بسم الله الرحمن الرحيم
لعراقة الشركة وجودة منتجاتها واسمها القوي بالعالم إضافة لمدح الأخوان بالمنتدى قررت تركيب عازل 3m
النوع الي اخترته هو فلم كريستلان وكلفني تضليل التاهو 1950 بعد خصم التعاونية 35%
طبعا سيارتي لونها أسود والبيت اتجاهه للغرب ولا عندي مضلة ولا بايكة يعني الشمس تضرب الموتر أغلب أوقات النهار , إضافة إلى إني أسكن الشرقية والحرارة والرطوبة في هالأيام في أعلى معدلاتها
ركبت العازل عند وكيل 3m بالشرقية وفرعه بالخبر والضمان كما هو معروف خمس سنوات , وعلى كلام الموظف إن عزل الحرارة بنسبة تصل إلى 50% وهذا شيء طيب لو كان موجود بالحقيقة
بالنسبة لانطباعي عن العازل , في الأيام الأولى من تركيبه كانت الحرارة في الدمام تقريبا 44 إلى 45 ولما كنت أركب السيارة بالظهر تكون السيارة حارة والدركسون حار لكن بشكل مقبول
لكن اليوم وأمس وصلت درجة الحرارة إلى 48 و 49 ولما أركب السيارة بالظهر وهي ما تحركت أبدا بالنهار أحسها مكتومة وحرارة الأسيارت والتكاية والدركسون عالية مرة وما أحس إني مركب عازل لكن للحق تبرد بشكل سريع بعد تشغيل المكيف وفتح النوافذ
ما أبغى أظلم العازل ممكن حرارة الجو عندنا مالها حل , وممكن اللون الأسود ووقوف السيارة له دور , لكني صراحة توقعت الأكثر من 3m لأن المبلغ الي دفعته مو شوي
