فاتح ... وبرايكم اني أبدله بنفس السيارة بس جديدة 2005 او اشتري سيارة ثانيه حلوة من نفس الفئه او غيرها بس ما يزيد سعرها عن 150 الف ريال ... وش رايكم؟

msh3l1 @user_9394 · 22-01-2005

صدقني ما راح تلقى مثل اللكزس

لذلك انصحك بعه و خذ لك rx 2005 فل

و اللون على ذوقك و انصحك بالرمادي و يسمونه بعد فيراني

المطرفي @user_7273 · 22-01-2005

شف أخوي أنا معي RX330 2005 ماشيه تقريبا 42 الف
لون بيج .. صراحة سيارة وبس .. بس مشكلتي إني راعي بر
وهي مهي سيارة بر .. وقلت أبيعها وشتري مرسيد M قبل ما أدري إنه بيتغير
وعرضتها بكذا محل ومعرض وماجابت إلى 110 رغم إني شاريها 170 الف
فيه ناس يقولون تجيب أكثر .. وإنشاء الله راح أبيعها وغيرها
إما مرسيدس M350 أو مورانو نيسان وشكلي بعزم على مورانو لآنه أرخص
وأفضل في التطعيس

عزوووزي @user_6717 · 22-01-2005

والله ماانت محصل سيارة زي اللكزس والسيارة انت عارفها واعتقد انها مرة عاجبتك وخاصة ان 2005

شاشة ملاحة وكاميرا يعني مررة رووعة فأنا انصحك انك تبدلها في الوكالة او انك تبيعها في السوق

وتزيدها الفلوس الي تكملك الار اكس الجديد ، وعالعموم ماانت محصل سيارة احسن منها او تقارن بها

غير الطوارق فولكس واجن وعلى حدود سعرك تنطبق عليها النص فل منها الي ماتقارن باللكزس الار اكس . .

سلااااااااااااااااااااااااااااااام

الأسطورة مستمرة @user_17032 · 22-01-2005

الله يعينك أخوي وأنـــا رأيي تبيعها عند الوكــالة أفضل
وإذا بعتها خذلك أكورد 2005 أبيض فل كامل أربعة سلندر وبتدعيلــــــــــي.

Queen Knight @user_12377 صاحب الموضوع · 22-01-2005

مشكورين شباب اللي رديتوا بس وين الباقيين ؟ : " (

الجـــــــ02ـــهـني @user_6250 · 22-01-2005

والله سعرها حيطيح الله يعينك اخوي

DMX666 @user_16632 · 21-01-2005

بعها عند الوكالة واشتر طوارق نص فل 6 سلندر ب150 وبالتوفيق

Queen Knight @user_12377 صاحب الموضوع · 21-01-2005

شباب مشكورين على ردودكم .. وانا اشوف السيارة كويسه وما عليها ( لكن ) مو مثل قبل وهذا اكثر شي يضايقني ... طيب في رايكم ابدلها وش اجيب ؟ ار اكس الجديد ولا سيارة مختلفه ؟

مهووس السيارات @user_4736 · 21-01-2005

أخوي طال عمرك أعرضها في المعارض وشوف كم تجيب أنا اتوقع 120 ألف إذا ما تضرر الشاسيه وانتبه من الشريطيه ترى يكسرون سوقها أو إنك تبدلها في الوكاله وتدفع الفرق وترى الوكاله عارفه وش سار فيها لأنهم عندهم ملف عن كل سياره مسجله عندهم في الصيانه وبذلك برضه بيكسرون سوقها...................... عموما الله يوفقك وتبيعها بسعر حلو ويعوضك غيرها ولا يجيك مكروه

silver_Accord @user_14213 · 21-01-2005

عليكمـ السلامـ ورحمة الله
اهلاً اخي Mr.ss
"قل لن يصيبنا إلا ما كتب الله لنا"
اولاً: الحمد لله على سلامتك وفي الحديد ولا في العبيد
بالنسبة لتبديل السيارة وقيمتها بعد الحادث ,, ما عندي فكرة ابداً
اتمنى من الشباب الخبراء يفيدوك في الموضوع
بس حبيت امسي عليك
ومن العايدين والفايزين
:)