السلام عليكم ورحمه الله وبركاته
انا يا جماعه اعاني من مشكله عويصه تخليني احياناً افكر اني ابيع السياره من كثر ما ضايقتني هذه المشكله :: مشكلتي يا جماعه الخير تتلخص بالتالي :
انا عندي سياره من نوع لكزس LS460 موديل 2007 ظهرت لي رساله في الطبلون مضمونها يقول تأكد من فحص الاطارات وكذلك طالعه لي بعد علامه تعجب في الطبلون .. وديتها للوكاله في صيانه 30000 وقلت لهم عن المشكله وقالوا المسأله بسيطه مجرد اننا نوزن لك هوى الاطارات ونسوي لك برمجه وراح تختفي الاشاره هذي قلت تمام توكلوا على الله وبعد ما طلعت السياره من الوكاله فعلاً لقيت اللمبه مختفيه فرحت كثير وقلت الحمد لله الامور رجعت زي الاول واحسن وبعد يومين بالضبط رجعت اللمبه مره ثانيه ورجعت لي ضيقه الصدر ... قلت لا حول ولا قوه الا بالله ... اتصلت بمهندس الاستقبال في الوكاله وقلت له المشكله واستغرب كثير وقال حنا وزنا لك هوى الاطارات واعدنا البرمجه غريبه ولعت اللمبه مره ثانيه ... قلت والله ما ادري وش اللي خلاها تولع بصراحه بس الزبده انها ولعت مره ثانيه وخلاص ... قال اوكيه جبها مره ثانيه وخلنا نتأكد من الوزنيه حقت الاطارات ونتأكد كمان من وزنيه الاطار الاحتياطي (( الاسبير )) لان ممكن تكون المشكله منه .. قلت اوكيه ورجعتها الوكاله مره ثانيه وطلعتها واللمبه مختفيه فرحت مره ثانيه ولكن نفس الشي وبعد ما طلعتها من الوكاله وانا في طريقي للبيت ولعت اللمبه مره ثانيه ويا فرحه ما تمت ... رجعتها علطول للوكاله ودخلت على مهندس الاستقبال وانا معصب بصراحه رغم ان تعامله اكثر من راقي بصراحه قال استريح وجاب لي مويه وقالي هد اعصابك ولا يكون خاطرك الا طيب انا بخلي الكهربائي الحين يكشف عليها وانشالله تنتهي المشكله قلت له اوكيه وبعد كشف الكهربائي على السياره وبعد ما تأكد من حساسات الكفرات انها سليمه قال كل شي اوكيه بس بسوي برمجه مره ثانيه وانشالله تنتهي المشكله قلت اوكيه .... وفعلاً وانا قاعد اتقهوى في مكتب المهندس جاني الكهربائي وقال لي خلاص ترى السياره جاهزه وطلعتها من الوكاله وانا عارف ومتأكد انها راح تولع مره ثانيه مر اليوم الاول ولا ولعت بغيت اطير من الفرحه ... وفي اليوم الثاني وانا راجع للبيت وتوني مدخل السياره في الكراج والفرحه غامرتني بإني انهيت مشكله اللمبه ولعت اللمبه للمره الثالثه على التوالي ....
والله يا جماعه الخير اني معد ادري وش اسوي والله اني بديت اكره السياره بسبب اللمبه هذي اللي مهيب راضيه تروح ابد ولا ادري وش السواه معها .. ياليت يا اخوان اللي يقدر يساعدني برايه ولا عنده خبره في ذا الموضوع لا يبخل علي ...
وهذي صور للمبه اللي مسببه لي معاناه كبيره الله يكفينا وياكم شرها انشالله ....
وانا اسف على الاطاله ..... يعطيكم العافيه انشالله ...
