السياره موجوده عندي لكن الحقيقه عزلها مو الى ذيك الدرجه
ووديتها للوكاله وقالو صلحناها لك ويوم جربتها واثاريها هي هي ما لمسو فيها شي يعني تي تي مثل ما رحتي جيتي
السلام وعليكم
حبيت أسآل هل كنت متوقع إن السيارة عزلها ممتاز يعني كاتم الصوت ولا يكون في تنسيم بسيط ؟؟
أغلب السيارات فيها عازل الصوت متوسط إلى قوي يعني تتوقع يحصل مثل هذه في السيارات الجديدة أمر وارد ولو إنت حساس من التنسيم لا تسرع عشان ما يرجع الصوت مرة أخرى في السرعات العالية والأفضل إنت تفتح المسجل أو الراديو مثل ما قلت إن الراديو جيد
والشي الثاني الي هو المكيف الي ورا ماهو مستقل 100% مثل ماقالو يعيبه اني ما اقدر اطول على اخر درجه الى لما يكون الي قدام حاط القوه كلها يعني ما اقدر اتحكم الى في تخفيف الدرجه حقت دفع الهواء فقط اما تقويتها لا استطيع الى اذا صار الي قدام واضع الدرجه القصوى اما بانسبه للحراره فا تستطيع تخفيفها واظاهر زيادتها بعد
أما هذه هي نقطة الضعف فيها لو كلامك صحيح ولاكن يمديك أن تتخطاها عن طريق وضع عازل حراري في السيارة و توقيف السيارة في مكان مظلل لا يوجد فيها شمس أو تقدر تعمل تحويل مسار المكيف أي تخليه يطلع الهواء من تحت أي الأرجل أو من الجنب لو كانت فيها هذه !!
يعني يمديك تحل المشكلة بأي وسيلة ولو أنا أرى إنها من العيوب التصنيعية أتمنى أن يتفادوها مستقبلاً
والشي الثالث انك ماتقدر تتعدى 160 وكلمت الوكاله لعلهم يفصلونها لكن في النهايه رفضوا وكل واحد يعطيني تصريفه وطبعاً لو تفصلها خارج الوكاله ودرو عنك بيشيلون الضمان على طول
والشي الرابع لا يوجد زينون لا في الواطي ولا في العالي وبرضه كلمت الوكاله انهم يركبون وكذلك رفضو وقالو ماعندنا زينون يركب وقلت لهم طيب لو اركب من برا عادي وطبعاً قال لا يلغي الضمان حقك يعني نذاله بالعربي
أنا أقولك ليش
وين رايح بعد ما تتعدى 160 تبغى تطير |3|
السيارة سيارة عائلية يعني لو سمح الله عديت الـ 160 وحصل لك حاجة إنت والعائلة كفانا الله من كل شر
وقتها ماذا تفعل ؟؟؟
هم ما حطو هذه إلا بسبب ما يخرب عليك المكينة في السرعات العالية لأنه إذا حصل وإنت عدلت البرمجة وفكيت السرعة وتعطل المكينة بعد ما عديت السرعة المذكورة أو المكينة بدأت تخبص !!! فأكيد الشركة مالها صلاح ولا تريد أن تحمل مسؤوليتها بسبب تعدي النصائح وخرق الضمان
وأنا عندي لك نصيحة لو تبغى تعدل بعد ما يخلص الضمان سوي الي تبغاه ولاكن الأن السيارة مخصصة للعائلة وليست للشباب يعني لا تفكر تحط حاجة زي الزينون أو شاشة الأن أصبر ......
والشي الرابع النظام حق التماسك اذا فصلته ودعست على طول يرجع مره ثانيه يعني الزرار هذا ماراح تستفيد منه
هذا ما أعرف وظيفته بحكم عندي عادي وليست أوتو
ياليت الشرح
والشي الخامس بانسبه للريموت حق الأبواب (حقت الفل كامل) هذا كنت طالب واحد قبل لا اشتري السياره وكانو يقولون لي ان سعره بحدود 400 ريال بعدين قالو 525 ريال وبرضه قلت عادي مافيه مشكله نمشيها ويوم استلمت السياره ورحت اشتري الريموت وجاء وقت الجد قالو لا سعر الريموت مع البرمجه ومدري ايش 800 ريال !!!! وطبعاً قلت كيف تقولون اول 525 والحين كذا واخذت وعطيت معهم لكن مافيه فايده يعني انس تاخذ حقك و خليته لهم وعلى طول جاء في بالي انهم اكبر استغلاليين والصراحه انقهرت ولا قدرت اسوي شي لأني عارف اني ماراح اطلع بنتيجه مع الأشكال هذي
جينا في الريموت
الريموت يكلف الشركة الكثيير لأن القطعة غير موجودة في الشركة فهم يطلبوها من اليابان عن طريق إرسالها رقم الهيكل السيارة والشركة مازدا تعطيك الريموت يعني جاهز وهذا يكلف من 500 إلى 900 يعني قيمة الريموت لوحده 600 وحوليها أما قيمة البرمجة هذه ما أعرف قسم الصيانة هم أدرى
والشي السادس تعبيها فل وهي 75 لتر وماتمشيك الى بحدود 580 كم يعني التر الواحد يمشي 7.7 هذا وهو وقت التمرين يعني مدلعه اجل وش لون اذا جاها تدعيس خفيف !!! يعني الصراحه تصرف
المميزات
غريبة وشفيها يعني تتوقع إنها ما تصرف شوف مكينتها كم 270 حصان + 37 لتر
على فكرة السيارات الي في فئتها إستهلاكها مثلها أو أكثر بقليل .... شوف جي أم سي أكاديا كم إستهلاكها من الوقود وأحكم والله أعلم
تغير عند صيانة ال1000 كم طلبو فقط 87 ريال قيمة الزيت والفلتر حق المكينه وهي تاخذ 6 علب والفلتر قيمته 15 ريال يعني الحقيقه سعرهم معقول وارخص من اني اغيرها في الورش العاديه حقت الزيوت وفي نفس الوقت قلتلهم عن مشكلة التنسيم كما قلت سابقاً ولم يفعلو فيها شي لكن بروح لهم مره ثانيه واشوف عاد وش الوضع
والشي الثاني بانسبه للمطبات فهي معقوله وليست مريحه مره يعني اريح من الهوندا شوي بسبب كبر الجنط (مقاس 20) وتعليقها قاسي وهذا الي خلها راسيه لكن بنسبه لعيون القطط فهي في قمه الراحه فيها وشبه ماتحس فيها لكن تسمع صوتها على خفيف فقط بسبب عرض الكفر
والشي الثالث المسجل ابداع وفي قمة نقاء الصوت ووضوحه
وبانسبه ل امبير الحراره فاهو على النص ثابت ولا ادري عاد كيف راح تكون في الصيف والله يستر
وفي النهايه اذا عاجبتك وناوي تشتري ولا تبيع فا اشترها اما اذا ناوي تبيع لا تشتريها تراها ماتمسك سعرها مره يعني السياره اشتر ولا تفكر تبيع ابد وقيادتها ممتعه والحقيقه اعتبر سعرها قليل عليها وتستاهل اكثر (قياساً في الوكالات الثانيه ومواصفاتهم العاديه واسعارهم الغاليه)
واي استفسار انا حاضر وفي الخدمه
هذا بحكم إنك مجرب
أنا ما أقدر أزيد على الي قلته
وفي حاجه بعد اكتشفتها يبدو والله العالم ان مكينتها من شركة فورد لأن يوم رحت الوكاله وغيروا الريت والفلتر كتبين زيت فورد والفلتر بعد نوعه فورد
صحيح الفلتر فلتر سيارة ماونتنير ميركوري الي تابعة لشركة فورد
والسبب إن الشركة طلبت فلتر للسيارة CX-9 وعند فكها في الوكالة شافوها مثلها مثل فلتر الميركوري 100% ولاكن السعر لصالح الميركوري لأنه أرخص وأما CX-9 فهو أغلى
والعجيب إن الشركة المصنعة للفلتر هي وحدة بس المازدا تجي عن طريق إمريكا + اليابان + عندنا = المستهلك والتكلفه تجي أعلى
أما الميركوري فهي تجي عن طريق إمريكا +عندنا = المستهلك والتكلفة تجي أقل
هذا والله أعلم
وشكراً لك ,,,,,,
