اخيرا اشتريت السوناتا..ارئكم جدا تهمني..دخولكم يشرفني..

اخوية ابو ملاك تحياتي الحارة وانا ايضا صرت مدمن على هذه المنتدى الجميل والمفيد
بخصوص الاسعار كلامك صحيح انا بصراحة اريد استفيد من خبرة الاخوان الخليجين بالسيارات وهمه ما مقصرين الله يوفقهم.. كتلك اني محتار بين هالسيارتين اني ما مستعجل حاليا بس اريد افكر واختار بعناية ما اريد استعجل لان احسن نفسي استعجلت على السوناتا،،،صح السوك للياباني والكوري بس الامريكي متواجد بالعراق وبقوة،،، اذا اخذنا بنظر الاعتبار قطع الغيار فما اعتقد سيارة تاخذها جديدة راح تحتاج قطع غيار فد اول سنتين على الاقل مو صحيح ما ادري اذا توافقني الرأي وبخصوص (جناي) فآني جناي واكره ابيع واخسر وابدل سيارات احب اشتري سيارة واخليها وياية لحد ما يخلص عمرها،،،اليوكان داشوفها بالشارع العراقي وديكبر حبها واعجابي بيها بس أول عيب بيها محركها 5300 وهذا شفاطة بانزين بس يا أخي والله عاجبتني بعد ما ادري ،،، اتمنى النصح من قبل هالشباب الطيبة بهالمنتدى الرائع....

اخوي غير مسجل تحياتي لك
الامريكي موجود بالشارع العراقي ولكن الغالبية العظمى لاصحاب المصلحة يعني التكسيات وخطوط النقل وقليل ما تلكاها استعمال شخصي،، انا معجب بها كثير بس كما قلت محركها كبير،،، وقطع غيارها ما اعرف شنو العيب بقطع الغيار في حال اذا كانت سيارة جديدة،،، بخصوص الباجيرو فكرت بيها قبل ما اخذ السوناتا بس ما اعرف ما شجعوني عليها،، مع انها سيارة رائعة ،،، قيل لي انها تكسر بستم لان بانزينا مو نظيف وميحترق احتراق كامل الي يسبب ما يعرف عدنا بالعامية (دوانز) يعني عدة اراء قالت هالعيب،،،، بعد ما اعرف وبصراحة انا جربت الياباني والكوري وحاب اجرب الامريكي بس منتظر نصائحكم اخواني وتحيتي الحارة لك اخي مرة ثانية

وفي انتظار الاراء

أخوي جوفارا انا بعد أميل لرأئي أخوي أبو ملاك

اذا السوق العراقي مافية سيارات أمريكية بشكل كبير

اشتري ياباني أو كوري لرخص أسعارهـ

الأ اذا حاب تتميز عن البقية , لكن أنتبه من ظريبة التميز

شو رأيك بـ ميتسوبيشي باجيرو ؟

أعتقد انة يجمع ثلاث عناصر

جودة يابانية + مواصفات فخمة + قوة في الاووف روود

الاخ جوفارا العزيز
اتمنى تكون في احسن الاحوال
اعتقد المشكلة الوحيدة بهذى المنتدى (الي طبعا اني صرت مدمن عليه) الاسعاررررر!
اقصد الاسعار تختلف عن الواقع ..هذا طبعا اذا قارنا بالاسعار الي يطرحها العراقيين اما الاسعار الي يطرحوها الاخوة الاعزاء من خارج العراق فأعتقد الفارق بعد اكثر وصعب نحولها ونقيس عليها؟ بعد ما أعرف انت رايك شنو؟
أما بالنسبة للفور ويل (واني وياك ببعض المصطلحات احسها متعارف عليها وتنفهم اسرع بالانكليزي مع احترامي لبقية الاراء) فرأي تضل على الياباني افضل لان سوقنا بالعراق كوري ياباني وما اعتقد اكو بعد "جناي" مثل قبل اضف لذلك المواد الاحتطياطية وطبعا بهذي النقطة التفوق للكوري
تمنياتي بالموفقية ويوم انتخابي سعيد

والله ياخوية اتكلم عربي واعتقد بعض الكلمات الي مواضحة لو ركزت فيها راح تفهمها لان لهجتنا ومصطلحاتنا عامة وواضحة للكل

تحياتي الك اخي العزيز

عربي لو سحمت

اخوي ابو ملاك تحياتي الك
السوناتا صحيح سيارة حلوة وجميلة ومتزنة نوعا ما بالطريق واني اعتقد هيه احسن سيارة sedan بهيونداي بعد الازيرا طبعا ،، لان الازيرا نبر وان،،، بس اذا اخذنا بعين الاعتبار اهمية حجم المحرك فالازير تجي ستندرد 3300 وهاي صرفها عالي للبانزين فاني افضل السوناتا عليها،،،

المهم اخوية بصراحة الكوري جيد وجميل واتطور وصارله اله سمعة جيدة واسعاره مناسبة،،،، والسنتافي سيارة كانت عاجبتني كثيرا ما جربتها بس اعتقدها سيارة جيدة مما اسمع عنها ،،، جربت الموهافي عند ابن عمي سيارة ثكيلة كلش ورزنة تحسها بي ام متكول هاي السيارة كوري،،، وموصفاتها الداخلية كلش حلوة خاصة من تجي فول يعني نمبر وان،،،

بس مع هذا كله ما ادري احس الكوري بعده ما وصل لمستوى الياباني،، اني داخله براسي الباثفايندر،،، خاصة الفول نمبر وان تجي شاشتين ومواصفات رائعة ،،، صحيح شكلها مو ذاك الشكل وانسيابياتها مو كلش تمام،،، بس اني في اعتقادي الشخصي سيارة رائعة،،، وبخصوص المورانو فالمورانو عاملت عليها آخر مرة بالنهضة فول نمبر وان زيرو 2009 بـ48000 دولار وهذا رقم جبير كلش،،،، المهم اني هسه داادخل على المنتدى الياباني ودا اجيك الباثفايندر اريد اشوف مستواها والله كريم،،،،،، ودا افكر همين بالامريكي التاهوي او اليوكان البترة مو الطويلة لان غالية ،،،، همين داخله براسي واريد اشوف مستواها وقطع غيارها واعطالها ما اعتقد راح اطلع بين هذني السيارتين والله كريم ونشوف نصائح الاخوان بهالمنتدى الجميل ،،،، مو من عوايدي اشارك بمنتديات بس هالمنتدى حسيته صدك جدي ومفيد

تحياتي لك اخوية وللجميع

مبروك

الله يطعمك خيرها ويكفيك شرها

تقبل شكر وتقدير اخوكم { mr.nawaf }

شلونك عزيزي جوفارا
شايفين كل خير انت والوالد المحروس على السوسو الجديدة ....حقيقة اني ما طلعت بعد بيها طرق خارجية بس عبرت 120 سرعة .. اعتقد رغم تجربتي المتواضعة بانها سيارة محترمة تفرض احترامها وما تمدح به السوانت بالمنتدى غير مبالغ به.
بالنسبة للفور ويل ترة الكوري(الموهافي مثلا, السنتافي...) حسب ما يسولفون اصدقائي ما قاصر والياباني مع اعتزازي وتقديري.. بعده "يزامط" بسمعتة واسمه واسعارها متتناسب وابد مو عملية...بالمناسبة اني قريت عن المورانو ..مواصفتها تذهل واذا تريد سيارة قوية بال"off-road" تعجبك ال"اكستيرا" عندي ملفات PDF عن مواصفاتهن واذا تحب نزلها مجاني من موقع نيسان
تحياتي وخل نسمع اذ اشتريت انشاء الله

والله اخوية العزيز
اني اشتريت سوناتا 2010 الشكل القديم بيضة نص فول مشابهة لمواصفات السيارة الي ماخذها انته بس يمكن تزيد عنها بفتحة السقف وصاج،،، اخذتها زيرو ب 22350 كاملة كل شي حتى مع عمولة المعرض ،،، بس الي مستغربه انه يقولولي غالية،،،المهم الحمد لله اخذتها وجاي افتر بيها ،،، مع العلم انه قبل يومين بمعارض النهضة ابغداد نفس مواصفاتها بــ 22500 يعني ينطيها ب22000 ويجي ياخذ عمولة 250 دولار مال معرض يعني نفس السعر تقريبا ،،، طبعا هاي السيارة للوالد اما اني فابحث عن الفور ويل الياباني

اخوي ابو ملاك مبروك الف مبروك على السيارة وشايف كل الخير
سيارتك نص فول على كولة الاخوة،،، لان الفول الاصلي مال السوناتا خنفشاري وميستوردوه بالعراق،،، اعتقد الا استيراد خاص،، اما السوناتا الي بيها مواصفات عاليه فهيه كلها امريكي باعتبار الامريكان عدهم اقل شي الفول الكوري،،، الي يجي 8 اير باك وحساسات وفتحة واي بي اس واي اس بي وشكو بعد انظمة كلها بيها في حين بالخليجي الجديد حتى اي بي اس ماكو،،،، سبحان الله الاي بي اس بالبي ام 90 موجود ستاندارد وبالكوري 2010 يخلوه اوبشن ،،، المهم شايف كل الخير على السيارة

شكري لك لمرورك:smile:
لكن اني احب هذي الاضافات واحسها مهمة :blue:

الاخ: غير مسجل: مجهودك بالرد واضح والله يشهد مفيد
اشكر مرورك وتقبل تحياتي الحارة وان شاء الله ما تقصرون بالشدات :xyxwave:

الف مبروك نصيح اذا تبي الموتر يطول معك لاتغير شي

1- سيارتك نص فل دام فيها تحكم من المقود
والنص فل عن الاستاندر يفرق بـ الجنوط ( الرنقات ) / دركسيون خياطة / كشافات أمامية
تقريباً هذي الفروقات غالباً .

2- قيس على السوق مالكم , هل يهتمون بالاضافات هذى ع السيارة او لا
ولاتنسى تحسب قيمة تكلفتها , عندناً بالسعودية ما احد يهتم فيها هواي :rolleyes1:

3 - راح تغير نظرة الناس للسيارة , لكن اذا فيها قطع أسلاك او تشويه للمظهر راح يصير العكس تماماً , وشخصياً ما انصح باي تعيديل ع السيارة اذا كان يؤثر على أجزائها الكهربية او المكيانيكية .

4 - تغيير الدهان كل 5000 كيلو كـحد أقصى , واطلع على كتيب الصيانة الخاص بالسيارة
راح تحصل أشياء لابد من تغييرها كل فترة محددة .

5 - ياهلا و سهلا فيك تنورنا كل لحظة وانت شريك لنا في منتدانا
وحاب أبارك لك في السيارة , أسئل الله يعطيك خيرها ويكفيك شرها

6- أي سؤال أو استفسار حياك < فوق البيعة :bigggrin:

الاخوة ابو غانم و مجنون نيسان: انا حقيقة ممتن لمروركم ومشاركتم وشرفتونا
بس ماكو واحد اخبرني هل مواصافة سيارتي نص فل لو ستنادرد(يعني سياحي حسب ما تسمونها يمكن)

الله يعيطك خيرها ويكفيك شرها

مبااارك اخي

اولا : الف الف مبروووك السوناتا



ثانيا : انا رأيي من رأي اخوي البنك المركزي