متسوبيشي باجيرو....من المنافس؟؟

شكرا جزيلا اخي KeN على هذا التوضيح الرائع

الصراحة الموتر خاش مزاجي مره .. ورحت للوكاله في الرياض طبعا .. الربع باجير موتر ينحب

وشفت عندهم واحد لونه ازرق وجلد اسود روعه وجذاب حيل

وصراحه قلت مابدهاش حيا ومير ادخل على المدير قلت وكالة العيسى كل العالم يشتكون منها قطع غيار غير متوفر وصيانه الله بالخير كيف اطئن وقتني سياره منكم
قال كلام صحيح اول بس الحين إنشاءلله راح نفتح ورشه ضخمه ومجهزه بأعلى مستوى وقطع غيار الجيب انا كفيلها
اي قطعه تعال لي إذا ماهي متوفره .. رده حلو صراحه
بس ودي اسئلك KeN على كلامك السيارة ماتصلح للرحلات الطويله هل جربتها على السرعات العاليه 140 و160 هل هي مزعجه .. وهل هي سيارة سفر
انا ناويه بس بعد ماينزل 2006
ماهي احلى شي في مواصفاته .. وهل هو زينون واطي وعالي
بس صراحة 300ك يصرف بانزين
ماهو نوع الجلد في سيارتك ؟
تحياتي لك ولله يوفقك ويطعمك من خيرها ويكفيك شرها يارب

هلا أخوي محرك
بالنسبة للسعر فهو 111000 .. طبعاً .. مع حب الخشوم .. والا هو أصلاً 114500 ريال.
بالنسبة لأحسن لون .. أعتقد إنه اللؤلؤي .. بس مشكلته ما يجي إلا على الكبير مو الصغير .. أنا أخذت لي أسود كامل وبصراحة .. ذبحني هاللون .. أقل شمخ يبين فيه .. والغبار بعد .. يعني .. ما يصلح.
بالنسبة للبنزين .. فل تقريباً تعبيه بـ 61 ريال .. ويمشيك تقريباً أبو 480 كيلو على الخطوط السريعة .. أما داخل البلد .. أعتقد يمشيك 300 كيلو (أعتقد كذا .. ماني متأكد).
بالنسبة للراحة .. أنا أشوفه ..زين .. بس أنت حط في الإعتبار إن تعليق السيارة ..هو تعليق جيب مو سيارة سيدان. والعزل .. تقريباً كويس وصوت المكينة مرة ناعم.
القير الأوتوماتيك للمكينة 3800 هو 5 غيارات (تيبترونيك) أما للمكينة 3000 فهو 4 غيارات مع تيبترونيك.
وبالنسبة للتفجير .. والله ما جربت إني أفجر فيه .. لأن الموتر لسى جديد .. ولاحقين على هالشغلات.

تحياتي

KeN

الباجيرو سيارة حلوة وقوية وانا كان ودي اخذ باجيرو ولكن رحت عند النيسان وعجبي الباث واخذت واحد ولكن انا اقول لك انتظر شوي يمكن الباث يعجبك وتا خذ مثلي على قولة الاخNight Hawk .........
وانت ورايك والله يوفقك في اللي بتاخذ

شوف اخوي
السيارة ذات جودة عالية وتحمل شديد جدا
اذكر مرة طلعت مع الشباب بباجيرو حق اخو واحد منهم
وكنا 5 اشخاص وما شاء الله من اصحاب الوزن الثقيل
وكان ايضا معنا عفش حق 3 سيارات
وكلنا (5 اشخاص+العفش) كنا داخل الباجيرو (داخله؟؟لا ياشيخ اجل بتركبون فوق ههههههههههههه)
وكان قوي مرة ويطلع الطعوس..

بس عيبه غلاء القطع وصعوبة الصيانة
ووكيل زفت اواسؤ
السعر جيد عموما مقارنة بالمنافسين (برادو-باث)
بس وش رايك تصبر شوي وتشوف لك الباث 2006 يمكن يعجبك

صراحة انا افكر فيه

س1- كم سعره ؟
س2- وش احسن لون؟
س3- كم تعبي بنزين وكم يمشي من كيلو؟
س4 - هل هو مريح والصوت (العزل)؟
س5- كم نمره القير ؟ وهل ترتفع الحراره في التفجير ؟
مدة الأجابه 10دقايق فقط وبعده نسحب البقره قصدي الورقه <<متابع الوادي :D

أنا شفت الباجيرو ربع أبو بابين فل أوبشن جلد فتحة قير توماتيك، صراحة السيارة تحسها قويييييية وحقت واحد زادت فلوسه ويبي جيب حق كشته هو وأصحابه أو يطلع بها للطائف وأبها يومين ويرجع، يحس إن مافيه حاجة راح توقف في طريقه !!

ونفسي أعرف ليش اللي ياخذون جيب تويوتا حبة وربع اللي مافيها إلا قير ومكينة ستة سلندر وعصا قير عادي وكراسيها النحيفة اللي ماتغيرت من الثمانينات، ويموتوووووووووون فيها بشكل غريب عجيب في وقت بإمكانك أنك تشتري وبنفس القيمة وبجودة يابانية قوية باجيرو ربع بفرامل إيه بي إس ووسادات هوائية وأنظمة أمان وجلد وحاجات فخمة؟ يعني خاصة اللي يقهرني إنو نفس السعر مثلا لو افترضنا إنها مش فل اوبشن؟!؟ ... أشوفها في اليمن وجنوب السعودية عندهم الجيب ربع أطلللللللللق من البي إم والمرسيدس واللي معاه واحدة كنه إمتلك الدنيا !! طب ياخي الباجيرو مرودودها وموصفاتها مقابل السعر أفضل بمائة مرة ياأخي !؟!

أخوي NAH أنا عندي باجيرو 2005 ربع 3800 سي سي .. فل أبشن .. أشتريته قبل شهرين ونص تقريباً ... بصراحة الموتر ولا أروع .. بس يصرف بنزين (الجيوب كلها تصرف) لكن لأن تانكيه صغير .. فـ صرفيته تصير كأنها كبيرة.

من ناحية الطعوس .. أنا مرة طعست فيه .. في رمل خفيف .. وكان سلس مررررررررررة .. لكن في رمل ثقيل ما جربته .. لكن ناوي أجرب إن شاء الله بس لما يجي الوقت المناسب ( لا تسألني متى) :)

وإذا بغيت أي معلومات عن الباجيرو .. أنا جاهز ..

تحياتي

KeN

انا ايضا لدي باجيرو اربع ابواب الفئة الاقتصادية جي ال اس 190 حصان ممتاز في كل شيء تقريبا , صحيح ان ثقيل

نسبيا في القومة لكنه في الرمال خفيف ويعجبك ان شاء الله .

البديل يمكن تلقاه في النيسان الربع ، انصحك انك تصلي الاستخارة قبل كل شي.

مبروك مقدما .. تحياتي.