السلام عليكم
كل واحد له وجهة نظر تخصه وحنا هنا نتشارك وجهات النظر
من خلال التجربه مع الكابرس 2006 ماهي معي انا مع ولد عمي مدري هي عين صابتها والا هي كذا
الكابرس من ناحية القوة قوي ودعسته مجنونه لكن كل يوم يسولف لي ان الموتر فيه كذا وفيه كذا
وكل يوم موديه للوكاله مدري وش يصلحون فيه
من ناحية الخط الموتر ثابت لكن مراتبه ماهي مريحه ( بالنسبه لي )
الرجال ترك الموتر لأبوه رجال كبير بالسن واستعماله له خفيف جدا يعني من بيته الى 20 كم حدوده
واحيانا يخربها ويقطع 80كم والموتر اشوفه مع ابوه ( اللي هو عمي ) تمام التمام
وهذا ان دل دل على ان الكابرس ماهو عملي حق كشخه واستعمال خفيف ودوبك دوبك
اما الفكتوريا والماركيز الاثنين وجهين لعمله وحده
وبتتعب وانت تدور الاثنين لكن بعلمك اللي انا حصلته لاني للحين ابحث
الاثنين هذول من ناحية الاداء واحد ولافيه شي يفرق اللي يقول لك ان الفكتوريا يصبر اكثر من الماركيز تراه غلطان
لان كل محركاتهم وحده وما تفرق عن الثانيه بشي
الفرق بالاكسسوارات فقط
واللي يقولك ان الماركيز ارسى واريح من الفكتوريا غلطان
وهذا شي يبعثه التصميم الداخلي للماركيز من الراحه النفسيه بسبب التخشيبه اللي تجي اكبر ومن بعض الاكسسوارات الداخليه والخارجيه
وانت تبحث لا تاخذ الاستخدام الامريكي للفكتوريا لانهم هناك يستخدمونها الامن والتكاسي يعني مكروفات كرف مهو سهل
تبي الامريكي خذ الماركيز لانهم هناك يستخدمونها استخدام شخصي مع العلم ان اللي هنا يعدلون عليها
وفيه شغله انتبه لها كثير
ترى اكثر الفرود اللي تشوفها واقفه بسبب الحراره شكمان واحد فاحذر تاخذ شكمان واحد خذ شكمانين
بامريكا الجو ابرد مننا بكثير وعليه ينتجون لهم فرود شكمان واحد
هنا للتوافق مع الاجواء السعوديه او الخليجيه يجيبون فرود شكمانين
فراح تلاحظ ان اغلب الامريكي شكمان واحد والعكس صحيح السعودي اغلبه شكمانين
اول ما تناظر الموتر ناظر الكبوت من اوله لاخره اذا كان جته صدمه ترى ضبط وزنه الكبوت صعبه بالحيل اذا ما قلت لك مستحيله
يعني من السهل انك تلاحظ الكبوت اذا مضروب او لا مو مثل الاماكن الثانيه العالم صارت فنانه بالاخفاء
اما نظام المكيف الالكتروني والعادي ما فيه مشكله بالضبط بس احيانا الالكتروني يسبب مشاكل
ما يسببها العادي
فأفضل ( كنصيحه ) انك تاخذ عادي
اما انه يعطي هوا حار فهذا فيه مشكله بنفس موتر اللي قالك لان اكثر اللي معهم فرود ما قالوا هالشغله هذي
واكثرهم يقول بنص الظهر شغلة من خمس الى عشر دقايق والسياره كلها بارده
الطبلون الالكتروني والعادي ما اعتقد بينهم فرق
فان بغيت الشور فانا انصحك بالماركيز اولا والفكتويا ثانيا والماركيز انا قاعد ابحث عنه
وهذا لعدة اسباب للمقارنه بينه وبين باقي السيارات
1 فخم فلو طال بك الوقت ما تمله
2 يتحمل حاله حال الفكتوريا
3 مصاريفه جدا ممتازه
4 قطع غياره رخيصه ومتوفره
5 صيانته سهله
6 جميع من استخدمه يثني عليه
7 راحه ما تحسسك بالخط
8 قوته وصبره اللي تخليك تشوف الموديلات القديمه تناطحك وتساقطك بالخطوط
طبعا جميع مواصفاته متطابقه مع الفكتوريا ما عدا الفخامه
وللامانه انا ما كان عندي علم فيه لكن من كثر ما سألت وطلبت الشور الشباب ما قصروا معي هنا
و الشباب اخوياي اللي استعملوا الفورد ما قصروا بالمفيد
تحياتي
اخوك دهام
