تلاعب ونصب أصحاب الصناعيه (( قصه حصلت لي )) !!

السلام عليكم ..


اليوم صارت لي سالفه بالصناعيه لكن اببدى باحداث وقعت من قبل مرتبطه بهالقصه ..



قبل تقريبا 9 شهور ..

كنت امشي باحد شوارع الرياض الفرعيه .. كان الوقت ليل ..

طبعا انا كنت امشي 80كم ..

الشارع وسيع نوعا ما .. وفوق هذا كنت مركب زينون ورافع النور .. يعني النور تمام .. لكن الوقت كان ليل + مافيه اناره بالشارع ..

المهم .. فجأه ولا قدامي حفريتين محفوره بشكل عرضي على الشارع .. يعني قاطعه الشارع قطع ..

هالحفريتين ورا بعض مباشره ومدفونه .. لكن ما زٌفلتت ..

يعني كل وحده تقريبا بعمق 10سم ( تقريبا)

المهم حاولت اتفاداها ما قدرت فـ طحت فيها على سرعتي ..

طبعا تنرفزت والسياره كانت جديده ومحافظ عليها .. والصراحه الحفر تعور القلب والله ..


قفلت الاخلاق ومشيت البيت ..

من بكره طلعت مشاوير بالسياره .. الاحظ ان المكينه فيها رجه شوي وانا واقف + فيه صوت اذا اكلت حفره بالكفر الايسر .:c0214:


قلت لا توسوس يارجال ..

بعدها بقرابة 3 شهور .. قلت ياولد الرجه كنها مو طبيعيه + صوت بجهه اليسرى كل ما اكلت حفره ..

رحت لورشه واحد اعرفه معرفه سطحيه وقلت ابي اشوف وش فيها ..

طلع معي واحد فلبيني فاااهم ما شا الله عليه ..

ساقها وجرب اكل كم حفره خفيفه .. ثم رجع رفع السياره . قال عندك كرسي العكس تعبان ..

قلت افا :(

رحت الوكاله من بكره الصبح .. وقلت السياره فيها كذا وكذا وكذا (( السياره وقتها ما زالت على الضمان ))

قالوا ok ..


خلها وحنا نتصل عليك ..

اليوم الاول ما اتصلوا .. من بكره اتصلوا قالوا تعال استلم السياره ..

قلت وش فيها ..

قالوا ابد كرسي مكينه مكسور + مساعد منفقع غيرناهم لك (( انا بلّمت هنا :confused1: ))


قلبي طاح ببطني والله ..

رحت ركض للوكاله << مو ركض يعني .. لكن اسلوب مبالغه :D

المهم .. صلحوها على حسابهم واستلمت السياره ويالله لك الحمد احسن من اول ..


----------------------------------------------


بعد فتره اكتشفت ان الكفر الايسر محبل :)

قمت بدلته بالاستبنه

والظاهر انه بسبب الحفريتين اللي طحت فيهم ..


---------------------------------------------



قبل قرابة الشهر ..

صرت اذا امشي .. وابغا الف يسار ولا يمين ..

اسمع صوت اذا جيت الف (( فقط اذا لفيت مو وانا ماشي ))

صوت يشبه :

اذا كان فيه صخره صغيره عالقه بالكفر وانت تمشي عليها .. طق طق طق .. لكن خفيف ))


وقفت اشوف فيه صخره فيه مسمار ؟؟

ولا شي :confused1:


قلت تروح مع الوقت ..


ولا راحت .. صار لها شهر الان ولا راحت ..


واحد من اخوياي قال هذا كرسي العكس راح عليك ,.

انا:a120(115):

قمت اسب بهالسياره وفيها وما فيها ..


الزبده قلت والله ما اغير ولا شي (( خصوصا انها طلعت من الضمان ))


وصار لي شهر وعلى هالحاله ..

قبل فتره قلت خل اسير على الصناعيه اشوف وش فيها ..


وهنا الزبده ::

رحت اول ورشه ..

السلام عليكم .. وعليكم السلام ..

المشكله كذا وكذا .. قام يناظر الكفر ونزل تحت السياره ويحوس .. قال يا عمي هذا قاعدة مدري كرسي العكس ..


قلت قل غيرها .. قال اي والله ..


رحت لورشه ثانيه .. نفس الشي يحوس ويلف قال هذي رمانة الكفر ..


انا طرطعت ...


رحت لثالثه قال كرسي + رمانة العكس ..


قفلت الاخلاق ورجعت البيت ..


----------------------------------------

اليوم شفت نفسي فاضي جدا الصبح . قلت خل اروح للورشه اللي رحت لها اول مره يوم اشوف المساعد ..

رحت ولا راعي الورشه موجود (( سعودي ))

قلت المشكله كذا وفيها صوت ..

قال طيب .. ركب مكان السواق وركبت جمبه وطلع يجرب السياره ..

طبعا اول ما قلت له المشكله قال الله اعلم انه العكس اذا فيه صوت ..


يوم جربها وسمع الصوت (( الصوت مهوب عالي مره .. بالضبط كانه صخره عالقه بالكفر ))

قال يارجال هذا الكفر فيه مسمار ولا فيه شي ..

رح للمحطه اللي باول الشارع وسو لها رقعه وصلى الله وبارك ..


قلت طيب والورش الباقيه اللي قالوا عكس وقاعدة عكس ورمانه و.....الخ

قال ما عليك ذولا نصابين .. يقولون اشتر القطع وخل السياره عندنا ساعتين ثم ارجع خذها ..

وهم مجرد انهم يصلحون خراب بسيط وتافه وما يكلف عشره ريال ..


وياخذون فلوس التغيير مبلغ وقدره + القطع اللي انت جايبها ..


انا صراحه انقهرت والله ..

قال اسمع ..


مره جايني واحد قال قال ابي افك الدفرنس واغير رمانة الدفرنس (( اسمها كذا الظاهر ))

المهم خوينا قال ليش سلمات ؟؟

قال والله وانا امشي اسمع صوت (( طق طق طق طق طق ))

رحت لكم ورشه قالوا الخراب بالدفرنس يبيله فك ..


قال دخلها .. دخلها الورشه فحصها الفلبيني وكم واحد ..

قالوا يالحبيب .. هذا مسمار كبير بالكفر الخلفي كل ما مشيت عليه يطلع هالصوت ..


وراح طلع المسمار ورقعه ب10 ريال .. والورش النصابين طالبين مبلغ كبير عشان فك دفرنس ومدري ايش ..


فالموضوع عشان تنتبهون من هاللي ما يخافون الله ..

الواحد لا خلا سيارته بورشه .. مهما كان الخراب والمده ..

لا تخليها عندهم وتمشي ..

مستعجل ؟؟

جبها بيوم ثاني ولا خل و احد من اخوياك الذيابه اللي تعتمد عليهم يقعد يشرف عليهم ..


اما تخليها وتمشي .. بينلعب عليك زي ما انلعب على هالمسكين ..

-------------------------------------------------------------------------------


المهم :D


ارجع لسالفتي ..

يوم قالي ان المشكله مسمار بالكفر ارررررتحت والله ..

ورجعت البيت ونمت قرير العين ..

قمت العصر .. قلت خل اروح لبنشري اعرفه .. مضبوط وامين ..


قلت له سالفة الصوت وقلت فيه مسمار ..

رفع السياره .. لف الكفر ..فك الكفر .. ما فيه مسمار ؟؟؟ :confused1:

قال مافيه مسمار ؟؟


انا استغربت بعد ..

قلت لا تقول الحين رمان ولا عكس ويطلع فيه مشكله جد :(


قال طيب جبها على الميزان .


واحطها على الميزان وينزل تحتها .. اكسر يمين .. اكسر يسار ..

مافيه شي الكفر ؟؟


قلت خلاص اجل (( وانا ضااااايق صدري والله ))

يوم جيت امشي ..

قال اصبر .. محاوله اخيره :)

قال خل نفك الكفر اللي قدام يسار (( اللي منه الصوت والمشكله ))

ونبدله مع اللي ورا ..


قلت والله قدام ok ..


بدله مع اللي ورا ..


يوم فك اللي ورا .. لقا ان الكفر فيه شلخ ( شق ) دار مدار الكفر :)

----------------------------------------------

على فكره :

كان الكفر الخلفي يسار ينسم مع الوقت .. يعني كل 4 ايام تقريبا اعبيه هوا .. اجي بعد الاربع ايام القاه منسم وضغطه 15 :(

------------------------------------------------


انا خفت لمن شفته والله :D


المهم قال مؤقتا خل نبدله مع اللي قدام وامش عليه شوف العله من الكفر ولا من العكس !!!


قلت تم ..

بدل اللي ورا مع اللي قدام .. قال خذ لفه وتعال .. جربه ..


مشيت ولا مافيه صوت !!

يمين يسار .. مافيه صوت ولله الحمد ..

لكن السياره كان فيها حذفه يسار (( لان الكفر كان رديئ جدا ومنسم ))

رجعت له قلت راح الصوت .. قال الحمد لله

شيك على الكفرات ولاهم رايحات وطي .. قال لازم تغير طقم كامل .



طبعا الكفرات بيرجستون .. انتاج 2006 والسياره موديلها 2007 .. وصار لها معي سنتين ..


انا منغر بشكل النقشه .. احسهم سليمات .. الله يغربلهم من كفرات

تشوفها تقول الكفر سلييييييم ما فيه شي ..

(( وهذا برهان للي يقيس عمر الكفر على النقشه ))

لكن الحين عندي كفرين محبلين + واحد منشلخ من داخل + 2 الله اعلم وش فيهم :D


الزبده يا شباب :

لمن تروح اي ورشه خلك عند سيارتك ولا تخليها عندهم وتمشي ..

ترا فيه ناس والله ما يخافون ربهم ..


واتمنى للكل التوفيق والسداد بالدنيا والاخره ..


والله ما كتبت هالسالفه الا عشان افيد اللي اقدر افيده بهالنصيحه ..

وصلى الله وبارك :)