تجربتي المصوره مع فورد فايف هندرد

[/CENTER]

الحمد لله قبل تقريبا ستة شهور اشتريت السيارة فورد فايف هندرد 2008 الجديدة بعد الاستخارة والبحث والمقارنات وانا من المتابعين لهذا المنتدى الرائع واستفدت منه الكثير وان شاء الله إني أتوفق في طرح التجربه بعد الانتقال الكبير من فورد كراون فكتوريا 96 الى فايف هندرد 2008 حتى يستفيدون الأخوان المقبلين على شراء سياره جديده.

وقبل لا أنسى على البركة 100000 عضو عقبال المليار إن شاء الله <<<الحمدلله على السلامة

بسم الله نبدأ
قبل شرائي للسياره كنت ناوي على المونديو لكن وكالة الرياض قالوا خلاص بتتوقف بتجي بدالها ال500 فاحترت والله بين لومينا او اوريون او 500 او مونتيغو
شفت اللومينا واول سياره سحبت عليها
شفت المونتيغو (نزلت قبل ال500 في الطائف) ماعجبني شكلها خصوصا الاماميه (يمكن لانها مشابهه للميلان) وبالمناسبه اقل فئه شفتها مكيف يدوي ومقعد سائق متحرك فقط اما ال500 اقل فئه مكيف الكتروني بمستويين ومقعدين كهربائيه
عالعموم ثاني يوم بعد الدوام قلت نشوف توكيلات الجزيره (الثمالي في الطائف ) و صالة العرض تقدر تقول ورشتين فكوها على بعض صارت وكاله
1: سلام عليكم
2:وعليكم السلام
1:متى بتجي ال500 وكم اسعارها؟
2:ايه اسعار ايه؟؟؟
1:ال500 سياره من فورد جديده
2:مافيش سياره يا ابني بالاسم دا؟؟
كنت ناوي اعطيه محاظره عن السيارات لكن... 1:طيب متى تجي اسعار السيارات الجديده؟
2:الاسبوع الجاي
1:سلام عليكم

رحت شفت الاوريون
1:فل بكم؟؟
2: 95000 بدون الشاشه
1:طيب بطلنا سياحي بكم ؟؟
2:الذهبي هي ب 83000 بدون الرسوم
ركبت السياره والا والله السياره عرفتها ؟؟كامري
صراحه حتى التخشيب ومسكات الابواب الداخليه سوداء لكن الحق يقال انها سياره تستاهل للفل كامل شاشه لكن انا ميزانيتي حول 85000 قلت ياولد اتصل على جده واستفسر عن ال500
1:سلام عليكم
2:وعليكم السلام
1: 500 اقل فئه بكم ؟؟
2: 84500 شامل تأمين ورسوم اللوحه والاستماره
1:طيب اخضر تيتانيوم فيه ؟
2:لا اقل فئه مافيه الا 2 وحده دمام ووحده جده ؟
1:ايش الوانها؟؟
2:كلهن اسود
والا كابوس الغسيل و مفاتيح الحاسدين الشاطفه وحجارة المسرعين الطائره من امام عيني<<< وانا صاحي هالكابوس
لكن توكلت على الله و استخرت والحمدلله ثاني يوم وانا مشتري السياره
دفعت قيمتها من الرياض طلعت اللوحات من جده واستلمتها من الطائف <<<مثلث برمودا
وهذه التجربه بعد 14500 كيلو وانا كنت ناوي بعد ال10000 كيلو لكن اختبارات الكليه

بطاقة السياره:
فئة السياره: سيدان كبيره
الماركة والطراز : فورد-فايف هندرد
الموديل ودولة الصنع:2008-الولايات المتحدة الامريكية شيكاغو
الفئة: اقل فئة SEL
عداد السياره:14500 كلم


المواصفات الميكانيكيه للسياره:
الوزن:2240كلجم
المحرك: 3.5ليتر بقوة 263حصان صافي وعزم 249رطل قدم
نوع الدفع : امامي
ناقل الحركة: 6تعشيقات
السرعه القصوى: 200 كلم /ساعه
نوع البنزين :91 لكني اعبيها 95 <<محافظ زياده عن اللزوم





تجربة داخل السياره والمواصفات:
تمتاز السياره بكابين قياده مريح وفخم وواسع جدا وآمن بمشيئة الله مع 6 وسائد هوائيه وستائر هوائيه جانبيه وقضبان مانعه لانغلاق او بالاحرى انطباق السياره في الاصطدام الامامي والجانبي أفقيه وعموديه ووضعية قياده عاليه مع مقعد سائق الي بالكامل ومقغد الراكب نصف الي وبمكيف الكتروني مع عرض للحراره الخارجيه بمستويين حار بارد منفصل للسائق عن الراكب وفتحات تكييف خلفيه للركاب ومسجل صوت ب6اقراص سيدي مع مشغل mp3 ومدخل aux لاجهزة الوسائط مثل الآي بود وتحكم بالصوت والوسائط وتغيير القنوات وكتم الصوت وتثبيت السرعه من الدركسون ومركز للمعلومات مثل: المسافه المقطوعه في الرحله وومدتها والمسافه المتبقيه حتى انتهاء الوقود وبوصله وساعة توقيت .......وفي طريقه بالضغط على setupثم reset فيعطيك معلومات متتاليه عن حالة السياره : المتبقي من صلاحية الزيت –نظام الفرامل –المتبقي من الوقود –مستوى سائل مساحات الزجاج _الابواب والشنطه.

اما عدادات السياره فهي بتصميم كلاسيكي وتقليدي جدا مع اضاءة باللون الاحمر والاخضر وخلفيه سوداء يعني مافيها ابتكارو نفس الكلام للوحة المفاتيح كلاسيكيه لكنها فخمة ومرتبة وخصوصا مع زينة الخشب والكروم والجلد المغطي للدركسون وناقل الحركه وايضا وجود ثمانية مواضع للاكواب اثنين في الامام واثنين في المسند الخلفي وواحد في كل باب مع اناره للركاب في الخلف و مقاعد قابله للطي كليا مع مقعد الراكب الامامي ولكن المقاعد الخلفيه بمساند رأس ثابته.

النظام الصوتي سهل الاستخدام مع تبديل مابين الراديو والمسجل ومخرج aux والتحكم بالصوت وتغيير المسارات عن طريق الدركسون ويحتوي على 6 اقراص سيدي بالطبلون وامكانية جعل الصوت يزيد كلما ارتفعت السرعه مع خاصية الدمج وبالنسبة لأدائه فالصوت واضح جدا والسماعات (عددها 8 اكتشفت 6 منها)تؤدي عملها على الوجه المطلوب ولكن عند رفع الصوت اكثر من 50% فهي تظهر صوت التشويش الخفيف وخصوصا للي يستخدمون الاقراص المسجله.

المقصوره والمقاعد الاماميه فخمه و مريحه لكن احسها شوي صغيره يمكن لاني متعود على الفكتوريا لكن تبقى الفخامه الكلاسيكيه طاغيه عليها مع مقابض للابواب كروم وفتحات مكيف مستطيلة الشكل ولونين للابواب ومقبض ناقل الحركه مغطى بالجلد مع شريط كروم في المنتصف وشريط حوله بلون الكروم واللي للاسف طلع بلاستيك مسدس مويه حتى يمديك ترفعه بيدك يعني مش مثبت .

الطبلون الامامي المواد المستخدمه فيه جيده جدا وافضل من ربما جميع سيارات فئتها الامريكيه لكن الدرج الموجود بأعلى الطبلون الأمامي مواده جدا سيئه حتى انه في الشمس (شمس الطائف ) تسمعه يطقطق من الحراره وصراحه لو ما وضعوه كان افضل .

مقعد السائق وزنيته شغله خصوصا للطوال ولأقل فئه من السياره( لعدم وجود دواسات متحركه) لكني تعودت عليه المهم المشكله هو ان السواق يا يكون بعيد عن الدركسون ووازن الدعسات او وازن الدركسون وقريب جدا من الدعسات وحلها بوضع عجلة قياده تلسكوبيه او وضع دواسات متحركه لجميع الفئات.

المقصوره الخلفيه رحبه جدا مع لكن مقاعد احسها مسطحه شوي لكن تركبها صراحه تحس انك راكب سيارة لارج اودي لكزس مرسيدس.... بسبب الرحابه اللي بالمقصوره الخلفيه مع وجود موضع للاكواب في المسند الخلفي واناره وفتحات مكيف.
والشنطه نفس الكلام واسعه جدا ما شاء الله وداخله لجوه مو مثل الفكتوريا لاسفل.



التصميم الخارجي :
كحال لوحة القيادة من الداخل تتميز فايف هندرد بتصميم كلاسيكي لكنه مؤثر مع لمسات رياضيه و استخدام الكروم بكثره في الشبك الامامي وحول انوار الضباب والفتحات الجانبيه مع غطاء محرك بتصميم الصدفه مثل التصميم الموجود بفورد إيدج ،من الجانب تتضح المعالم الرياضيه اكثر مع الفتحات الجانبيه الكروميه وجنوط 18بوصه وهوائي زينه مثل اللي بالفئه السابعه لكن تصميم السقف مقبب زياده عن اللزوم يعني لو اركبه على البيتل يضبط لو سووا مثل الاكورد الجديده في الباب الخلفي .

اما الخلفيه فتصميم جدا عادي مثل الكرولا 2005 والكامري 2003 والمرسيدس الفياجرا خصوصا ان الانوار الخلفيه مكونه من طبقتين وبينهم فواصل بيضاء مدري ايش عاجبهم في الانوار هذي مع شكمانين مطليه بالكروم


القياده:
السياره بمحرك ست الاسطوانات وناقل سرعه ذو 6 غيارات والقياده ممتعه صراحه خصوصا لاداء المحرك وانظمة التعليق في الطريق خصوصا ان السياره طولها اكثر من 5 امتار ووزنها اكثر من 2 طن مع عزل صوتي جيد جدا سواء للطريق او للهواء الخارجي ودقه ممتازه للدركسون والحمد لله السياره مافيها اصوات ابد في الديكور او غيره بالرغم ان شوارع الطائف مصابه بحساسيه مفرطه (باستثناء النقطه المتعلقه بالدرج العلوي واللي مشكلته عند الوقوف في الشمس لفترات طويله).

وهناك صوت واحد انا تاكدت منه راح تستغربون منه لكن خزان البنزين كل ما عبيته فل اسمع صوت البنزين وهو يتحرك مثل صوت جركل الماء لما يكون فيه مثلا النص وتهزه نفس صوت الماء فصرت اعبيها فل الا ربعا والسياره استجابتها وتجاوبها رائع وهدوء وراحه جيده جدا وثبات جيدجدا لسيارة دفع امامي وسلاسة تغيير ناقل الحركه صعودا ممتازة ماتحس بها لكن نزولا فهو يتاخر شوي والسياره ما شاء الله امشي 140ضغط الهواء تقريبا على 2 والصرفية في الخط ممتازه خصوصا مع مثبت السرعه 6-7 ليتر لكل مئة كيلو أما داخل المدينة مابين 9_13 ليتر على حسب المزاج

مميزات في نظري:
-رحابه المقصورة والشنطه وهي الأوسع في فئتها

-مواصفات قياسيه للراحة عديدة

-أأمن سيارة كبيرة الحجم بأمريكا والأقدار بيد الله سبحانه

-محرك متجاوب مع توفير للوقود في الخطوط السريعة

- سعر معقول بالنسبة لفئتها
.........
سلبيات في نظري :
- جودة بعض المواد في الداخل

- تصميم كلاسيكي


المشكلات : واجهتني مشكله وحده فيها وهي صوت خفيف جدا عند طلوع طلعه بسرعة منخفضة وبالأحرى لما أوقف في وسط الطلعة واطلع شوي شوي ررررررر لكن الحمد لله نزلت السيارة جده الأربعاء والسبت استلمتها برمجه وراح الصوت الحمد لله

الصيانة :
الحمد لله تعامل توكيلات الجزيرة جده طريق المدينة ممتاز والعكس تماما الثمالي الطائف وأعطوني بوك صيانة مثل دفتر الشيكات إلى 64000 كلم صيانة مجانية يعني مرتاح لكن اذكر سعر صيانة 8000 حول 325 ريال وصيانة 16000 حول 600 ريال وصيانة 24000 حول 1200 ريال هذي أسعار الثمالي بالطائف مدري عن الفروع الثانية



[/CENTER]